Kapitulo 9

Idi Dumakdakkel ni Jesus

IDI dumakdakkel ni Jesus idiay Nasaret, bassit ken di popular a siudad pay la dayta. Nagsaad iti katurodan iti lugar a naawagan Galilea, pangasitgen idiay naimnas a Ging-et ti Jezreel.

Idi a ni Jesus, a nalabit duat’ tawenna, ket inggapu da Jose ken Maria sadi Egipto, masinunuo a kakaisuna nga anak ni Maria idi. Ngem saan a nagbayag a kasta. Idi agangay, naiyanak da Santiago, Jose, Simon, ken Judas, ket addada pay babbai nga anak da Maria ken Jose. Nagangayanna, di kumurang nga innem ti lallaki ken babbai nga addi ni Jesus.

Adda pay met dadduma a kabagian ni Jesus. Am-ammotayon ni manongna a Juan a kasinsinna, nga agnaed idiay Judea nga adu a kilometrot’ kaadayona. Ngem ni Salome, a masinunuo a kabasat ni Maria, asideg kadakuada ta agtataeng idiay Galilea. Ni Salome isut’ asawa ni Zebedeo, isu a dagidiay dua a baritoda, a da Santiago ken Juan, kasinsin ni Jesus. Ditay ammo no nawadwad a tiempo ti pannakitakunaynay ni Jesus kadagitoy nga ubbing idi dumakdakkelda, ngem idi agangay nasingedda nga agkakadua.

Masapul a nasaet nga agtrabaho ni Jose tapno masuportaranna ti pamiliana. Isu ket karpintero. Ni Jose pinatanornan Jesus a kasla bukodna nga anak, isu a ni Jesus naawagan “anak ti karpintero.” Ni Jose insurona met nga agkarpintero ni Jesus, ket nakasursuro a nalaing. Isu nga idi agangay kinunada maipapan ken Jesus, “Isu daytoy ti karpintero.”

Naisentro ti biag ti pamilia ni Jose iti panagdaydayaw ken Jehova a Dios. Sigun iti Linteg ti Dios, da Jose ken Maria itedda ti naespirituan nga instruksion kadagiti annakda ‘no situtugawda idiay balayda, no magmagnada iti lansangan, no agiddada, ken no bumangonda.’ Adda sinagoga idiay Nasaret, ket masiguradotayo a regular met nga intugot ni Jose ti pamiliana tapno makigimongda sadiay. Ngem di pagduduaan a ti kangrunaan a tinagiragsakda isu ti regular nga ipapanda iti templo ni Jehova idiay Jerusalem. Mateo 13:55, 56; 27:56; Marcos 15:40; 6:3; Deuteronomio 6:6-9.

▪ Di kumurang a mano ti addi ni Jesus, ket aniat’ nagan ti sumagmamano kadakuada?

▪ Asino dagiti tallo a nalatak a kasinsin ni Jesus?

▪ Aniat’ nanggedan ni Jesus idi agangay, ken apay?

▪ Ania a nasken nga instruksion ti inted ni Jose iti pamiliana?