Kapitulo 26

Idi Nagawid Idiay Capernaum

ITATTA ti kinalatak ni Jesus naglawan ti nagsaknapanna, ket adu a tattao ti agdaldaliasat a mapan kadagiti naiputputong a lugar nga ayanna. Kalpasan ti sumagmamano nga aldaw, nupay kasta, isut’ nagsublin idiay Capernaum idiay igid ti Baybay ti Galilea. Ti damag dagdagus a nagsaknap iti intero a siudad nga isut’ nagawiden, ket adu ti umay iti balay nga ayanna. Immay dagiti Fariseo ken mannursuro ti Linteg manipud nakaad-adayo a Jerusalem.

Nagadu unay dagiti tattao ta pinekpekda ti ruangan, ket awan lugaren a pakastrekan pay ti asinoman. Ti eksena kasla nakasagana a maipaay iti pudpudno a nakaskasdaaw a pasamak. Ti napasamak iti daytoy nga okasion nasken ti kinapategna, ta tulongannatayo a mangapresiar a ni Jesus addaan iti pannakabalin a mangikkat iti pagtataudan ti panagsagaba dagiti tattao ken mangisubli iti salun-at kadagiti isuamin a pilienna.

Bayat ti panangisursuro ni Jesus iti umariwekwek, uppat a lallaki nangiyegda iti balay ti maysa a tao a paralitiko nga adda iti langkapi. Kayatda nga agasan ni Jesus ti gayyemda, ngem gaput’ kaaadu ti tattao, saanda a makastrek. Anian a makapaupay! Ngem saanda a simmuko. Immulida idiay plastado a bubong, inabutanda dayta, sada imbaba ti langkapi a yan ti tao a paralitiko iti sibay ni Jesus.

Nakapungtot kadi ni Jesus gapu iti pannakasingana? Nikaanoman! Imbes ketdi, nagsiddaaw unay iti pammatida. Kunana iti tao a paralitiko: “Dagiti basbasolmo mapakawanda.” Ngem aktual kadi a mapakawan ni Jesus dagiti basbasol? Di patien dagiti eskriba ken Fariseo a kasta. Kunada iti puspusoda: “Apay-apay nga agsao daytoy iti kastoy? Agtabbaaw. Asino ti makabalin a mamakawan kadagiti basbasol no saan laeng a ti Dios?”

Gaput’ pannakaammona iti pampanunotda, kuna ni Jesus kadakuada: “Apay-apay a pampanunotenyo ti kakasta a bambanag kadagiti puspusoyo? Ania ti nalaklaka, ti panagkuna iti paralitiko, ‘Dagiti basbasolmo mapakawanda,’ wenno ti panagkuna, ‘Tumakderka ket pidutem ti langkapim ket magnaka’?”

Idin pinalubosan ni Jesus ti umariwekwek, agraman dagiti manangbabalawna, a makakita iti nakaskasdaaw a parangarang a mangipanayag nga isut’ addaan pannakabalin a mangpakawan ti basbasol ditoy daga ket isu a talaga ti kadadaklan pay laeng a tao a nagbiag. Sinangona ti paralitiko ket imbilinna: “Tumakderka, bagkatem ta langkapim, ket inka iti balaymo.” Ket dagus nga inaramidna dayta, a magmagna nga awitna ti langkapina iti imatang dagiti isuamin! Iti panagsiddaaw dagiti tattao indaydayawda ti Dios ket indir-ida: “Dikam pay nakakitkita ti kaasping dayta!”

Nadlawyo aya a nadakamat ni Jesus ti basbasol a nainaig iti sakit ket ti panangpakawan iti basbasol nainaig iti pannakagun-od ti pisikal a salun-at? Ilawlawag ti Biblia a ti immuna a naganak kadatayo, a ni Adan nagbasol ket natawidtay amin ti bunga dayta a basol, awan sabali, ti sakit ken ipapatay. Ngem iti sidong ti panagturay ti Pagarian ti Dios, pakawanento ni Jesus ti basbasol dagiti amin nga agayat iti Dios ken agserbi Kenkuana, ket iti kasta amin a sakit maikkatton. Anian a nagsayaatto dayta! Marcos 2:1-12; Lucas 5:17-26; Mateo 9:1-8; Roma 5:12, 17-19.

▪ Aniat’ eksena maipaay iti pudpudno a nakaskasdaaw a pasamak?

▪ Kasano a nagteng ti tao a paralitiko ni Jesus?

▪ Apay a managbasoltay amin, ngem kasanot’ panangipaay ni Jesus iti namnama a ti pannakapakawan ti basbasoltayo ken ti naan-anay a salun-at ket posible?