Kapitulo 91

Idi Napagungar ni Lazaro

NI Jesus, agraman dagidiay nakikuyog kenkuana, dimtengdan idiay tanem a pakalaglagipan ni Lazaro. Kinapudnona, daytat’ maysa a rukib ket naserraan iti bato. “Ikkatenyo ti bato,” kinuna ni Jesus.

Agkedked ni Marta, ta dina maawatan ti panggep nga aramiden ni Jesus. “Apo,” kinunana, “nabuyoken, ta maikapat nga aldaw a natayen.”

Ngem inimtuod ni Jesus: “Diak aya kinuna kenka, a no mamatika makitam ti dayag ti Dios?”

Inikkatda ngarud ti bato. Ket ni Jesus intangadna dagiti matana ket nagkararag: “Ama, agyamanak kenka ta impangagnak. Ket ammok nga ipangagnak iti agnanayon; ngem gapu kadagitoy adu a tao nga agtatakder iti aglawlaw agsaoak tapno patienda a sika imbaonnak.” Nagkararag a sipapanayag ni Jesus tapno maammuan dagiti tattao a ti ngangnganinan aramiden maibanagto babaen iti pannakabalin a naggapu iti Dios. Idin pimmukkaw iti napigsa a timek: “Lazaro, rummuarka!”

Idin, rimmuar ni Lazaro. Sipapatapat pay dagiti saksakana kadagiti bedbed, ket ti rupana adda a nabungon iti lupot. “Warwaranyo ket bay-anyo a mapan.” kuna ni Jesus.

Idi nakitada ti milagro, adu a Judio nga immay mangliwliwa ken Maria ken ni Marta ti namati ken Jesus. Dadduma, nupay kasta, napanda kadagiti Fariseo ket sinaritada kadakuada ti napasamak. Dagitoy ken dagiti kangatuan a papadi nangurnongda ti maysa a paguumanan iti nangato a korte dagiti Judio, ti Sanhedrin.

Ti Sanhedrin iramanna ti agdama a nangato a padi, a ni Caifas, kasta met dagiti Fariseo ken Saduceo, dagiti kangrunaan a papadi, ken dagiti dati a nangato a papadi. Dagitoy agsennaayda: “Ania ti aramidentayo, ta daytoy a tao agaramid kadagiti adu a pagilasinan? No baybay-antayo laeng, mamatinto amin dagiti tao kenkuana, ket umayto dagiti taga Roma ket ikkatendanto ti saadtayo ken ti ili pay.”

Nupay no aminen dagiti relihiuso a papangulo a ni Jesus “agaramid kadagiti adu a pagilasinan,” ti laeng pakaseknanda isu ti saadda ken ti autoridadda. Ti panangpagungar ken ni Lazaro ket pudno a nabileg a tungpa kadagiti Saduceo, ta dida mamati iti panagungar.

Ni Caifas, a nalabit maysa a Saduceo, agsao, a kunkunana: “Awan ti ammoyo a pulos, ket dikay pampanunoten ti maipaay kadakayo a matay ti maysa a tao gapu kadagiti umili ket saan ket a mapukaw ti intero a nasion.”

Ti Dios inimpluensiaanna ni Caifas a mangibaga itoy, ta kamaudiananna nagsurat ni apostol Juan: “Ngem daytoy, saanna [ni Caifas] a sinao a bukodna.” Ti pudno a kayat a sawen ni Caifas ket ni Jesus masapul a mapapatay tapno malapdan a mangpakapuy iti saad ken autoridadda ken impluensiada. Ngem, sigun ken ni Juan, ‘ni Caifas impadtona a ni Jesus naikeddeng a matay saan a maipaay iti nasion laeng, no di ket tapno maurnong dagiti annak ti Dios.’ Ket, kinapudnona, panggep ti Dios a matay ti Anakna kas subbot a maipaay kadagiti amin.

Itan nagballigin ni Caifas a nangimpluensia iti Sanhedrin a mangiplano iti panangpatay ken Jesus. Ngem ni Jesus, gaput’ naammuanna dagitoy a plano manipud ken ni Nicodemo, maysa a miembro iti Sanhedrin a mannakigayyem kenkuana, pimmanaw sadiay. Juan 11:38-54.

▪ Apay a sipapanayag a nagkararag ni Jesus sakbay ti panangpagungarna ken Lazaro?

▪ Kasanot’ panagtignay dagidiay a nakakita itoy a panagungar?

▪ Aniat’ mangipalgak iti kinadakes dagiti miembro ti Sanhedrin?

▪ Aniat’ panggep ni Caifas, ngem isut’ inusar ti Dios a mangipadto iti ania?