Kapitulo 130

Idiay Baybay ti Galilea

AGSUBLIN dagiti apostol idiay Galilea, kas iti nasaksakbay nga imbilin ni Jesus kadakuada. Ngem dida masigurado no aniat’ aramidenda sadiay. Idi kuan, ni Pedro imbagana kada Tomas, Natanael, Santiago ken ni kabsatna a Juan, ken dua pay nga apostol: “Innak agdaklis.”

“Sumurotkami met kenka,” insungbat dagiti innem.

Iti agpatnag, awan pulos nakalapanda. Nupay kasta, idi bumigaten, nagparang ni Jesus iti igid ti baybay, ngem di nailasin dagiti apostol nga isu ni Jesus. Impukkawna: “Babbaro, adda kadi kadakayo ti aniaman a makan?”

“Awan!” impukkawda iti ballasiw ti danum.

“Iwayatyo ti iket iti makannawan a bakrang ti barangay ket makaalakayto,” kunana. Ket idi inaramidda dayta, didan maisang-at ti iketda gaput’ kaadu ti ikan.

“Isu ti Apo!” impukkaw ni Juan.

Idi mangngegna daytoy, nagbado ni Pedro, ta nakauksob idi, ket timmappuak iti baybay. Naglangoy iti agarup 90 metros nga agpa-takdang. Simmurot ti dadduma nga apostol nga adda iti bassit a barangay, a guyguyodendat’ iket a napnot’ ikan.

Idi nakagtengdan iti takdang, adda dumardarang a beggang, a naparabawan ti ikan, ken adda tinapay. “Mangyegkayo kadagiti ikan a kaal-alayo,” kuna ni Jesus. Napan limmugan ni Pedro ket insang-atna ti iket. Naglaon iti 153 a dadakkel nga ikan!

“Umaykayo, mamigatkayo,” inyawis ni Jesus.

Awan kadakuadat’ makaitured a mangiyimtuod, “Asinoka?” ta ammoda amin nga isu ni Jesus. Daytoy ti maikapito a panagparangna kalpasan a nagungar, ken ti maikatlo a panagparangna iti grupo dagiti apostol. Nangiserbi itan ti pammigat, nga inikkanna ida iti sumagmamano a tinapay ken ikan.

Idi makapamigatdan, ni Jesus, a mabalin kumitkita iti adu a nakalapan nga ikan, nagsaludsod ken Pedro: “Simon nga anak ni Juan, ad-adda kadi nga ay-ayatennak ngem kadagitoy?” Awan duadua a kayatna a sawen, Ad-adda kadi a naigamerka iti negosio a panagkalap ngem iti trabaho nga insaganak nga aramidem?

“Ammom nga ay-ayatenka,” insungbat ni Pedro.

“Pakanem dagiti karnerok,” insungbat ni Jesus.

Manen, iti maikadua a daras, insaludsodna: “Simon nga anak ni Juan, ay-ayatennak kadi?”

“Wen Apo, ammom nga ay-ayatenka,” sireregta nga insungbat ni Pedro.

“Ipaarabmo dagiti karnerok,” imbilin manen ni Jesus.

Kalpasanna, kaskasdi iti maikatlo a daras, insaludsodna: “Simon nga anak ni Juan, ay-ayatennak kadi?”

Itan nagladingiten ni Pedro. Nalabit pampanunotenna no pagduaduaan ni Jesus ti kinamatalekna. Ta ngamin, iti nabiit pay a pannakabista ni Jesus maipaay iti biagna, namitlo nga inlibak ni Pedro nga isut’ am-ammona. Gapuna kuna ni Pedro: “Apo, ammom dagiti isuamin; ammom nga ay-ayatenka.”

“Pakanem dagiti karnerok,” imbilin ni Jesus iti maikatlo a daras. 

Iti kasta inusar ni Jesus ni Pedro a kas pangusigan tapno ipaganetget iti dadduma ti trabaho a kayatna nga ipaaramid kadakuada. Di agbayag pumanawton iti daga, ket kayatna nga idauluanda ti panagministerio kadagidiay maiyegto iti arban ti Dios.

No kasano a ni Jesus napungo ken napapatay gapu ta inaramidnat’ trabaho nga imbilin ti Dios kenkuana, iti kasta, ipalgakna itan, nga umas-aspingto met ti mapasaran ni Pedro. “Idi ubingka,” kuna kenkuana ni Jesus, “agbarikeska ket magmagnaka idi iti kaykayatmo. Ngem inton lakaykan iyunnatmonto ti imam ket barikesannakanto ti sabali sanaka ipan iti dimo kayat.” Agpapan pay ti pannakamartir nga agur-uray ken Pedro, inggunamgunam ni Jesus kenkuana: “Itultuloynak a suroten.”

Idi timmalliaw, nakita ni Pedro ni Juan ket nagsaludsod: “Apo, aniat’ aramidento daytoy a tao?”

“No kayatko nga agbiag agingga iti iyaayko,” insungbat ni Jesus, “aniat’ pakaseknamto iti dayta? Itultuloynak a suroten.” Adu nga adalan ni Jesus impagarupda a dagitoy a sasao ni Jesus kaipapananda a saanto pulos a matay ni Juan. Nupay kasta, kas inlawlawag ni apostol Juan kalpasanna, saan a kinuna ni Jesus nga isut’ saanto a matay, ngem basta kinuna ni Jesus: “No kayatko nga agbiag agingga iti iyaayko, aniat’ pakaseknamto iti dayta?”

Adda met napateg a kapaliiwan ni Juan kamaudiananna: “Addada pay, iti kinapudnona, adu nga ar-aramid ni Jesus, a no maisuratda koma a masaggaysa, pagarupek, ti lubong a mismo saannan a malaon dagiti libro a pakaisuratanda.” Juan 21:1-25; Mateo 26:32; 28:7, 10.

▪ Aniat’ mangipakita a di masigurado dagiti apostol no aniat’ aramidenda sadi Galilea?

▪ Kasano a dagiti apostol nailasinda ni Jesus idiay Baybay ti Galilea?

▪ Namin-anon a nagpakita ni Jesus nanipud idi panagungarna?

▪ Kasanot’ panangipaganetget ni Jesus iti tarigagayanna nga aramiden dagiti apostol?

▪ Kasanot’ panangipakita ni Jesus iti wagas ti ipapatay ni Pedro?

▪ Aniat’ komento ni Jesus maipapan ken Juan a di naawatan ti adu nga adalan?