Kapitulo 66

Idiay Piesta dagiti Abong-abong

NI Jesus nagbalin a nalatak bayat ti ngangngani tallo a tawen nanipud idi pannakabautisarna. Adu a ribo ti nakakita kadagiti milagrona, ket ti damag maipapan kadagiti ar-aramidna nagsaknap iti intero a pagilian. Itan, bayat ti panaguurnong dagiti tattao a maipaay iti Piesta ti Abong-abong idiay Jerusalem, isut’ sinapsapulda sadiay. “Adino ti yan dayta a tao?” kayatda a maammuan.

Ni Jesus nagbalin a tema iti pagsusuppiatan. “Isut’ maysa a naimbag a tao,” kuna ti dadduma. “Saan, no di ket iyaw-awanna dagiti adu,” kuna dagiti dadduma. Adu unay dagiti mamedmedan a kastoy a sasao bayat dagiti umuna nga al-aldaw iti piesta. Ngem awan ti addaan iti tured nga agsao a sipapanayag iti biang ni Jesus. Ti makagapu ket dagiti tattao agamakda iti panangbabalaw manipud kadagiti papangulo a Judio.

Idi agkaguduan ti piesta, dimteng ni Jesus. Napan idiay templo, a sadiay nagsiddaaw dagiti tattao kadagiti nakaskasdaaw nga abilidadna a mangisuro. Yantangay pulos a saan a nagadal ni Jesus kadagiti eskuelaan dagiti rabbi wenno mannursuro, nagsiddaaw dagiti Judio: “Kasano ti pannakaammo daytoy a tao kadagiti pagbasaan, idinto a di nagadal?”

“Ti isursurok saanko a kukua,” inlawlawag ni Jesus, “no di kukua ti nangibaon kaniak. No adda agpanggep nga agaramid ti pagayatanna, maammuannanto ti maipapan iti isursurok no aggapu iti Dios wenno no agsaoak a sisiak.” Ti pannursuro ni Jesus salimetmetanna a naimbag ti linteg ti Dios. Gapuna, nalawag koma a makita a sapsapulenna ti pakaidayawan ti Dios, saan a ti bukodna a pakaidayawan. “Dinakayo aya inikkan ni Moises ti Linteg?” inyimtuod ni Jesus. Kas panangtubngar, kinunana: “Ket awan pay kadakayo ti mangaramid ti Linteg.”

“Apay-apay agawaandak a papatayen?” inyimtuod ngarud ni Jesus.

Dagiti tattao, a nalabit dagiti bisita iti piesta, dida ammo ti kasta a panagregget. Dida pagarupen nga adda asinoman nga agtarigagay a mangpapatay iti kasta a nakaskasdaaw a mannursuro. Gapuna patienda nga adda di umiso a banag iti panangipagarup ni Jesus iti daytoy. “Adda sairom,” kunada. “Asino ti manggayagay a mangpapatay kenka?”

Dagiti papangulo a Judio tarigagayanda a papatayen ni Jesus, uray pay no saan a mabigbig ti bunggoy dayta. Idi pinaimbag ni Jesus ti maysa a lalaki iti aldaw ti Panaginana maysa ket kagudua a tawen sakbayna, pinadas dagiti papangulo ti mangpapatay kenkuana. Gapuna intudon ni Jesus a saanda a nainkalintegan babaen ti panangimtuodna kadakuada: “No ti tao awatenna ti pannakakugit iti aldaw a panaginana tapno ti linteg ni Moises saan a masalungasing, marurodkayo aya kaniak agsipud ta pinaimbagko nga awan pagkuranganna ti maysa a tao iti aldaw ti panaginana? Saankayo nga agipato a kas ti langa, no di ket agipatokayo iti maysa a nalinteg a panangipato.”

Dagiti umili iti Jerusalem, a makaammo iti kasasaad, kunada ngarud: “Saan aya a daytoy ti sapsapulenda a papatayen? Ket, adtoy! agsasao iti nalatak, ket awan ti kunaenda kenkuana. Saan a pudno aya a dagiti agturay ammoda a daytoy ti Kristo?” Dagitoy nga umili iti Jerusalem ilawlawagda no apay a dida patien a ni Jesus isu ti Kristo: “Ngem daytoy a tao ammomi no adino ti naggapuanna; ngem ti Kristo, inton umay, awanto ti makaammo no adino ti paggapuanna.”

Simmungbat ni Jesus: “Am-ammodak ket ammoyo met ti naggapuak. Ket saanak a naggapu kaniak met laeng, ngem ti nangibaon kaniak napudno, isu a dikay am-ammo. Siak ammok, ta naggapuak kenkuana ket Isu imbaonnak.” Isu ngarud ti inagawaanda a tiliwen, nalabit tapno ibaludda wenno papatayenda. Ngem saanda a nagballigi ta saan pay a dimteng ti oras ti ipapatay ni Jesus.

Kaskasdi, adu ti namati ken Jesus, ta masapul a mamatida. Ta, isu nagna iti danum, pinakalmana dagiti angin, pinakalmana ti nadaleg a baybay, simimilagro a pinakanna dagiti sumagmamano a ribo iti sumagmamano a tinapay ken ikan, pinaimbagna dagiti masaksakit, pinapagnana dagiti pilay, linukatanna ti mata dagiti bulsek, pinaimbagna dagiti agkukutel, ket pinagungarna pay dagiti natay. Gapuna imtuodenda: “Ni Kristo inton umay, agaramidto ngata ti ad-adda a pagilasinan ngem kadagiti inaramid daytoy a tao?”

Idi nangngeg dagiti Fariseo a tantanabutoben dagiti adu a tao dagitoy a bambanag, dagitoy ken dagiti kangatuan a papadi nangibaonda kadagiti polisia a mangtiliw ken Jesus. Juan 7:11-32.

▪ Kaano ti isasangpet ni Jesus iti piesta, ket aniat’ sasawen dagiti tattao maipapan kenkuana?

▪ Apay a kunaen dagiti dadduma a ni Jesus addaan iti sairo?

▪ Ania ti panangmatmat dagiti umili iti Jerusalem ken ni Jesus?

▪ Apay nga adu ti mamati ken Jesus?