Kapitulo 72

Imbaon ni Jesus Dagiti 70

OTOÑO idi ti 32 K.P., naan-anay a tallo a tawen nanipud pannakabautisar ni Jesus. Isu ken dagiti adalanna nabiitda pay a timmabuno ti Piesta dagiti Abong-abong idiay Jerusalem, ken kaawatan nga addada pay iti arubayan. Kinapudnona, binusbos ni Jesus ti kaaduan iti natda nga innem a bulan ti ministeriona idiay Judea wenno idiay ballasiw latta ti Karayan Jordan idiay distrito ti Perea. Daytoy a teritoria ti kasapulan a masaknapan met.

Pudno, kalpasan ti Paskua idi 30 K.P., nangbusbos ni Jesus ti agarup walo a bulan a nangaskasaba idiay Judea. Ngem kalpasan ti panangpadpadas dagiti Judio a mangpapatay kenkuana sadiay idi Paskua ti 31 K.P., binusbosna ti sumaganad a makatawen ket kagudua a nangisursuro nangnangruna idiay Galilea. Kabayatan dayta a tiempo, isut’ nakabuangay ti maysa a dakkel, nasayaat pannakasanayna nga organisasion dagiti manangaskasaba, banag nga awan kenkuana idi rugina. Gapuna isu itan ti nangirubuat ti maudi a naganetget a kampania ti panangaskasaba idiay Judea.

Inggay-at ni Jesus daytoy a kampania babaen ti panangpilina ti 70 nga adalan ket imbaonna ida a sagdudua. Gapuna, ti dagupna addan 35 a bunggoy dagiti manangaskasaba ti Pagarian a mangtrabaho iti teritoria. Dagitoy ti napan a nasapsapa iti tunggal siudad ken lugar a plano a papanan ni Jesus, a kaawatan kuykuyogen dagiti apostolna.

Imbes a binilinna dagiti 70 a mapan kadagiti sinagoga, imbaga ni Jesus a sumrekda kadagiti pribado a pagtaengan, nga inlawlawagna: “Ket iti uray ania a balay a serkanyonto kunayo nga umuna: ‘Talna koma iti daytoy a balay.’ Ket no addanto idiay ti maysa a gayyem ti talna, ti talnayo agnaedto kenkuana.” Anianto ti mensaheda? “Kunayo kadakuada,” kuna ni Jesus, “immasideg kadakayo ti pagarian ti Dios.” Maipapan iti trabaho dagiti 70, kuna ti Matthew Henry’s Commentary: “Kas ti Apoda, sadinoman a sinarungkaranda, nangaskasabada iti binalaybalay.”

Dagiti bilin ni Jesus kadagiti 70 ket umas-asping kadagidiay intedna kadagiti 12 idi imbaonna dagitoy iti kampania a panangasaba idiay Galilea agarup makatawen a nasapsapa. Saanna laeng a pinakdaaran dagiti 70 iti ibubusor a sanguenda, nga insaganana ida a mangiparang ti mensahe kadagiti bumalay, no di ket inikkanna ida ti pannakabalin a mangagas kadagiti masakit. Gapuna, inton dumteng ni Jesus di agbayag kalpasanna, adunto dagiti sumga a makakita iti Apo a dagiti adalanna mabalinda ti agaramid kadagita a nakaskasdaaw a bambanag.

Ti panangasaba dagiti 70 ken ti trabaho ni Jesus a panangsaruno ket nakabibiit laeng. Di nagbayag ti 35 a bunggoy dagiti manangaskasaba ti Pagarian nangrugidan nga agsubli ken Jesus. “Apo,” siraragsak a kunkunada, “uray pay dagiti demonio pinaiturayanda kadakami iti naganmo.” Ti kasta a nagsayaat a report ti serbisio ti sigurado a nangparagsak ken ni Jesus, ta kinunana: “Nakitak ni Satanas a natnag nanipud langit a kasla sal-it. Adtoy! inikkankayo ti pannakabalin a pumayat kadagiti ul-uleg ken manggagama.”

Ammo ni Jesus a kalpasan ti pannakaipasngay ti Pagarian ti Dios inton panawen ti panungpalan, maigarangugongton ni Satanas ken dagiti demoniona manipud langit. Ngem ita daytoy a panangparuar kadagiti di makitkita a demonio babaen laeng kadagiti tao ti nagserbi kas kanayonan a pammasiguro iti iyaay dayta a pasamak. Gapuna, nagsao ni Jesus maipapan iti masanguanan a pannakatnag ni Satanas manipud langit kas naan-anayen a kinapudno. Gapuna, iti simboliko a kaipapanan a dagiti 70 naikkanda ti pannakabalin a pumayat kadagiti uleg ken manggagama. Kaskasdi, kinuna ni Jesus: “Ngem dikay agay-ayat iti daytoy, a dagiti espiritu paiturayanda kadakayo, agay-ayatkay ketdi ta dagiti nagnaganyo naisuratdan idiay langit.”

Maragsakan unay ni Jesus ket iti publiko indaydayawna ni Amana iti panangusarna kadagitoy nanumo nga ad-adipenna iti nagpigsa a pamay-an. Ket sinangona dagiti adalanna, kinunana: “Naragsak dagiti mata a makakita kadagiti makitayo. Ta kunak kadakayo, Adu dagiti mammadto ken ar-ari a tinarigagayanda a kitaen dagiti makitayo ket dida nakita ida, ken denggen dagiti mangngegyo, ngem dida nangngeg ida.” Lucas 10:1-24; Mateo 10:1-42; Apocalipsis 12:7-12.

▪ Sadinot’ nangasabaan ni Jesus kadagiti umuna a tallo a tawen ti ministeriona, ken ania a teritoria ti sinaklawna iti maudi nga innem a bulan?

▪ Sadinot’ nangiturongan ni Jesus kadagiti 70 a pakasarakan kadagiti tattao?

▪ Apay a kinuna ni Jesus a nakitanan ni Satanas a natnag manipud langit?

▪ Iti ania a kaipapanan a dagiti 70 mabalinda a payaten dagiti uleg ken manggagama?