Kapitulo 11

Insagana ni Juan ti Dalan

ADDA 17 a tawenen ti limmabas manipud idi 12-años ni Jesus a nagsaludsodanna dagiti mannursuro idiay templo. Primavera itan ti 29 K.P., ket kasla amin a tattao, pagsasaritaanda ni Juan a kasinsin ni Jesus, a mangaskasaba iti likmut ti Karayan Jordan.

Talaga a natakneng a lalaki ni Juan, agpada no iti langa ken panagsasaona. Dutdot ti kamelio ti kawesna, ket adda lalat a naibarikes iti lumona. Dudon ken diro ti bakir ti taraonna. Ket ti mensahena? “Agbabawikayon ta ti Pagarian dagiti langit asidegen.”

Daytoy a mensahe ti nangtignay kadagiti dimngeg kenkuana. Adut’ nakabigbig iti inda panagbabawi, a kayatna a sawen, ti panangbalbaliwdat’ kababalinda ken ti pananglaksidda iti dati a kabibiagda a kas makasubkar. Isu a manipud iti amin a teritoria a kaparanget ti Jordan, agraman sadi Jerusalem, adu nga umili dagiti immay ken Juan, ket binautisaranna ida kadagiti danum ti Jordan. Apay?

Binautisaran ni Juan dagiti umili kas simbolo, wenno panangbigbigda, iti naimpusuan a panagbabawida kadagiti nagbasolanda iti tulag ti Linteg ti Dios. Gapuna, idi napan dagiti Fariseo ken Saduceo idiay Jordan, kinondenar ni Juan ida. “Dakayo a kaputotan dagiti karasaen,” kunana. “Agaramidkay kadagiti bunga a maikari iti panagbabawi; ket dikay agpanunot a kunaenyo, ‘Adda ni Abraham a pannakaamami.’ Ta kunak kadakayo a ti Dios mabalinna ti mamangon kadagiti annak ken Abraham uray pay kadagitoy a bato. Ket itan ti wasay naikabilen iti ramut dagiti kayo; tunggal kayo ngarud a di mangted ti nasayaat a bunga mapukan ket maisungrod iti apuy.”

Gapu ta kasta la unay ti panangasikasoda ken Juan, nangibaon dagiti Judio kadagiti papadi ken Levita kenkuana. Inyimtuodda: “Asinoka?”

“Saan a siak ti Kristo,” impudno ni Juan.

“Ania, ngarud?” dinamagda. “Sika ni Elias?”

“Saan a siak,” kunana.

“Sika Ti Mammadto?”

“Saan!”

Isu nga impilitda: “Asinoka? tapno maitedmi ti sungbat kadagiti nangibaon kadakami. Ania ti kunam maipapan kenka met laeng?”

Inlawlawag ni Juan: “Siak ti timek ti maysa nga agaw-awag iti let-ang, ‘Palintegenyo ti dalan ni Jehova,’ kas kinuna ni mammadto nga Isaias.”

“Apay-apay ngarud a mamautisarka,” kayatda nga ammuen, “no saan a sika ti Kristo wenno ni Elias wenno Ti Mammadto?”

“Siak mamautisarak iti danum,” insungbatna. “Iti nagtengngaanyo agtaktakder ti maysa a diyo am-ammo, daydiay umay a sumaruno kaniak.”

Isagsagana ni Juan ti dalan babaen ti panangiyegna iti tattao ti umiso a kasasaad ti puso nga umawat iti Mesias, nga agbalinto nga Ari. Maipapan iti Dayta, ni Juan kunana: “Ti umay sumaruno kaniak dakdakkel ti pannakabalinna ngem siak, a saanak a maikari a mangwarwar iti sapatosna.” Kinapudnona, kunaen pay ni Juan: “Dayta umay sumaruno kaniak, unnaannak, ta immun-una idi ngem siak.”

Gapuna, ti mensahe ni Juan, “ti pagarian dagiti langit asidegen,” ipakaammona iti publiko a ti ministerio ti dinutokan ni Jehova nga Ari, a ni Jesu-Kristo, ngangngani mangrugin. Juan 1:6-8, 15-28; Mateo 3:1-12; Lucas 3:1-18; Aramid 19:4.

▪ Aniat’ klasena a tao ni Juan?

▪ Apay a mangbautisar ni Juan iti tattao?

▪ Apay a mabalin a maikuna ni Juan a ti Pagarian asidegen?