Kapitulo 48

Ipapanaw iti Balay ni Jairo ken Panangsarungkar Manen iti Nasaret

TI ALDAW ket okupado unay a maipaay ken ni Jesus​—ti panagdaliasat iti baybay manipud Decapolis, ti panangagas iti babai nga agpadpadara, ken ti panangpagungar iti anak a babai ni Jairo. Ngem ti aldaw di pay naglabas. Kaawatan a bayat a pumampanaw ni Jesus iti balay ni Jairo, dua a bulsek a lalaki ti simmurot iti likudanna, nga agpukpukkaw: “Kaasiannakami, Anak ni David.”

Babaen ti panangawagda ken ni Jesus kas “Anak ni David,” iyeb-ebkasen dagitoy a lallaki ti pammatida ken ni Jesus nga isu ti agtawid iti trono ni David, gapuna isu ti naikari a Mesias. Ni Jesus, nupay kasta, kasla dina inkankano ti panagpukpukkawda a maipaay iti tulong, nalabit tapno suoten ti pingetda. Ngem saan a nagsardeng dagiti lallaki. Sinurotda ni Jesus agingga idiay paggigiananna, ket idi a simrek iti balay, simmurotda kenkuana iti uneg.

Sadiay nagsaludsod ni Jesus: “Patienyo a mabalinko nga aramiden daytoy?”

“Wen, Apo,” sitatalek nga insungbatda.

Ket, idi sinagidna dagiti matada, kinuna ni Jesus: “Kas iti pammatiyo maaramid koma kadakayo.” Ket giddato a nakakitada! Ket ni Jesus imbilinna kadakuada iti nainget: “Kitaenyo ta awan koma ti makaammo.” Ngem napunno ti dakkel a ragsak, dida inkankano ti bilin ni Jesus ket isu ti sinarsaritada iti intero a distrito.

Apaman a makapanaw dagitoy a lallaki, inyeg dagiti tattao ti maysa a lalaki a nagunggan ti sairo a pinagbalin dagiti demonio nga umel. Pinaruar ni Jesus ti sairo, ket giddato nangrugi a makapagsaon ti lalaki. Nagsiddaaw dagiti tattao kadagitoy a milagro, a kunkunada: “Uray kaano saantay a nakakita ti kastoy ditoy Israel.”

Ket addada met dagiti Fariseo. Saanda a mailibak dagiti milagro, ngem gapu iti nadangkes a dida panamati inulit-ulitda ti pammabasolda no ania ti gubuayan dagiti mannakabalin nga ar-aramid ni Jesus, a kunkunada: “Gapu ti pannakabalin ti pangulo dagiti sairo a paruarenna dagiti sairo.”

Di nagbayag kalpasan dagitoy a pasamak, nagsubli ni Jesus iti ilina a Nasaret, nga ita kinuyog dagiti adalanna. Agarup makatawen a nasapsapa, isu ti simmarungkar idiay sinagoga ket nangisuro sadiay. Nupay nagsiddaaw idi damo dagiti tattao kadagiti makaay-ayo a sasaona, iti kamaudiananna naitibkolda iti sursurona ket isut’ pinadpadasda a papatayen. Ita, siaasi, pinadas manen ni Jesus a tulongan dagiti dati a kaarrubana.

Nupay kadagiti dadduma a luglugar immarak dagiti tattao ken ni Jesus, ditoy nalawag a saan. Gapuna, iti Sabbath, isut’ napan idiay sinagoga tapno mangisuro. Kaaduan kadagidiay nakangngeg kenkuana nagsiddaawda. “Adino ti nangalaan daytoy a tao itoy a kinasirib ken kadagitoy a pannakabalin a datdatlag?” insaludsodda. “Saan kadi a daytoy ti anak daydi allawagi? Saan kadi a managan ni inana ti Maria, ket dagiti kakabsatna da Santiago ken Jose ken Simon ken Judas? Ket saan kadi nga addada amin kadatayo dagiti kakabsatna a babbai? Adino ngarud ti nangalaan daytoy a tao kadagitoy amin a bambanag?”

‘Ni Jesus ket maysa laeng a tao a kas kadatayo,’ inrasonda. ‘Isu ti nakitatayo a dimmakkel, ken ammotayo ti pamiliana. Kasano nga isu ti Mesias?’ Gapuna agpapan pay amin dagiti pammaneknek​—ti naindaklan a kinasiribna ken dagiti datdatlagna​—isu ti linaksidda. Gapu iti kinasingedda, uray dagiti kabagianna naitibkolda kenkuana, nga isut’ nagkunaan ni Jesus: “Ti mammadto saan a maawanan ti dayaw no di idiay dagana met laeng ken kadagiti kakabagianna ken idiay balayna.”

Pudno unay, nagsiddaawan ni Jesus ti kinakurang ti pammatida. Gapuna isut’ saan a nagaramid iti aniaman a milagro sadiay malaksid ti panangipatayna ti imana kadagiti sumagmamano a masakit a tattao ket pinaimbagna ida. Mateo 9:27-34; 13:54-58; Marcos 6:1-6; Isaias 9:7.

▪ Babaen ti panangawagda ken ni Jesus kas “Anak ni David,” ania ti impakita dagiti lallaki a bulsek a patienda?

▪ Ania a panangilawlawag kadagiti datdatlag ni Jesus ti nagtinnagan dagiti Fariseo?

▪ Apay a kinamanangngaasi ti panagsubli ni Jesus tapno tulongan dagidiay adda sadi Nasaret?

▪ Ania a panangawat ti impakitada ken ni Jesus idiay Nasaret, ken apay?