Kapitulo 132

Iti Makannawan ti Dios

TI PANNAKAIBUKBOK ti nasantuan nga espiritu idi Pentecostes ket ebidensia a nakasublin ni Jesus sadi langit. Ti sirmata a naiyeg di nagbayag kalpasanna ken ni adalan nga Esteban paneknekanna met nga Isut’ nakagtengen sadiay. Idi maub-ubor ni Esteban gaput’ matalek a panangaskasabana, impukkawna: “Adtoy! kitkitaek ti langit a silulukat ket ti Anak ti tao agtaktakder iti makannawan ti Dios.”

Bayat ti kaaddana iti makannawan ti Dios, ur-urayen ni Jesus ti bilin manipud ken Amana: “Agturayka iti tengnga ti kabkabusormo.” Ngem kabayatanna, agingga nga agtignay a maikontra kadagiti kabusorna, aniat’ aramiden ni Jesus? Isut’ agturay, wenno agari, kadagiti napulotan nga adalanna, nga iturturongna ida iti trabahoda a panangaskasaba ken isagsaganana ida nga agbalin, babaen ti panagungar, a kaduana nga ar-ari iti Pagarian ni Amana.

Kas ehemplo, pinili ni Jesus ni Saulo (idi agangay ad-adda nga am-ammo iti Romano a naganna, a Pablo) tapno idauluanna ti panangaramid-adalan a trabaho iti dadduma a daga. Naregta ni Saulo iti Linteg ti Dios, kaskasdi isut’ inallilaw dagiti relihiuso a panguluen dagiti Judio. Kas resultana, saan laeng nga inanamongan ni Saulo ti pannakapapatay ni Esteban no di ket nagpa-Damasco nga addaan autorisasion ni Caifas a nangato a padi tapno isublina idiay Jerusalem a siaaresto ti asinoman a lallaki ken babbai a masarakanna a paspasurot ni Jesus. Nupay kasta, idi addan ni Saulo iti dalanna, adda naraniag a lawag a nanglakub kenkuana ket napasag.

“Saulo, Saulo, apay idadanesnak?” insaludsod ti maysa a timek a naggaput’ di makita a gubuayan. “Asinoka, Apo?” inyimtuod ni Saulo.

“Siak ni Jesus nga idaddadanesmo,” insungbatna.

Binilin ni Jesus ni Saulo, a binulsek ti karkarna a lawag, nga isut’ sumrek sadi Damasco ket urayenna dagiti bilinna. Kalpasanna nagparang ni Jesus iti maysa a sirmata ken Ananias, a maysa kadagiti adalanna. Maipapan ken Saulo, imbaga ni Jesus ken Ananias: “Daytoy a tao pinilik nga agserbi kaniak a mangipan ti naganko kadagiti nasion agraman kadagiti ar-ari ken annak ti Israel.”

Wen, babaen ti tulong ni Jesus, ni Saulo (a naam-ammo kas Pablo) ken ti dadduma pay nga ebanghelisador sibaballigida unay iti trabahoda a panangaskasaba ken panangisuro. Kinapudnona, agarup 25 a tawen kalpasan ti panagparang ni Jesus kenkuana idiay dalan nga agpa-Damasco, insurat ni Pablo a ti “naimbag a damag” ket “naikaskasaba iti amin a parsua iti baba ti langit.”

Kalpasan ti panaglabas ti adu pay a tawen, nangipaay ni Jesus ti serye dagiti sirmata iti dungdunguenna nga apostol, ni Juan. Babaen kadagitoy a sirmata a dineskribir ni Juan iti libro nga Apocalipsis, isu, iti kaiyariganna, nagtultuloy a nagbiag tapno makitanat’ isusubli ni Jesus iti pannakabalin ti Pagarian. Kuna ni Juan a “babaen iti paltiing” isut’ naiyeg iti masanguanan “iti aldaw ti Apo.” Ania daytoy nga “aldaw”?

Ti naannad a panangadal kadagiti padto ti Biblia, agraman ti mismo a padto ni Jesus maipapan iti maudi nga al-aldaw, ipanayagna a “ti aldaw ti Apo” nangrugi idi 1914 a tawen a napateg iti historia, wen, iti las-ud daytoy a kaputotan! Gapuna idi 1914 nagsublin ni Jesus a di nakitkita, awan ti publiko a pannakaipanayagna ket dagiti laeng matalek nga adalanna ti makaammo iti isusublina. Iti dayta a tawen a binilin ni Jehova ni Jesus nga agturayen iti tengnga dagiti kabusorna!

Iti panagtulnogna iti bilin ni Amana, pinaksiat ni Jesus ni Satanas ken dagiti demoniona manipud langit, nga inggarangugongna ida ditoy daga. Kalpasan a nakitana a napasamak daytoy iti sirmata, nangngeg ni Juan ti nailangitan a timek a nangiwaragawag: “Ita immayen ti pannakaisalakan ken ti pannakabalin ken ti Pagarian ti Diostayo ken ti panagturay ti Kristona!” Wen, idi 1914 nangrugin ni Jesus nga agturay kas Ari!

Anian a nagsayaat a damag daytoy kadagiti agdaydayaw ken Jehova sadi langit! Naibilin kadakuada: “Agrag-okayo, dakayo a langlangit ken dakayo nga agnaed kadakuada!” Ngem aniat’ kasasaad dagidiay adda ditoy daga? “Asikayo pay daga ken baybay,” intultuloy ti timek manipud langit, “ta ti Diablo immulog kadakayo, nga adda dakkel a pungtotna, nga ammona a bassiten ti tiempona.”

Addatayon a mismo iti dayta bassit a tiempo. Agdaman a mapaglalasin ti tattao no sumrekda iti baro a lubong ti Dios wenno sagrapendat’ pannakadadael. Ti kinapudno ket, ti mismo a pagtungpalanyo agdaman a maikedkeddeng babaen iti wagas a panagtignayyo iti naimbag a damag ti Pagarian ti Dios a maikaskasaban iti intero a daga iti sidong ti panangiturong ni Kristo.

Inton malpasen a mapaglalasin ti tattao, agserbinton ni Jesus kas Ahente ti Dios tapno ikkatenna ditoy daga ti intero a sistema ti bambanag ni Satanas ken ti amin a mangsupsuporta iti dayta. Ikkatento ni Jesus ti amin a kinadakes iti gubat nga inawagan ti Biblia iti Har–​Magedon, wenno Armagedon. Kalpasanna, ni Jesus, ti katan-okan a Persona iti intero nga uniberso a sumaruno a mismo ken Jehova a Dios, tiliwennanton ni Satanas ken dagiti demoniona ket parautannanto ida iti las-ud ti sangaribo a tawen iti “abut a mangliwengliweng,” kayatna a sawen, arig-patay a kasasaad ti kinaawan-aramid. Aramid 7:55-60; 8:1-3; 9:1-19; 16:6-10; Salmo 110:1, 2; Hebreo 10:12, 13; 1 Pedro 3:22; Lucas 22:28-30; Colosas 1:13, 23; Apocalipsis 1:1, 10; 12:7-12; 16:14-16; 20:1-3; Mateo 24:14; 25:31-33.

▪ Kalpasan ti iyuuli ni Jesus sadi langit, sadinot’ nakailugaranna, ket aniat’ ur-urayenna?

▪ Siasinodat’ iturayan ni Jesus kalpasan ti iyuulina sadi langit, ket kasano a maiparangarang ti panagturayna?

▪ Kaano a nangrugi “ti aldaw ti Apo,” ket aniat’ napasamak iti rugina?

▪ Ania a trabaho a panamaglalasin ti maar-aramid itatta a personal a mangapektar ti tunggal maysa kadatayo, ket aniat’ pakaibasaran ti panamaglalasin?

▪ Inton malpas ti panamaglalasin a trabaho, aniadat’ sumaruno a mapasamak?