Kapitulo 21

Iti Sinagoga Idiay Ilin Jesus

AWAN duadua nga adda kinaragsak idiay Nasaret idi nagawid ni Jesus. Sakbay a napan nagpabautisar ken Juan nasursurok la bassit a makatawen sakbayna, ni Jesus naawagan kas maysa nga alluwagi. Ngem itan isut’ pagaammon a nasaknap a kas maysa a managaramid ti datdatlag. Dagiti agtataeng iti ili magagaranda a makakita kenkuana a mangaramid ti dadduma kadagitoy nakaskasdaaw nga ar-aramid iti tengngada.

Dumakkel ti panagseggada bayat a ni Jesus, sigun iti ugalina, mapan iti lokal a sinagoga. Bayat dagiti serbisio, isut’ agtakder tapno bumasa, ket ti lukot ti libro ni mammadto nga Isaias naiyawat kenkuana. Nasarakanna ti paset a mangibagbaga maipapan iti Daydiay pinulotan ti espiritu ni Jehova, a daytat’ Isa kapitulo 61 iti Bibliatayo itatta.

Kalpasan ti panangbasana no kasano nga Isut’ mangikaskasaba iti pannakawayawaya dagiti nakayawan, ti pannakakita dagiti bulsek, ken maipapan iti tawen a pakaay-aywan ni Jehova, inyawat ni Jesus ti linukot iti daydiay tumultulong sa nagtugaw. Amin a matmata nakaturongda kenkuana. Kalpasanna isut’ nagsao, a nalabit nabayag bassit nga inlawlawagna: “Ita nga aldaw daytoy a kasuratan a kangkangngegyo natungpalen.”

Nagsiddaaw dagiti tattao kadagiti “sao a natalunggadingan” ket kunada iti maysa ken maysa: “Saan aya nga isu daytoy ti anak ni Jose?” Ngem gapu ta pagaammoda a kayatda a makita ti panangaramidna ti datdatlag, intuloy ni Jesus: “Awan duadua a kunaenyonto kaniak daytoy a pangarigan, ‘Mangngagas, agasam man ta bagim met laeng; dagiti adu a nangngegmi a naaramid idiay Capernaum aramidem met ditoy ilim.’” Kaawatan, patien dagiti dati a kaarruba ni Jesus a ti panangagas rebbeng a mangrugi iti pagtaenganda, nga agpaay a pagimbagan dagiti kailianna nga umuna. Gapuna impagarupda a kasla tinagtagilag-an ni Jesus ida.

Gaput’ pannakailasinna ti panagpampanunotda, insalaysay ni Jesus ti maysa a maiyaplikar a historia. Nagadu dagiti balo idiay Israel idi kaaldawan ni Elias, kinunana, ngem saan a naibaon ni Elias iti asinoman kadakuada. Imbes ketdi, isut’ napan iti maysa a balo a saan nga Israelita idiay Sidon, a sadiay ti nangaramidanna iti makaispal-biag a milagro. Ket idi kaaldawan ni Eliseo, adu met dagiti agkukutel, ngem ni Eliseo dinalusanna laeng ni Naaman manipud Siria.

Gapu ta nakapungtotda kadagitoy di makaay-ayo a panangyasping iti historia a nangibutaktak iti kinaagum ken kinakurang ti pammatida, timmakder dagidiay adda iti sinagoga ket inyabugda ni Jesus iti ruar ti siudad. Sadiay, iti tapaw ti bantay a nakabangonan ti Nasaret, pinadpadasda nga itappuak koma. Ngem nakalapsut ni Jesus kadakuada ket nakatalaw a sitatalged. Lucas 4:16-30; 1 Ar-ari 17:8-16; 2 Ar-ari 5:8-14.

▪ Apay nga adda ti napalalo a panagragsak idiay Nasaret?

▪ Aniat’ pagarup dagiti tattao iti palawag ni Jesus, ngem aniat’ nakapagura kadakuada?

▪ Aniat’ pinadpadas nga aramiden dagiti tattao ken Jesus?