Kasla Di Agbalin nga Adalan
Kapitulo 45
Kasla Di Agbalin nga Adalan
ANIAN a nakabutbuteng a buya idi a ni Jesus bimmaddek iti igid ti baybay! Dua a karkarna ti kinarungsotna a lallaki ti rimmuar manipud iti arubayan a sementerio ket naggarasugasda a nagturong kenkuana. Isudat’ nagunggan ti sairo. Yantangay maysa kadakuada ti mabalin a narungrungsot ngem ti sabali ken nagsagaba iti nabaybayag iti sidong ti panangtengngel ti demonio, isut’ nakaiturongan ti atension.
Iti nakabaybayag a tiempo daytoy nakakaasi a lalaki ti agbibiag a lamolamo iti nagbabaetan dagiti tanem. Agtultuloy, iti aldaw ken rabii, agik-ikkis ken sugsugatenna ti bagina babaen kadagiti bato. Isut’ nakauy-uyong unay ta awan ti makaitured a lumabas iti dayta a dalan. Adu a panagregget ti naaramid a panangibaud kenkuana, ngem pekkaenna dagiti kawar ken tukkolenna dagiti landok nga ikkaten manipud sakana. Awan ti addaan pigsa a mangpaamo kenkuana.
Idi a ti lalaki umadani ken ni Jesus ket nagruknoy iti sakaananna, dagiti sairo a mangtengtengngel kenkuana ti namagikkis kenkuana: “Ania ti pakaibiangak kenka, Jesus, Anak ti Kangatuan a Dios? Dawatek kenka gapu iti Dios a dinak parigaten.”
“Pumanawka itoy a tao, espiritu a narugit,” intultuloy a kinuna ni Jesus. Ngem kalpasanna nagimtuod ni Jesus: “Ania ti naganmo?”
“Sangarbaanan ti naganko, ta adukami,” isut’ sungbatna. Pagragragsakan dagiti sairo ti pannakakita ti panagsagsagaba dagidiay pagungganda, a nalawag pagragsakanda a pagpupuniponan ida iti sitatakrut nga espiritu ti panagderraaw. Ngem idi naipasangoda ken ni Jesus, nagpakpakaasida a dina koma ida ibaon a mapan iti yuyeng. Makitatayo manen a ni Jesus addaan naindaklan a pannakabalin; nabalinanna a parmeken uray dagiti narungsot a sairo. Iparangarang met daytoy a dagiti sairo ket pagaammoda a ti pannakaigarangugongda iti yuyeng a kadua ti panguloda, a ni Satanas a Diablo, ket isunto ti dusa ti Dios kadakuada iti agangay.
Maysa a pangen ti agarup 2,000 a baboy ti agar-arab iti arubayan a bantay. Gapuna kuna dagiti sairo: “Ibaonnakami kadagiti baboy, tapno sumrekkami kadakuada.” Kaawatan a dagiti sairo ket maaddaanda iti maysa a kita ti di natural, nakarungrungsot a ragsak iti panangrautda iti bagbagi dagiti nainlasagan a parparsua. Idi pinalubosan ni Jesus ida a sumrek kadagiti baboy, amin dagiti 2,000 timpuakda iti maysa a teppang ket nalmesda idiay baybay.
Idi dagiti agtartaraken kadagiti baboy nakitada daytoy, naggarasugasda a nangipadamag iti dayta idiay siudad ken kadagiti il-ili. Iti dayta, rimmuar dagiti tattao a kumita no ania ti napasamak. Idi makagtengda, nakitada daydiay lalaki a rimmuaran dagiti sairo. Ay ket, sikakawes ken sinanakemen, nga agtugtugaw iti sakaanan ni Jesus!
Dagiti nakaimatang saritaenda no kasano ti pannakapaimbag daydiay lalaki. Imbagada met kadagiti tattao maipapan ti nakaal-alingget nga ipapatay dagiti baboy. Idi nangngegan dagiti tattao daytoy, immapay ti dakkel a butengda, ket nagpakpakaasida ken ni Jesus a pumanaw manipud teritoriada. Gapuna nagtulnog iti dayta ket limmugan iti barangay. Daydiay dati a nagunggan ti sairo nagpakpakaasi ken ni Jesus a palubosanna koma nga isu ti kumuyog kenkuana. Ngem kinuna ni Jesus kenkuana: “Agawidka idiay balaymo kadagidiay kakabagiam, ket ipadamagmo kadakuada amin dagiti bambanag a naaramidan ni Jehova kenka ken ti asina kenka.”
Iti gagangay balbalakadan ni Jesus dagidiay a pinaimbagna a dida koma ibagbaga dayta iti asinoman, ta dina kayat a dagiti tattao magtengandat’ konklusion gapu laeng kadagiti nakakigkigtot a damdamag. Ngem daytoy naisalsalumina a banag ti maiyanatup agsipud ta ti dati a nagunggan ti sairo ket mangaskasabanto kadagiti tattao a nalabit iti daytoy a kanito ket awanan ni Jesus ti gundaway a mangdanon kadakuada. Mainayon pay, ti kaadda daydiay a lalaki mangtedto ti kanayonan a pammaneknek maipapan iti pannakabalin ni Jesus nga agaramid iti naimbag, a mangsumbra iti aniaman a di makaay-ayo a damag a mabalin nga agrakurak gapu iti pannakapukaw dagiti baboy.
Iti panangsalimetmetna iti bilin ni Jesus, ti dati a nagunggan ti sairo pimmanaw. Rinugianna ti nagiwaragawag iti intero a Decapolis amin dagiti bambanag nga inaramid ni Jesus kenkuana, ket dagiti tattao nagsiddaawda. Mateo 8:28-34; Marcos 5:1-20; Lucas 8:26-39; Apocalipsis 20:1-3.
▪ Apay, nalabit, a naisentro ti atension iti maysa a nagunggan ti sairo idinto ta duada nga adda?
▪ Aniat’ mangipakita a dagiti sairo ammoda ti masanguanan a pannakaigarangugongda iti yuyeng?
▪ Apay, a nalawag, a pagay-ayo dagiti sairo ti lumugan kadagiti tattao ken an-animal?
▪ Apay a nangaramid ni Jesus iti pannakaisalumina ti dati a nagunggan ti sairo, nga isut’ binilinna a mangibaga kadagiti dadduma iti naaramidanna kenkuana?