Kapitulo 16

Kinaregta iti Panagdayaw ken Jehova

DAGITI kakabsat a lallaki ni Jesus iti ina​—dadduma nga annak ni Maria​—isu da Santiago, Jose, Simon, ken Judas. Sakbay a nagdaliasatda amin a kadua ni Jesus ken dagiti adalanna nga agpa-Capernaum, siudad nga asideg ti Baybay ti Galilea, nalabit dimmagasda idiay pagtaenganda a Nasaret tapno maitugot ti pamilia ti bambanag a kasapulanda.

Ngem apay nga agpa-Capernaum ni Jesus imbes nga aramidennat’ ministeriona idiay Cana, sadi Nasaret, wenno iti dadduma a lugar iti katurodan ti Galilea? Ngamin ta, nalatlatak ti pannakailugar ti Capernaum ken daytat’ dakdakkel a siudad. Kasta met, kaaduan kadagiti kabbaro nga adalan ni Jesus agnaedda idiay wenno iti asideg ti Capernaum, isu a didanto kasapulanen a panawan dagiti pagtaenganda tapno umawat iti pannakasanay manipud kenkuana.

Idi adda idiay Capernaum, nagaramid ni Jesus kadagiti datdatlag, kas paneknekanna a mismo sumagmamano a bulan kalpasanna. Ngem di nagbayag ni Jesus ken dagiti kakaduana agdaldaliasatda manen. Daytat’ primavera, ket agturongda idiay Jerusalem tapno atenderan ti Paskua iti 30 K.P. Bayat ti kaaddada sadiay, adda nakita dagiti adalan maipapan ken Jesus a nalabit dida pay nakitkita idi.

Sigun iti Linteg ti Dios, makalikaguman dagiti Israelita nga agdaton iti an-animal. Gapuna, tapno dida marigatan, dagiti negosiante idiay Jerusalem aglakodat’ an-animal wenno tumatayab para iti daytoy a panggep. Ngem aglaklakoda a mismo iti uneg ti templo, ken kuskusitenda ti tattao babaen ti panagsingirda iti nakangingngina.

Gaput’ pungtotna, nangaramid ni Jesus iti pagbaot a taltali ket pinaruarna dagiti aglaklako. Impurruakna ti pirak dagiti agsuksukat ti pirak ket tinuangna dagiti lamisaanda. “Ikkatenyo ditoy dagitoy!” impukkawna kadagidiay aglaklakot’ kalapati. “Dikay aramiden ti balay ni Amak a balay a pagtagtagilakuan!”

Idi nakita daytoy dagiti adalan ni Jesus, nalagipdat’ naipadto maipapan iti Anak ti Dios: “Ti ganetget iti balaymo alun-onennakto.” Ngem inyimtuod dagiti Judio: “Ania a pagilasinan ti ipakitam kadakami, idinto nga aramidem dagitoy?” Simmungbat ni Jesus: “Rebbaenyo daytoy a templo, ket iti uneg ti tallo nga aldaw bangonekto.”

Impagarup dagiti Judio a tuktukoyen ni Jesus ti literal a templo, isu nga inyimtuodda: “Uppatapulo ket innem a tawen ti pannakabangon daytoy a templo, ket sika bangonemto iti tallo nga aldaw?” Nupay kasta, tuktukoyen ni Jesus ti templo ti bagina. Ket tallo a tawen kalpasanna, nalagip dagiti adalanna daytoy a sasao idi isut’ napagungar kadagiti natay. Juan 2:12-22; Mateo 13:55; Lucas 4:23.

▪ Kalpasan ti paboda sadi Cana, aniada a lugar ti nagdaliasatan ni Jesus?

▪ Apay a nakapungtot ni Jesus, ket aniat’ inaramidna?

▪ Aniat’ malagip dagiti adalan ni Jesus idi makitadat’ inaramidna?

▪ Aniat’ kuna ni Jesus maipapan iti “daytoy a templo,” ket aniat’ tuktukoyenna?