Kapitulo 8

Linibasanda ti Diktador

RINIING ni Jose ni Maria ta adda dakes a damag. Kalkalpas a nagparang ti anghel ni Jehova kenkuana, a kunana: “Bumangonka, alaem ti ubing ken ti inana ket agkamangka idiay Egipto, ket aggianka sadiay agingga nga awaganka; ta ni Herodes dandaninan pabiruk ti ubing tapno pukawenna.”

Sidadaras dagiti tallo a naglibas. Ket apag-isu unay ta nadamag ni Herodes nga inuyongan dagidi astrologo ket pimmanawdan iti pagilian. No malagipyo, naibilin kadakuada nga agsublida inton mabirukanda ni Jesus. Nakapungtot ni Herodes. Tapno mapapatayna ni Jesus, imbilinna a papatayenda amin nga ubbing a lallaki idiay Betlehem ken kadagiti distritona nga agedad iti dua ken agpababa. Imbasarna ti panagkuentana iti edadda sigun iti impormasion a dati a naalana kadagidi astrologo a naggaput’ Daya.

Nakaal-alingget a makita ti pannakaikisap dagiti ubbing a lallaki! Sinerrek dagiti soldado ni Herodes ti kada balay. Ket no adda masarakanda nga ubing a lalaki, rinabsutda manipud iti saklot ni inada. Ditay ammo no mano nga ubbing ti natay, ngem ti napalalo a panagsangit ken panagdung-aw dagiti inna kaitungpalan ti naipadto iti Biblia sigun ken Jeremias a propeta ti Dios.

Kabayatanna, sikakaradkad a dimmanon da Jose ken ti pamiliana sadi Egipto, ket nagnaeddan sadiay. Ngem iti maysa a rabii nagparang manen ti anghel ni Jehova ken Jose babaen iti tagtagainep. “Bumangonka, alaem ti ubing ken ti inana,” kuna ti anghel, “ket inka iti daga ti Israel, ta dagiti mangsapsapul iti kararua ti ubing nataydan.” Isu a kas kaitungpalan ti sabali a padto ti Biblia a kunaenna a ti Anak ti Dios maayabanto manipud Egipto, nagsubli ti pamilia idiay ilida.

Masinunuo a ranta ni Jose ti agnaed idiay Judea, ta agnanaedda idi idiay Betlehem sakbay ti ikakamangdat’ Egipto. Ngem nadamagna a ni Arquelao a nauyong nga anak ni Herodes isun ti ari ti Judea, ket iti sabali pay a tagtagainep isut’ pinakdaaran ni Jehova iti dayta a peggad. Isu a nagpa-amianan da Jose ken ti pamiliana ket nagnaedda idiay Nasaret ti Galilea. Iti daytoy nga ili, nga adayo iti sentro ti relihiuso a kabibiag dagiti Judio, ti dimmaklan ni Jesus. Mateo 2:13-23; Jeremias 31:15; Oseas 11:1.

▪ Idi saan a nagsubli dagiti astrologo, aniat’ nakas-ang nga inaramid ni Herodes, ngem kasano a nasalakniban ni Jesus?

▪ Idi naggapudat’ Egipto, apay a saanen a nagnaed da Jose idiay Betlehem?

▪ Aniada a padtot’ Biblia ti natungpal iti dayta a tiempo?