Kapitulo 20

Maikadua a Milagro Idiay Cana

IDI nagsubli ni Jesus idiay ilida kalpasan ti nabayag a panangaskasaba a kampania idiay Judea, isut’ saan a tapno aginana. Imbes ketdi, rinugianna ti dakdakkel pay a ministerio idiay Galilea, ti daga a dinakkelanna. Ngem dagiti adalanna, imbes a makipagianda kenkuana nagsublida kadagiti pampamiliada ken kadagiti dati a panggedanda.

Ania a mensahe ti rinugian nga inkaskasaba ni Jesus? Daytoy: “Ti pagarian ti Dios asidegen. Agbabawikayo, ket mamatikayo iti naimbag a damag.” Ket ti sungbatda? Inawat dagiti taga Galilea ni Jesus. Isut’ indaydayaw dagiti isuamin. Nupay kasta, daytoy ket saan a nangnangruna a gapu iti mensahena, no di ket, gapu ta adu kadakuada ti adda idiay Jerusalem idi Paskua sumagmamano a bulan sakbayna ket nakitada dagiti nakaskasdaaw a pagilasinan nga inaramidna.

Kaawatan a rinugian ni Jesus ti naindaklan a ministeriona iti Galilea idiay Cana. Iti nasapsapa, nalabit malagipyo pay, idi nagsubli manipud Judea, pinagbalinna ti danum nga arak iti maysa a pagbodaan sadiay. Iti daytoy maikadua nga okasion, masakit unay ti anak ti maysa nga opisial ti gobierno ni Ari Herodes Antipas. Idi nangngegna a ni Jesus ti immay idiay Cana manipud Judea, nagdaliasat ti opisial manipud iti pagtaenganna idiay Capernaum tapno sapulennan Jesus. Iti ladingitna, indawat ti lalaki: ‘Pangngaasim umayka daras, sakbay a matay ti anakko.’

Simmungbat ni Jesus: ‘Agawidkan. Ti anakmo naimbaganen!’ Namati ti opisial ni Herodes ket nangrugin nga agsubli iti adayo a pagtaenganna. Idiay dalan isut’ sinabat dagiti adipenna, a nagdardaras a nangibaga kenkuana nga amin ket nasayaaten​—ti anakna naimbaganen! ‘Kaano nga immimbag?’ inimtuodna.

‘Idi kalman iti ala 1:00 t.m.,’ insungbatda.

Naawatan ti opisial a daytoy daydiay mismo a panagkuna ni Jesus, ‘Ti anakmo naimbaganen!’ Kalpasan dayta, ti lalaki ken ti intero a sangakabbalayanna nagbalinda nga ad-adalan ni Kristo.

Ngarud ti Cana naparaburan kas ti lugar a sadiay, kas mangipamatmat iti isusublina manipud Judea, namindua a nangaramid ni Jesus kadagiti milagro. Dagitoy, siempre, saan nga isuda laeng dagiti milagro nga inaramidna agingga itoy a kanito, ngem napategda agsipud ta tinandaanda ti panagsublina idiay Galilea.

Itan agturongen ni Jesus idiay Nasaret. Aniat’ agur-uray kenkuana sadiay? Juan 4:43-54; Marcos 1:14, 15; Lucas 4:14, 15.

▪ Idi nagsublin Jesus idiay Galilea, aniat’ napasamak kadagiti adalanna, ket kasanot’ panangawat dagiti tattao kenkuana?

▪ Ania a milagro ti inaramid ni Jesus, ket kasanot’ panangapektarna kadagidiay nairaman?

▪ Kasano ngarud a ti Cana ket pinaraburan ni Jesus?