Kapitulo 4

Masikog Ngem Di Kasado

TALLO a bulanen ti sikog ni Maria. Malagipyo pay a binusbosnat’ nasapa a paset ti panagsikogna iti isasarungkar ken ni Elisabet, ngem ita isut’ nakaawiden idiay Nasaret. Di agbayag ti kasasaadna maammuanton ti publiko idiay ilida. Pudno, nga isu, adda iti narikut a kasasaad!

Ti mangpakaro iti kasasaad a ta ni Maria naitulagen nga agbalin nga asawa ni Jose nga alluwagi. Ket ammona nga, iti sidong ti linteg ti Dios iti Israel, ti babai a naitulagen iti maysa a lalaki ngem situtulok a naaddaan iti seksual a pannakidenna iti sabali a lalaki ket maubor agingga ken patay. Kasano a mailawlawagna ken Jose ti panagsikogna?

Yantangay pimmanaw ni Maria iti tallo a bulan, masigurotayo a magagaran ni Jose a makakita kenkuana. Idi nagsarakda, awan duadua nga imbutaktak ni Maria ti damag kenkuana. Aramidenna ti inggat’ kabaelanna a mangilawlawag a ti panagsikogna ket babaen iti nasantuan nga espiritu ti Dios. Ngem, kas maipagarupyo, narigat a patien ni Jose daytoy a banag.

Ammo ni Jose ti nasayaat a pakasarsaritaan ni Maria. Ket awan duadua nga isut’ inay-ayatna unay. Kaskasdi, agpapan pay iti aniaman a kunaenna, agparang a kasla isut’ nagsikog gapu iti maysa a lalaki. Uray no kasta, di kayat ni Jose nga isut’ maubor ken patay wenno isut’ maibabain iti publiko. Gapuna naikeddengna nga isina a sililimed. Kadagidiay nga al-aldaw, ti tattao a nagtulagen nga agkasar mamatmatandan nga agassawa, ket kasapulan ti maysa a diborsio a mamagpatingga iti kasta a panagtulag.

Kamaudiananna, bayat nga us-usigen pay laeng ni Jose dagitoy a bambanag, isut’ nakaturog. Ti anghel ni Jehova nagparang kenkuana iti maysa a tagtagainep ket kunana: “Dika agbuteng a mangiyawid ken ni Maria nga asawam, ta ti nabukel kenkuana aramid ti nasantuan nga espiritu. Ket aganakto iti maysa a lalaki, ket panaganamto iti Jesus, ta isalakannanto ti ilina kadagiti basbasolda.”

Idi makariingen ni Jose, anian ti panagyamanna! Dagdagus nga inaramidna kas ti imbilin ti anghel kenkuana. Inyawidna ni Maria idiay balayna. Daytoy a publiko a tignay ti nagserbi, iti kinapudnona, kas seremonia ti kasar, a mangipakaammo a ni Jose ken ni Maria opisialen nga agassawada. Ngem ni Jose di nakidenna ken ni Maria bayat iti panagsikogna ken Jesus.

Adtoy! ni Maria ket masikog, kaskasdi ni Jose ti mangisaksakay kenkuana iti maysa nga asno. Sadino ti papananda, ken apay nga agdaliasatda idinto a ni Maria ket ngangnganin agpasngay? Lucas 1:39-41, 56; Mateo 1:18-25; Deuteronomio 22:23, 24.

▪ Aniat’ adda iti panunot ni Jose idi naammuanna ti panagsikog ni Maria, ken apay?

▪ Kasano a ni Jose maisinana ni Maria idinto a dida pay met nagkasar?

▪ Ania a publiko a tignay ti nagserbi kas seremonia ti panagkasar da Jose ken Maria?