Kapitulo 53

Matarigagayan a Nabilbileg Ngem Tao nga Agturay

IDI simimilagro a pinakan ni Jesus dagiti rinibo, nasdaaw ti tattao. “Kinapudnona a daytoy ti mammadto nga umay ditoy lubong,” kunada. Nagkonklusionda a ni Jesus saan laeng a dayta mammadto a dakdakkel ngem ni Moises no di ket maysa met a matarigagayan unay nga agturay. Gapuna implanoda ti panangalada kenkuana ket pagbalinenda nga ari.

Nupay kasta, ni Jesus, naawatanna ti palplanuen dagiti tattao. Gapuna, dagdagus a nagtignay tapno liklikanna ti panangpilitda kenkuana. Pinapanawna ti bunggoy ket pinilitna dagiti adalanna a lumugan kadagiti barangayda ket bumallasiwda nga agturong idiay Capernaum. Idin isut’ napan iti bantay tapno agkararag. Iti dayta a rabii nagmaymaysa sadiay ni Jesus.

Sakbay la unay ti panagbannawagna timmannawag ni Jesus manipud iti nangato nga ayanna ket napaliiwna dagiti dadakkel nga allon gapu iti napigsa nga angin. Iti lawag ti ngangnganin kabus a bulan, ta asidegen ti Paskua, makita ni Jesus ti barangay nga ikagkagumaan a gagaodan dagiti adalanna a maibusor iti allon. Nakabilbileg ti panaggaod dagiti lallaki.

Idi nakitana daytoy, bimmaba ni Jesus manipud iti bantay ket nagna a napan iti barangay a bimmallasiw kadagiti allon. Nakaadayon ti barangay iti agarup tallo wenno uppat a milias idi nakagteng ni Jesus iti dayta. Nupay kasta, intuloyna ti nagna a kasla lumabas kadakuada. Idi isut’ nakita dagiti adalan, nagikkisda: “Al-alia daytoy!”

Simmungbat ni Jesus a buyogen ti panangliwliwa: “Siak; dikay agbuteng.”

Ngem kinuna ni Pedro: “Apo, no sika ngarud, ibilinmo nga umayak kenka a magna iti rabaw dagiti danum.”

“Umayka!” simmungbat ni Jesus.

Ket, dimsaag ni Pedro idi barangay, ket nagna iti rabaw dagiti danum a mapan ken Jesus. Ngem idi nakitana ti angin, nagbuteng ni Pedro, ket idi mangrugi a lumned, nagikkis a kunana: “Apo, isalakannak!”

Dagdagus nga inyunnatna ti imana, isut’ iniggaman ni Jesus, ket kinunana kenkuana: “O sika a bassit ti pammatina, apay-apay nagduaduaka?”

Idi nakasublin da Jesus ken ni Pedro iti barangay, nagtalna ti angin, ket nagsiddaaw dagiti adalan. Ngem masapul kadi nga agsiddaawda? No naawatanda “ti kaipapanan dagiti tinapay” babaen iti panangapresiarda kadagiti dadakkel a milagro nga inaramid ni Jesus sumagmamano laeng nga oras sakbayna idi pinakanna dagiti rinibo babaen laeng iti lima a tinapay ken dua a babassit nga ikan, ngarud saan a nakaskasdaaw a mabalinanna ti magna iti rabaw ti danum ken mapagtalnana ti angin. Itan, nupay kasta, dagiti adalanna nagdaydayawda ken Jesus ket kinunada: “Kinapudnona a sika ti Anak ti Dios.”

Di nagbayag, nakagtengda idiay Genezaret, maysa a napintas, nabunga a tanap iti asideg ti Capernaum. Sadiay insadsadda ti barangayda. Ngem idi timmakdangda iti igid, nabigbig dagiti tattao ni Jesus ket napanda kadagiti aglawlaw iti ili, a nangsapul kadagiti masaksakit. Idi dagitoy ti naiyeg kadagiti pagiddaanda ket masagidda laeng ti pingir ti kagay ni Jesus, napaimbagda a naan-anay.

Kabayatanna, ti bunggoy a nakaimatang iti simimilagro a panangpakanna kadagiti rinibo naammuanda a pimmanawen ni Jesus. Gapuna idi simmangpet dagiti babassit a barangay manipud Tiberias, nagluganda kadagitoy ket naglayagda a napan idiay Capernaum tapno sapulenda ni Jesus. Idi isut’ nasarakanda, inimtuodda: “Mannursuro, kaano ti idadatengmo ditoy?” Ni Jesus binabalawna ida, kas iti intayto makita. Juan 6:14-25; Mateo 14:22-36; Marcos 6:45-56.

▪ Kalpasan ti panangpakan ni Jesus a simimilagro kadagiti rinibo, ania ti kayat nga aramiden ti tattao kenkuana?

▪ Aniat’ nakita ni Jesus manipud iti bantay isu a nagpaknianna, ket ania ti inaramidna idin?

▪ Apay a saan koma a masapul a masdaaw dagiti adalan kadagitoy a bambanag?

▪ Ania ti napasamak kalpasan ti pannakagtengda iti igid ti baybay?