Kapitulo 131

Maudi a Panagparang, ken Pentecostes iti 33 K.P.

INYURNOS ni Jesus a makipagkita amin kenkuana dagiti 11 nga apostolna idiay bantay ti Galilea. Kaawatan a naibaga met dayta kadagiti dadduma nga adalan, ket nasurok a 500 a tattao ti nagtataripnong. Anian a nagragsak a kumbension daytoy idi nagparang ni Jesus ket inrugina nga insuro ida!

Kadagiti dadduma nga inaramidna, inlawlawag ni Jesus iti dakkel a bunggoy a ti Dios intedna kenkuana amin a pannakabalin sadi langit ken iti daga. “Inkayo ngarud,” imbilinna, “ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada ti amin a bambanag nga imbilinko kadakayo.”

Agasenyo dayta! Lallaki, babbai, ken ub-ubbing inawatda amin daytoy pareho a bilin a pannakiraman iti panangaramid-adalan a trabaho. Dagiti bumusbusor padpadasenda a pasardengen ti panangaskasaba ken panangisursuroda, ngem liniwliwa ida ni Jesus: “Adtoy! addaakto kadakayo iti agnanayon agingga iti panungpalan ti sistema ti bambanag.” Nagtalinaed ni Jesus kadagiti adalanna babaen ti nasantuan nga espiritu, tapno tulonganna ida a mangitungpal iti ministerioda.

Kas pakagupgopan, nagpakita ni Jesus kadagiti adalanna iti las-ud ti 40 nga aldaw kalpasan ti panagungarna. Bayat dagitoy a panagparang insurona ida maipapan ti Pagarian ti Dios, ket impaganetgetna dagiti responsabilidadda kas ad-adalanna. Iti maysa nga okasion nagpakita pay ken Santiago a kabsatna iti ina ket kinumbinsirna daytoy dati a di manamati nga Isu a talaga ti Kristo.

Idi adda pay laeng dagiti apostol sadi Galilea, kaawatan nga imbilin ni Jesus nga agsublida idiay Jerusalem. Idi nakipagkita kadakuada sadiay, kunana kadakuada: “Dikay pumampanaw iti Jerusalem, no di ket itultuloyyo nga urayen ti inkari ti Ama, a nangngegyo kaniak; ta ni Juan, kinapudnona, nangbautisar iti danum, ngem dakayo mabautisarankayto iti nasantuan nga espiritu saan nga adu nga aldaw manipud ita.”

Kalpasanna nakipagkita manen ni Jesus kadagiti apostolna ket inruarna ida iti siudad inggat’ Betania, a masarakan iti makindaya a bakras ti Bantay dagiti Olibo. Nakaskasdaaw, agpapan pay amin a naibaganan maipapan ti mabiiten a panagpalangitna, mamatida pay laeng a ti Pagarianna maipasdekto ditoy daga. Isu nga inyimtuodda: “Apo, ita kadin ti panangisublim ti pagarian ti Israel?”

Imbes a pinadpadasna manen a korehiren ti biddut a pannakaawatda, basta insungbat ni Jesus: “Saan a naited kadakayo ti panangammo kadagiti aldaw wenno tiempo nga intalimeng ni Ama iti pannakabalinna a bukbukod.” Sa, iti panangipaganetgetna manen iti trabaho a rebbeng nga aramidenda, kunana: “Umawatkayto iti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.”

Bayat a kumitkitada pay laeng, nangrugi nga umulin ni Jesus sadi langit, ket idin nalingdan iti ulep iti imatangda. Kalpasan ti panangsukatna ti nainlasagan a bagina, nagpalangiten a kas espiritu a persona. Bayat nga agtultuloy a tumangtangad dagiti 11, nagparang iti dennada ti 2 a lallaki a nagkawes iti puraw. Insaludsod dagitoy nagmaterial nga anghel: “Lallaki iti Galilea, apay-apay a tumangtangadkayo iti langit? Daytoy a Jesus a naiyuli sadi langit manipud kadakayo umayto iti kasta met laeng a wagas a pannakakitayo nga ipapanna sadi langit.”

Ti wagas nga ipapanaw ni Jesus iti daga ket awanan publiko a pannakaipanayag ket dagiti laeng matalek nga adalanna ti nakakita. Gapuna agsublinto iti umas-asping a wagas​—awanan publiko a pannakaipanayag ket dagiti laeng matalek a pasurotna ti makaawat nga isut’ nagsublin ken inruginan ti kaaddana iti pannakabalin ti Pagarianna.

Bumabbaban dagiti apostol iti Bantay dagiti Olibo, binallasiwda ti Ginget ti Cedron, ket simrekda manen iti Jerusalem. Nagtalinaedda sadiay kas panagtulnog iti bilin ni Jesus. Sangapulo nga aldaw kalpasanna, iti Piesta dagiti Judio idi Pentecostes iti 33 K.P., bayat a nagtataripnong ti agarup 120 kadagiti adalan idiay makingngato a siled ti Jerusalem, maysa a daranudor kas iti panagpuyupoy iti napigsa nga angin ti nangpunno iti intero a balay. Nagparang ti dildila a kas ti apuy, ket nagdisso iti tunggal maysa kadakuada, ket dagiti adalan nakapagsaoda amin iti nadumaduma a pagsasao. Daytoy ti pannakaibukbok ti nasantuan nga espiritu nga inkari ni Jesus! Mateo 28:16-20; Lucas 24:49-52; 1 Corinto 15:5-7; Aramid 1:3-15; 2:1-4.

▪ Siasinot’ nangtedan ni Jesus kadagiti pammakada a bilin iti maysa a bantay sadi Galilea, ket ania dagitoy a bilin?

▪ Ania a liwliwa ti impaay ni Jesus kadagiti adalanna, ket kasanot’ panagtalinaednanto kadakuada?

▪ Kasano kabayag kalpasan ti panagungarna a nagparang ni Jesus kadagiti adalanna, ket aniat’ insurona kadakuada?

▪ Iti siasino a kaawatan a saan pay nga adalan sakbay ti ipapatay ni Jesus ti nagparangan ni Jesus?

▪ Aniat’ dua a maudi a panagtataripnong da Jesus ken dagiti apostolna, ket aniat’ napasamak kadagitoy nga okasion?

▪ Kasano nga agsubli ni Jesus iti isu met laeng a wagas kas iti ipapanawna?

▪ Aniat’ napasamak idi Pentecostes iti 33 K.P.?