Kapitulo 41

Maysa a Sentro ti Panagsusuppiat

DI NAGBAYAG kalpasan ti pannakasangailina idiay balay ni Simon, rinugian ni Jesus ti maikadua a panagbaniagana a nangaskasaba idiay Galilea. Iti napalabas a panagbaniagana iti teritoria, isut’ kinuyog dagiti immuna nga adalanna, da Pedro, Andres, Santiago, ken ni Juan. Ngem itan dagiti 12 nga apostolesna, agraman sumagmamano a babbai, kimmuyogda kenkuana. Dagitoy inramanna ni Maria Magdalena, Susanna, ken ni Joanna, a ni lakayna ket maysa nga opisial ni Ari Herodes.

Bayat a pumarpartak ti ministerio ni Jesus, kasta met ti suppiat maipapan iti aramidna. Maysa a lalaki a naluganan ti sairo, a maysa met a bulsek ken umel, ti naiyeg ken ni Jesus. Idi isut’ inagasan ni Jesus, tapno mawayawayaan manipud iti panangituray ti sairo, ken isut’ agpadpada a makapagsao ken makakitan, maragsakan unay dagiti tattao. Rinugianda a kinuna: “Mabalin ngata nga isu daytoy ti Anak ni David?”

Ket naguurnong dagiti adu unay a tattao iti aglawlaw ti balay a paggigianan ni Jesus ta isut’ di pay makapanganen agraman dagiti adalanna. Mainayon kadagidiay sipapanunot a nalabit isut’ naikari nga “Anak ni David,” addada pay dagiti eskribas ken Fariseo a naggapu manipud Jerusalem tapno isut’ padaksenda. Idi nangngeg dagiti kabagyan ni Jesus ti riribuk maipapan ken ni Jesus, immayda tapno isut’ tiliwenda. Agpaay iti ania a rason?

Bueno, uray dagiti mismo a kakabsat ni Jesus dida pay mamati idi nga isu ti Anak ti Dios. Kasta met, ti pannakagulo ti publiko a pinartuatna ket interamente a di kababalin ni Jesus a naam-ammoda bayat ti idadakkelna idiay Nasaret. Gapuna, impatoda nga adda ti pannakadadael ti isip ni Jesus. “Napukawna ti nakemna,” impatoda, ket kayatda idi a tiliwen ken iyadayo.

Kaskasdi nalawag ti ebidensia a pinaimbag ni Jesus ti tao a nagunggan ti sairo. Ammo dagiti eskribas ken Fariseo a dida mailibak ti kinapudno daytoy. Gapuna tapno padaksenda ni Jesus kunada kadagiti tattao: “Adda kenkuana ni Beelzebub, ket gapu iti prinsipe dagiti sairo, mamaruar kadagiti sairo.”

Agsipud ta pagaammona ti pampanunotda, inawagan ni Jesus dagiti eskribas ken Fariseo ket kinunana: “Amin a pagarian a mabingaybingay a maibusor met laeng kenkuana marbek, ket isuamin nga ili wenno balay a malasinlasin iti maibusor met laeng kenkuana dinto mataginayon. Kasta met laeng, no ni Satanas paruarenna ni Satanas, malasinlasin a maibusor met laeng kenkuana; kasano, ngarud, ti pannakataginayonto ti pagarianna?”

Anian a makadadael a lohika! Yantangay kinuna dagiti Fariseo a dagiti tattao manipud iti tengngada nangparparuarda kadagiti sairo, insaludsod pay met ni Jesus: “Ket no siak gapu ken Beelzebub paruarek dagiti sairo, asino ti makin-pannakabalin ti panamaruar dagiti annakyo kadagiti sairo?” Iti sabali a pannao, ti pammabasolda ken ni Jesus rebbeng met a maiyaplikar kadakuada a kas kenkuana. Kalpasanna namakdaar ni Jesus: “Ngem no gapu iti espiritu ti Dios paruarek dagiti sairo, pudno a dimtengen kadakayo ti pagarian ti Dios.”

Tapno maiyilustrar a ti panangparuarna kadagiti sairo ket pammanek ti pannakabalinna ken ni Satanas, kuna ni Jesus: “Kasano ti pannakabalin ti maysa a sumrek iti balay ti maingel ken mangrabsut kadagiti gargaretna no dina umuna a reppeten ti maingel? Ket kalpasanna ikisapnanto iti balayna. Ti saan a makikadua kaniak isu ti bumusor kaniak, ket ti saan a makipagurnong kaniak agiwara.” Nalawag a dagiti Fariseo bumusbusorda ken ni Jesus, nga impamatmatda ti bagbagida nga isuda dagiti ahente ni Satanas. Isuda ti agiwarwara kadagiti Israelitas nga umadayo kenkuana.

Gapuna, pinakdaaran ni Jesus dagitoy a sataniko a bumusbusor a “ti panagtabbaaw a maibusor iti espiritu saanto a mapakawan.” Inlawlawagna: “Ket uray siasino nga agsao iti maibusor iti Anak ti tao, mapakawanto kenkuana; ngem uray siasino nga agsaonto ti maibusor iti nasantuan nga espiritu saanto a mapakawan kenkuana, uray itoy a sistema ti bambanag, uray iti daydiay mapasungad.” Dagidiay nga eskribas ken Fariseo nakaaramiddat’ di mapakawan a basol babaen ti simamalisiuso a panangipabiangda ken ni Satanas iti nakabatbatad a namilagruan a panagtignay ti nasantuan nga espiritu ti Dios. Mateo 12:22-32; Marcos 3:19-30; Juan 7:5.

▪ Kasano a ti maikadua a panagbaniaga ni Jesus idiay Galilea naiduma manipud iti damo?

▪ Apay a dagiti kakabagyan ni Jesus ti nangpadpadas a mangtengngel kenkuana?

▪ Kasanot’ panangpadpadas dagiti Fariseo a mangpadakes kadagiti milagro ni Jesus, ken kasanot’ panangsungbat ni Jesus kadakuada?

▪ Aniat’ basol dagidiay Fariseo, ken apay?