Kapitulo 89

Mision iti Asi a Mapan iti Judea

SUMAGMAMANO a lawas sakbayna, bayat ti Piesta iti Dedikasion idiay Jerusalem, pinadpadas dagiti Judio a papatayen ni Jesus. Gapuna isut’ nagdaliasat a nagpaamianan, a nalawag a napan iti maysa a lugar a saan nga adayo manipud iti Baybay ti Galilea.

Nabiit pay, isut’ nagpaabagatan manen a nagturong iti Jerusalem, a nangaskasaba iti dalan kadagiti barbario iti Perea, maysa a distrito iti daya ti Karayan Jordan. Kalpasan nga insalaysayna ti pangngarig maipapan iti tao a nabaknang ken ni Lazaro, ituloynat’ mangisuro kadagiti adalanna maipapan kadagiti bambanag nga insurona iti nasaksakbay pay idiay Galilea.

Kas pangarigan, kunana a nasaysayaat koma para iti maysa a tao a “maibattoon iti tengngedna ti maysa a bato a gilingan ket maitappuak iti baybay” ngem ti mangitibkol iti maysa kadagitoy a “babassit nga ubbing” ti Dios. Impaganetgetna met ti pannakasapul iti panangpakawan, nga inlawlawagna: “Ket no [ti kabsatmo] mamimpito iti inaldaw a makabasol kenka ket mamimpito iti inaldaw nga umay kenka, a kunkunana, ‘Agbabawiak,’ pakawanem.”

Idi kinalikaguman dagiti adalan, “Nayonam ti pammatimi,” simmungbat ni Jesus: “No adda koma pammatiyo a kas iti bukel ti mostaza, kunaenyo koma itoy sikomoro, ‘Maparutka ken maimulaka iti baybay!’ ket pagtulnogannakayonto.” Gapuna uray pay ti bassit a pammati makaibanag kadagiti dadakkel a bambanag.

Sumaganad, insalaysay ni Jesus ti kasasaad a pudno a pasamak iti biag a mangiyilustrar iti umiso a kababalin ti maysa nga adipen ti mannakabalin-amin a Dios. “Asino kadakayo ti adda maysa nga adipenna nga agarado wenno agpaarab,” kuna ni Jesus, “nga inton agsubli manipud iti talon ket kunaennanto kenkuana, ‘Sumrekka a dagus, ket sumangoka iti panganan’? Imbes ketdi, dina kadi kunaen pay kenkuana nga umuna, ‘Isaganaannak ti pangrabiik, ket agserbika kaniak agingga a makapanganak ken makainumak, ket kalpasanna mangankanto ken uminumkanto’? Agyaman aya iti daydiay adipen gapu ta inaramidna ti naibilin kenkuana? Kastakay met, inton naaramidyo ti isuamin a naibilin kadakayo, kunayo, ‘Ad-adipenkami nga awan ti kapapaayanna. Ta inaramidmi laeng ti rebbengmi nga aramiden.’” Gapuna, dagiti ad-adipen ti Dios saanda koma a pulos a marikna a mangipapaayda iti pabor iti Dios babaen ti panagserbida kenkuana. Imbes ketdi, kankanayon koma a laglagipenda ti pribilehioda nga agdayaw kenkuana kas mapagtalkan a miembro iti sangakabbalayanna.

Nalawag a kalpasan la unay ti panangited ni Jesus itoy nga ilustrasion a simmangpet ti mensahero. Isut’ imbaon da Maria ken ni Marta, dagiti kakabsat ni Lazaro, nga agnanaed idiay Betania iti Judea. “Apo, kitaem! ti dungdunguem masakit,” kuna ti mensahero.

Simmungbat ni Jesus: “Daytoy a sakit saan nga ipatay, ngem pakaidayawan ti Dios, tapno ti Anak ti Dios madaydayaw iti dayta.” Kalpasan ti panagbatina iti dua nga aldaw idiay yanna, kuna ni Jesus kadagiti adalanna: “Intay manen idiay Judea.” Nupay kasta, impalagipda kenkuana: “Mannursuro, di pay nabayag ngayangayendaka a batuen dagiti Judio, ket inka manen sadiay?”

“Awan aya ti sangapulo ket dua nga oras iti aldaw?” simmungbat ni Jesus. “No ti maysa a tao magna iti aldaw, saan a maitibkol agsipud ta makitana ti lawag daytoy a lubong. Ngem no ti maysa a tao magna iti rabii, maitibkol, ta awan silaw kenkuana.”

Nalawag a ti kayat a sawen ni Jesus ket ti “or-oras iti aldaw,” wenno ti tiempo nga impaay ti Dios iti naindagaan a ministerio ni Jesus, ket di pay limmabas ket agingga a di mapalabas dayta, awan ti makadangran kenkuana. Masapul ti panangusarna a naan-anay ti ababa a tiempo iti “aldaw” a nabati pay kenkuana, ta kalpasanna dumtengto ti “rabii” inton isut’ pinapatayen dagiti kabusorna.

Innayon ni Jesus: “Ni Lazaro a gayyemtayo matmaturog, ngem innak tapno riingek iti turogna.”

Gapu ta nalawag nga impapanda a matmaturog ni Lazaro ket daytoy maysa a nalawag a pagilasinan ti iyiimbagna, simmungbat dagiti adalan: “Apo, no matmaturog, umimbagto.”

Idin kinuna ngarud ni Jesus a silalawag kadakuada: “Ni Lazaro natay, ket agragsakak gapu kadakayo ta siak awanak idiay tapno patienyo. Nupay kasta intay kenkuana.”

Gaput’ mabigbigna a mabalin a mapapatay ni Jesus idiay Judea, ngem tarigagayanna ti mangsuportar kenkuana, pinaregta ni Tomas dagiti padana nga adalan: “Intayo met tapno mataytayo a maikanunong kenkuana.” Gapuna inrisgoda ti biagda, kimmuyog dagiti adalan ken Jesus iti mision iti asi a mapan iti Judea. Lucas 13:22; 17:1-10; Juan 10:22, 31, 40-42; 11:1-16.

▪ Sadino ti nangaskasabaan ni Jesus di pay nabayag?

▪ Ania dagiti sursuro nga inulit ni Jesus, ket ania a kasasaad a pudno a pasamak iti biag ti dineskribirna a mangiyilustrar iti daytoy a punto?

▪ Ania a damag ti inawat ni Jesus, ket ania ti kayatna a sawen iti “aldaw” ken ti “rabii”?

▪ Aniat’ kayat a sawen ni Tomas idi kinunana, ‘Intayo met tapno mataytayo a maikanunong kenkuana’?