Kapitulo 38

Nagkurang Aya ti Pammati ni Juan?

NI Juan a Mammautisar, nga itan ket addan idiay pagbaludan iti makatawen, immawat ti report maipapan ti panagungar ti anak a lalaki ti maysa a balo idiay Nain. Ngem kayat ni Juan a mangngeg a direkta manipud ken Jesus maipapan iti kinapateg daytoy, gapuna isut’ nagbaon iti dua kadagiti adalanna nga agsaludsod: “Sika kadi Daydi Umay wenno urayenmi ti sabali?”

Kasla karkarna dayta a saludsod, nangnangruna ta ni Juan nakitana ti espiritu ti Dios a bimmaba ken ni Jesus ken nangngegna ti timek a pananganamong ti Dios idi bautisaranna ni Jesus ngangnganin dua a tawen sakbayna. Mabalin a ti saludsod ni Juan ti pangipatuan dagiti dadduma a ti pammatina ket kimmapuyen. Ngem saan a kasta. Ni Jesus saan koma nga agsao a sidadayaw ken ni Juan, nga isut’ inaramidna iti daytoy nga okasion, no ni Juan ket nangrugi nga addaan panagduadua. Ngarud, apay, nga insaludsod ni Juan daytoy?

Mabalin a ni Juan ket kayatna laeng ti maaddaan ti pammatalged manipud ken ni Jesus nga Isu ti Mesias. Daytoy ti makapabileg ken ni Juan bayat ti panagladladingitna idiay pagbaludan. Ngem kaawatan nga adda pay dakdakkel a banag iti saludsod ni Juan ngem iti dayta. Nalawag a kayatna a maammuan no adda pay ti sabali nga umay, maysa a kasuno, ti kayariganna, a mangiringpas iti kaitungpalan amin dagiti bambanag a naipadto nga aramidento ti Mesias.

Sigun kadagiti padto ti Biblia a pagaammo unay ni Juan, Daydiay Pinulotan ti Dios ket agbalinto a maysa nga ari, maysa a manangispal. Kaskasdi, ni Juan nagtalinaed pay met laeng kas maysa a balud, uray no adun a bulan kalpasan ti bautismo ni Jesus. Gapuna kaawatan a ni Juan salsaludsodenna ken ni Jesus: ‘Sika aya a talaga daydiay mangipasdekto iti Pagarian ti Dios iti pammarang a pannakabalin, wenno addanto pay ti maysa a sabali, maysa a kasuno, nga isut’ pagurayanmi iti kaitungpalan amin dagiti nakaskasdaaw a padto maipapan iti kinadayag ti Mesias?’

Imbes nga ibagana kadagiti adalan ni Juan, ‘Siempre siak daydiay umay!’ iti dayta met laeng nga oras ni Jesus nangaramid iti nakaskasdaaw a panangipakita babaen iti panangpaimbagna kadagiti adu a tattao, nga inagasanna dagiti amin a kita ti saksakit ken an-anayenda. Kalpasanna kinunana kadagiti adalan: “Inkayo, ket saritaenyo ken Juan dagiti bambanag a nakita ken nangngegyo: a dagiti bulsek makakitada, dagiti pilay magnada, dagiti agkukutel nadalusanda ket dagiti tuleng makangngegda, dagiti natay nagungarda, ket dagiti napanglaw naikaskasaba kadakuada ti naimbag a damag.”

Iti sabali a pannao, ti saludsod ni Juan mabalin nga isingasingna ti panangnamnama a ni Jesus ket mangaramid iti ad-adu pay ngem ti ar-aramidenna, ket nalabit wayawayaannanto a mismo ni Juan. Nupay kasta, ni Jesus ibagbagana ken Juan a dina inanamaen ti ad-adu pay ngem kadagiti milagro nga ar-aramiden ni Jesus.

Idi pimmanawen dagiti adalan ni Juan, nagturong ni Jesus kadagiti umariwekwek ket imbagana kadakuada a ni Juan isu ti “mensahero” ni Jehova a naipadto idiay Malakias 3:1 ken isu met ti mammadto nga Elias a naipadto idiay Malakias 4:5, 6. Gapuna intantan-okna ni Juan kas katupag ti asinoman a mammadto a nagbiag sakbayna, nga inlawlawagna: “Pudno kunak kadakayo, Awan ti timmakder kadagiti naiyanak kadagiti babbai a dakdakkel ngem ni Juan a Bautista; ngem ti kababassitan unay iti pagarian ti langit dakdakkel ngem isu. Nanipud kadagiti aldaw ni Juan Bautista agingga ita ti pagarian ti langit ket isut’ kalat a gunggun-oden a siiinget ti tattao.”

Ipakpakita ni Jesus ditoy a ni Juan ket dinto maadda idiay nailangitan a Pagarian, yantangay ti kababassitan sadiay ket dakdakkel ngem ni Juan. Insagana ni Juan ti dalan a maipaay ken Jesus ngem natay sakbay a selioan ni Kristo ti tulagna, wenno katulagan, kadagiti ad-adalanna, tapno makikaduadanto kenkuana nga agturay iti Pagarianna. Daytat’ gapuna no apay a kinuna ni Jesus a ni Juan ket awanto idiay nailangitan a Pagarian. Imbes ketdi ni Juan maysanto a naindagaan nga iturayan ti Pagarian ti Dios. Lucas 7:18-30; Mateo 11:2-15.

▪ Apay nga insaludsod ni Juan no ni Jesus isu Daydi Umay wenno addanto pay ti sabali a namnamaenda?

▪ Ania dagiti padto a kinuna ni Jesus a tinungpal ni Juan?

▪ Apay a ni Juan Bautista ket dinto maadda idiay langit a kadua ni Jesus?