Kapitulo 106

Naibutaktak Babaen Kadagiti Pangngarig ti Kaubasan

NI Jesus adda idiay templo. Kalkalpasna laeng a riniro dagiti narelihiusuan a papangulo a nangikalikagum a mangammo no aniat’ pannakabalinna a mangar-aramid kadagiti bambanag. Sakbay a maimasmasandat’ pannakariroda, insaludsod ni Jesus: “Ania ti panangipapanyo?” Kalpasanna babaen iti pangngarig, impakitana kadakuada no ania a talaga ti katataoda.

“Maysa a tao adda dua nga annakna,” insalaysay ni Jesus. “Ket idi immasideg iti immuna, kinunana kenkuana, ‘Anak, inka, agtrabaho ita idiay kaubasan.’ Isu simmungbat ket kinunana, ‘Wen, apo,’ ngem saan a napan. Ket immasideg idi maikadua ket kinunana met kenkuana ti kasta. Isu simmungbat ket kinunana, ‘Diak kayat.’ Ngem idi kuan nagbabawi ket napan. Asino kadagiti dua ti nangaramid iti pagayatan ni amana?” inyimtuod ni Jesus.

“Ti maikadua,” insungbat dagiti kabusorna.

Gapuna inlawlawag ni Jesus: “Pudno kunak kadakayo a dagiti agsingsingir ti buis ken dagiti balangkantis mapanda nga umun-una ngem dakayo iti pagarian ti Dios.” Dagiti agsingsingir ti buis ken dagiti balangkantis, iti epektona, madida idi damo nga agserbi iti Dios. Ngem kalpasanna, kas iti maikadua nga anak, nagbabawida ket nagserbida met laeng kenkuana. Iti kasumbangirna, dagiti narelihiusuan a papangulo, kas iti daydiay immuna nga anak, kunada nga agserserbida iti Dios, ngem, kas kinuna ni Jesus: “Ta immay ni Juan [a Mammautisar] kadakayo iti dalan ti kinalinteg ket dikay namati kenkuana. Ngem, dagiti agsingsingir ti buis ken dagiti balangkantis namatida kenkuana, ket dakayo, nupay nakitayo daytoy, dikay met nagbabawi iti kalpasanna a namatikayo koma kenkuana.”

Sumaganad impakita ni Jesus a ti pannakapaay dagidiay narelihiusuan a papangulo ket saan laeng a gaput’ liwayda nga agserbi iti Dios. Saan, no di ket iti kinapudnona managdakdakesda. “Adda idi maysa a tao nga ama iti sangakabbalayan,” insalaysay ni Jesus, “a nagmula ti maysa a kaubasan ket linawlawna iti alad ket nangkali kenkuana ti maysa a pagaramidan ti arak ket nangbangon ti maysa a pagbantayan, ket intedna a pinaupaan kadagiti agtaltalon, ket napan iti sabali a daga. Ket idi umasideg ti tiempo ti panagapit, imbaonna dagiti adipenna kadagiti mannalon tapno awatenda ti abangna. Ket dagiti tumatalon, innalada dagiti adipenna ket minalmaloda ti maysa, ket pinatayda ti sabali, ket ti sabali binatoda. Nangibaon manen kadagiti sabali nga adipen, nga ad-adu ngem kadagidi immuna, ket inaramidda kadakuada ti kasdi met laeng.”

Dagiti “adipen” isuda dagiti mammadto a ti “ama ti sangakabbalayan,” a ni Jehova a Dios, imbaonna kadagiti “mannalon” iti “kaubasanna.” Dagitoy a tumatalon kangrunaanda a pannakabagi ti nasion nga Israel, nga isut’ nasion nga ipabpabigbig ti Biblia kas ti “kaubasan” ti Dios.

Yantangay dagiti “mannalon” kinabil ken pinapatayda dagiti “ad-adipen,” inlawlawag ni Jesus: “Ngem iti kamaudianan [ti makinkukua ti kaubasan] imbaonna kadakuada ti anakna, a kunkunana, ‘Padayawandanto ti anakko.’ Ngem idi dagiti agtaltalon nakitada daydi anak, kinuna ti maysa ken maysa kadakuada, ‘Daytoy ti agtawid; umaykayo, papatayentayo ket alaentayo ti tawidna!’ Ket isu tiniliwda ket induronda iti ruar ti kaubasan ket pinatayda.”

Itan, kasasaona dagiti narelihiusuan a papangulo, inimtuod ni Jesus: “Ngem inton umay ti apo ti kaubasan, anianto ti aramidenna kadagidiay nga agtaltalon?”

“Gapu ta managdakdakesda,” insungbat dagiti narelihiusuan a papangulo, “pukawennanto ida nga awanan asi ket itednanto nga ipaabang ti kaubasan kadagiti sabali a mannalon nga agbayad kenkuana kadagiti apit kadagiti tiempoda.”

Gapuna inwaragawagdat’ pannakaukom ti bagida a saanda a napupuotan, ta nairamanda kadagiti Israelita a “mannalon” iti Israel a nasional a “kaubasan” ni Jehova. Ti bunga a ninamnama ni Jehova iti kakasta a mannalon isut’ panamati iti Anakna, ti pudno a Mesias. Gaput’ saanda a panangted ti kasta a bunga, namakdaar ni Jesus: “Uray kaano dikay aya nabasa kadagiti Sursurat [idiay Salmo 118:22, 23], ‘Ti bato nga imbelleng dagiti managaramid ti balay isu met laeng ti maaramid a bato a pasuli. Manipud ken Jehova ti naggapuan daytoy, ket naskaskasdaaw kadagiti matatayo’? Gapuna kunak kadakayo, Ti pagarian ti Dios maikkatto kadakayo ket maitedto iti maysa a nasion a mangpataud kadagiti bungbungana. Ket ti matnag iti daytoy a bato maburakto. Ngem ti siasinoman a pagtinnaganna, matumekto a kasla tapuk.”

Itan naawatan dagiti eskriba ken panguluen dagiti papadi a ni Jesus agsasao maipapan kadakuada, ket isut’ kayatda a papatayen, ti nainkalintegan nga “agtawid.” Gapuna ti pribilehio nga agbalin kas agtuturay iti Pagarian ti Dios ket maikkatto kadakuada kas maysa a nasion, ket maysa a baro a nasion ‘dagiti mannalon ti kaubasan’ ti mapataud, daydiay mangtedto kadagiti umiso a bungbunga.

Gapu ta pagbutngan dagiti narelihiusuan a papangulo dagiti tattao, a nangibilang ken Jesus kas mammadto, dida insikat ti panangpapatayda kenkuana iti daytoy nga okasion. Mateo 21:28-46; Marcos 12:1-12; Lucas 20:9-19; Isaias 5:1-7.

▪ Siasino ti irepresentar dagiti dua nga annak iti umuna a pangngarig ni Jesus?

▪ Iti maikadua a pangngarig, asino ti inrepresentar ti “ama ti sangakabbalayan,” ti “kaubasan,” dagiti “mannalon,” dagiti “adipen,” ken “ti agtawid”?

▪ Aniat’ mapasamak kadagiti ‘mannalon ti kaubasan,’ ken asino ti mangsukat kadakuada?