Kapitulo 28

Nakuestionaran Maipapan ti Panagayunar

NGANGNGANI makatawen ti naglabasen nanipud itatabuno ni Jesus iti Paskua idi 30 K.P. Itatta, naibaluden ni Juan Bautista iti sumagmamanon a bulan. Numan pay tinarigagayanna nga agbalin a paspasurot ni Kristo dagiti adalanna, saanda amin a nagbalin a kasta.

Itan dadduma kadagitoy nga ad-adalan ni naibalud a Juan napanda ken Jesus ket nagsaludsodda: “Apay-apay a dakami ken dagiti Fariseo agayunarkami a masansan ngem dagiti adalam dida agayunar?” Agay-ayunar dagiti Fariseo a mamindua iti maysa a lawas kas maysa a seremonia iti relihionda. Ket dagiti adalan ni Juan nalabit tultuladenda met laeng dayta a kustombre. Mabalin nga agay-ayunarda met tapno pagladingitanda ti pannakaibalud ni Juan ket pagsiddaawanda no apay a dagiti adalan ni Jesus dida tumipon kadakuada iti daytoy a panangiyebkas iti ladingitda.

Kas sungbat inlawlawag ni Jesus: “Mabalin aya a dagiti makiboda agladingitda no adda pay laeng kadakuada ti nobio? Ngem umayto ti aldaw a ti nobio maikkatto kadakuada, ket iti kasta agayunardanto.”

Rebbeng a lagipen itan dagiti adalan ni Juan a nagsao ni Juan mismo maipapan ken Jesus kas ti Nobio. Gapuna bayat nga adda ni Jesus, imbilang ni Juan a di maiyanatup ti panagayunar, ket kasta met dagiti adalan ni Jesus. Kamaudiananna, idi natay ni Jesus, nagladingit ken nagayunaren dagiti adalanna. Ngem idi isut’ napagungar ken immulin sadi langit, awanen ti pakaigapuan pay ti naladingit a panagayunarda.

Sumaganad, inted ni Jesus dagitoy a pangngarig: “Awan ti tao a mangitakup ti lupot a di pay kimsen iti pagan-anay a daan; ta iti kasta inton kumsenen ti naitakup, rumsua a lumawlawa ti pigisna. Ket dida met ikabil ti baro nga arak kadagiti supot a lalat a daan; ta no kasta dagiti lalat bumtakda ket ti arak maibelleng ket madadael dagiti lalat. Ngem ikabilda ti arak a baro kadagiti lalat a baro.” Ania ti pakainaigan dagitoy a pangngarig iti panagayunar?

Tultulongan ni Jesus dagiti adalan ni Juan Bautista a mangapresiar nga awan asinoman a rebbeng a manginanama a dagiti paspasurotna makitunosda kadagiti daan nga ar-aramid ti Judaismo, kas ti seremonial a panagayunar. Isu di immay a mangtakup ken mangpaatiddog ti biag ti marunrunoten a sistema ti panagdayaw a sisasaganan a maikkat. Ti Kinakristiano di koma maallukoy a makikomporme iti Judaismo iti dayta nga aldaw agraman ti tradision ti tattao. Saan, daytat’ saan a maysa a baro a takup iti maysa a daan a pagan-anay wenno kas baro nga arak iti maysa a daanen a lalat. Mateo 9:14-17; Marcos 2:18-22; Lucas 5:33-39; Juan 3:27-29.

▪ Asino dagiti agay-ayunar ken agpaay iti ania a panggep?

▪ Apay a di agayunar dagiti adalan ni Jesus bayat ti kaaddana kadakuada, ken kalpasanna kasano nga iti di agbayag agpukaw ti pakaigappuan ti panagayunar?

▪ Ania dagiti pangngarig nga insalaysay ni Jesus, ket ania ti kaipapananda?