Kapitulo 65

Nalimed nga Ipapan Idiay Jerusalem

OTONIO idi iti 32 K.P., ket asidegen idi ti Piesta dagiti Abong-abong. Impamaysa ni Jesus ti ar-aramidna kangrunaanna idiay Galilea nanipud ti Paskua iti 31 K.P., idi a pinadpadas dagiti Judio ti mangpapatay kenkuana. Nalabit, nanipud idin mapan laengen ni Jesus idiay Jerusalem tapno tumabuno kadagiti tallo a tinawen a piesta dagiti Judio.

Itan indagadag dagiti kakabsat ni Jesus kenkuana: “Pumanawka ditoy ket inka idiay Judea.” Ti Jerusalem ket isut’ kangrunaan a siudad ti Judea ken ti narelihiusuan a sentro ti intero a pagilian. Inkalintegan dagiti kakabsatna: “Ta awan ti tao nga agaramid iti uray ania a nalimed idinto a tarigagayanna a mailatak.”

Nupay da Santiago, Simon, Jose, ken Judas dida patien ti inauna a kabsatda, a ni Jesus, nga isut’ pudpudno a Mesias, kayatda nga ipakitana dagiti namilagruan a pannakabalinna kadagiti isuamin a naur-urnong iti dayta a piesta. Nupay kasta, ni Jesus, pagaammona ti peggad. “Ti lubong saannakayo a mabalin a guraen,” kunana, “ngem siak guraennak, ta saksiak ti maipapan kenkuana, a dakes dagiti aramidna.” Gapuna imbaga ni Jesus kadagiti kakabsatna: “Sumang-atkayo iti piesta; siak diak pay sumang-at itoy a piesta.”

Ti Piesta dagiti Abong-abong ket maysa a pito-aldaw a panagrambak. Iti maikawalo nga aldaw daytat’ mapagpatingga babaen iti nasantuan nga ar-aramid. Ti piesta tandaanna ti panagpatingga ti tawen ti panagtalon ket maysa a tiempo ti dakkel a panagragragsak ken panagyaman. Sumagmamano nga aldaw kalpasan ti ipapanaw dagiti kakabsat ni Jesus a tumabuno a kadua dagiti kaaduan a managdaliasat, isu ken dagiti adalanna napanda a sililimed, a saanda a nagpakpakita iti publiko. Innalada ti rota a limmasat iti Samaria, imbes a daydiay pagpagnaan ti kaaduan a tattao nga asideg iti Karayan Jordan.

Yantangay kasapulan ni Jesus ken dagiti kakaduana ti pagdagusan iti maysa a purok dagiti Samaritano, imbaonna nga immun-una dagiti mensahero nga agsagana. Dagiti tattao, nupay kasta, madida a mangaramid iti aniaman a maipaay ken Jesus kalpasan a maammuanda nga isut’ agturong idiay Jerusalem. Sipupungtot, insaludsod ni Santiago ken ni Juan: “Apo, kayatmo nga ibilinmi a bumaba ti apuy ti langit tapno ibusenna ida?” Tinubngar ni Jesus ida iti panangisingasingda ti kasta a banag, ket nagturongdan iti sabali a purok.

Bayat a magmagnada iti dalan, maysa nga eskriba ti nagkuna ken ni Jesus: “Mannursuro, surotenkanto uray adino ti papanam.”

“Dagiti musang adda rukibda ket dagiti tumatayab ti tangatang adda umokda,” insungbat ni Jesus, “ngem ti Anak ti tao awan ti pangisadaganna iti ulona.” Inlawlawag ni Jesus a ti eskriba aglak-amto ti rigat no isut’ agbalin a pasurotna. Ket agparang a ti eskriba natangsit unay a mangawat iti daytoy a kita ti panagbiag.

Iti sabali pay a tao, kinuna ni Jesus: “Surotennak.”

“Palubosannak pay a mapan ken mangipompon ken amak,” insungbat ti lalaki.

“Bay-am dagiti natay a mangipompon kadagiti minatayda,” insungbat ni Jesus, “ngem sika mapanka ket ipakaammom ti pagarian ti Dios.” Kaawatan a ti ama daydiay a lalaki ket saan pay a natay, ta no isu komat’ natayen, mabalbalin a ti anakna a lalaki awan koma ditoy a dumdumngeg ken ni Jesus. Kaawatan a ti anak a lalaki ti dumawdawat pay ti tiempo ti panaguray iti ipapatay ni amana. Isut’ saan a sisasagana a mangipangpangruna iti Pagarian ti Dios iti biagna.

Bayat ti panagtuloyda iti dalan nga agturong Jerusalem, sabali pay a tao ti nagkuna ken ni Jesus: “Surotenkanto, Apo; ngem palubosannak ta innak pay agpakada kadagiti kabbalayko.”

Iti isusungbatna kinuna ni Jesus: “Awan ti tao nga idinto nga immiggem ti arado ken tumalliaw pay iti likudan a maikari iti pagarian ti Dios.” Dagidiay agbalin nga adalan ni Jesus masapul nga ipamaysada ti matmatada iti serbisio ti Pagarian. No kasano a ti inarado agbalin a nakillo no ti agar-arado ket saan a kumitkita iti sanguananna, kasta met ti asinoman a tumalliaw iti likudan iti daytoy daan a sistema dagiti bambanag mabalin a maitibkol ket maisiasi iti dalan nga agturong iti biag nga awan inggana. Juan 7:2-10; Lucas 9:51-62; Mateo 8:19-22.

▪ Asino dagiti kakabsat ni Jesus, ket kasanot’ panagriknada maipapan kenkuana?

▪ Apay a dagiti Samaritano ket nauyongda unay, ket aniat’ kayat nga aramiden da Santiago ken Juan?

▪ Ania a tallo a pannakipatang ti naadda ken ni Jesus iti dalan, ket kasanot’ panangipaganetgetna ti pannakasapul iti managsakripisio a serbisio?