Kapitulo 2

Napadayawan Sakbay a Naipasngay

KALPASAN nga imbaga ni anghel Gabriel ken ni balasang a Maria nga isuntot’ agpasngay iti maysa a lalaki nga agarinto iti agnanayon, nagimtuod ni Maria: “Kasanonto daytoy, ta diak nakidendenna iti maysa a lalaki?”

“Ti nasantuan nga espiritu umayto kenka,” inlawlawag ni Gabriel, “ket ti pannakabalin ti Kangatuan salinongannakanto. Gapuna met a ti maiyanakto kenka maawaganto iti nasantuan, Anak ti Dios.”

Tapno matulongan ni Maria a mamati iti mensahena, intuloy ni Gabriel: “Ket, adtoy! ni Elisabet a kabagiam nagsikog met iti kinabaketna, iti maysa nga anak a lalaki, ket daytoy ti maikanem a bulanna, idinto a nagananda iti lupes; ta awan ti sao nga agtaud iti Dios nga awan pannakabalinna.”

Namati ni Maria ken Gabriel. Ket aniat’ insungbatna? “Adtoy! ti adipen a babai ni Jehova!” kinunana. “Maaramid koma kaniak kas iti saom.”

Di nagbayag kalpasan a pimmanawen ni Gabriel, nagsagana ni Maria ket simmarungkar ken Elisabet, nga agnanaed a kadua ni lakayna, a ni Zacarias, kadagiti kabambantayan a paset ti Judea. Manipud pagtaengan ni Maria idiay Nasaret, maysa daytoy a nawatiwat a panagdaliasat a nalabit tallo wenno uppat nga aldaw.

Idi nakagteng met laengen ni Maria iti balay ni Zacarias, simrek ket nangkablaaw. Iti dayta, napunno ni Elisabet ti nasantuan nga espiritu, ket kunana ken Maria: “Nainggasatanka kadagiti babbai, ket nagasat ti bunga ti tianmo! Kasano a maaddaanak iti kastoy a pribilehio, a ti ina ti Apok umay kaniak? Ta adtoy! apaman a ti timek ti kablaawmo dimteng iti lapayagko, ti ubing limmagto iti ragsak itoy tianko.”

Idi mangngegna daytoy, simmungbat ni Maria buyogen ti naimpusuan a panagyaman: “Daydayawen toy kararuak ni Jehova, ket ti nakemko naragsak unay iti Dios a Manangisalakan kaniak; ta kinitana ti kinanumo ti adipenna. Ta adtoy! manipud ita naganendakto iti nainggasatan dagiti amin a kaputotan; ta inaramid kaniak Daydiay mannakabalin dagiti dadakkel a banag.” Kaskasdi, agpapan pay iti pabor a naipakita kenkuana, inturong ni Maria ti amin a dayaw iti Dios. “Nasantuan ti naganna,” kunana “ket ti kaasina adda a maipaay kadagiti agsasaruno a kaputotan kadagiti agbuteng kenkuana.”

Intultuloy a dinaydayaw ni Maria ti Dios iti naipaltiing a napropetikuan a kanta, a kunkunana: “Dakkel ti gapuanan ti takkiagna, winarawarana dagiti nakuspag iti panagpampanunot dagiti pusoda. Inikkatna dagiti agtuturay kadagiti tronoda ket intan-okna dagiti nanumo ti saadda; dagiti mabisbisinan pinennekna ida kadagiti naimbag a sagsagut ket dagiti nabaknang pinapanawna ida nga ungaong. Nangted tulong iti Israel nga adipenna, ta linagipna ti asi, kas sinaona kadagiti ammatayo, ken Abraham ken kadagiti putotna, iti agnanayon.”

Nakipagtaeng ni Maria ken Elisabet iti agarup tallo a bulan, ket awan duadua nga adut’ naitulongna kadagitoy maudi a lawlawas a panagsikog ni Elisabet. Anian a pudno a nagsayaat ta dagiti dua a matalek a babbai, nga agpadpada a mangaw-awit ti maysa nga ubing babaen iti tulong ti Dios, ket makapagkaduada kadagitoy nabendituan a panawen ti panagbiagda!

Nadlawyo kadi ti dayaw a naipaay ken Jesus uray pay idi sakbay a naipasngay? Isut’ inawagan ni Elisabet kas “Apok,” ket ti di pay naipasngay nga anakna limmagto buyogen ti ragsak idi damo nga agparang ni Maria. Iti kasumbangirna, dadduma trinatoda ni Maria ken ti maipasngayto pay nga anakna buyogen ti bassit a panagraem, kas makitatayto. Lucas 1:26-56.

▪ Aniat’ kinuna ni Gabriel a makatulong ken Maria a mangtarus no kasanonto ti panagsikogna?

▪ Kasano a napadayawan ni Jesus sakbay a naipasngay?

▪ Aniat’ kinuna ni Maria iti napropetikuan a kanta a pangidayaw ken Jehova?

▪ Kasano kabayag a nakipagtaeng ni Maria ken ni Elisabet ket apay a maiyanatup a makipagnaed ni Maria ken ni Elisabet bayat daytoy a tiempo?