Kapitulo 79

Nasion a Napukaw, Ngem Saan Amin

DI NABAYAG kalpasan ti pannakipatpatang ni Jesus kadagidiay nagtataripnong idiay ruar ti balay ti maysa a Fariseo, adda maysa a nagkuna kenkuana “maipapan kadagiti taga Galilea a ti darada ti inlaok ni [Romano a gobernador a Poncio] Pilato kadagiti datonda.” Dagitoy a taga Galilea nalabit isuda dagidiay napapatay idi rinibribo kadagiti Judio ti nagprotesta iti panangusar ni Pilato iti kuarta manipud iti tesoreria ti templo a mangaramid iti kalasugan a mangyeg iti danum idiay Jerusalem. Dagidiay mangibagbaga itoy a banag ken Jesus ti mabalin a mangisingsingasing a dagiti taga Galilea ti nagsagaba iti kalamidad gapu kadagiti kabukbukodanda a kinadakes.

Ni Jesus, nupay kasta, ti nangpalinteg kadakuada, a salsaludsodenna: “Pagarupenyo a dagitoy taga Galilea agsipud ta linak-amda dagitoy, isuda ti ad-adda a managbasol ngem dagiti isuamin a taga Galilea? Saan, kunak kadakayo,” insungbat ni Jesus. Kalpasanna inusarna ti pasamak a nangpakdaar kadagiti Judio: “Ngem no dikayto agbabawi, mapukawkayto met amin iti kasta.”

Iti panangitultuloyna, nalagip ni Jesus ti sabali pay a didigra, nalabit nainaig met iti pannakaaramid ti kalasugan. Insaludsodna: “Wenno dagiti sangapulo ket walo a natupakan ti torre sadi Siloam, ket pinatayna ida, pagarupenyo nga ad-adda a nakautangda ngem dagiti isuamin a tattao nga agnaed sadi Jerusalem?” Saan, saan a gaput’ kinadakes dagitoy a tattao a natayda, kuna ni Jesus. Imbes ketdi, “ti panawen ken di napakpakadaan a pasamak” ti kaaduanna a responsable kadagita a didigra. Ni Jesus, nupay kasta, ti mangus-usar manen iti okasion a mangpakdaar: “Ngem no dikayto agbabawi, mapukawkayto amin iti kasta.”

Kalpasanna intuloy ni Jesus ti nangted ti maiyanatup nga ilustrasion, nga insalaysayna: “Ti maysa a tao addaan sangapuon a higos a naimula iti minuyonganna, ket immay nagsapul ti bungana, ket saan a nakasarak. Ket kinunana idi agaywan iti minuyongan, ‘Adtoy, tallo a tawenen nga um-umayak agsapul ti bunga daytoy a kayo a higos ket diak makasarak. Pukanem! Apay-apay makasalin pay laeng iti daga?’ Ket isu simmungbat ket kinunana kenkuana, ‘Apo, bay-am pay laeng iti daytoy a tawen, agingga iti kaliak iti arubayanna ket gaburak ti pataba; ket no agbunganto iti masanguanan, naimbag; ket no saan, pukanemto.’”

Ni Jesus ti nangpadas iti nasurok a tallo a tawen a mangsukay ti pammati iti nasion a Judio. Ngem sumagmamano a gasut laeng nga adalan ti mabilang kas bunga iti panagbannogna. Ita, bayat daytoy maikapat a tawen ti ministeriona, ninayonanna ti pingetna, a simbolikal a nagkali ken nangikabil ti pataba iti aglawlaw ti Judio a sangapuon a higos babaen iti sireregta a panangaskasaba ken panangisursuro idiay Judea ken Perea. Kaskasdi nga awan nagbambanaganna! Madi nga agbabawi ti nasion ket gapu itoy nakalinean iti pannakadadael. Bassit laeng a natda iti nasion ti nagtignay.

Di nagbayag kalpasanna mangisursuro ni Jesus idiay sinagoga iti aldaw a Panaginana. Idiay isut’ nakakita ti maysa a babai a, gapu ta maysa a demonio ti mangsapsaplit kenkuana, isut’ napakubbo iti 18 a tawenen. Siaasi, ni Jesus ti nakisao kenkuana: “Babai, nakalapsutkan iti sakitmo.” Ket impatayna kenkuana dagiti imana, ket dagus a napalinteg ket dinaydayawna ti Dios.

Ket ti pangulo ti sinagoga, nupay kasta, makapungtot. “Adda innem nga aldaw a rebbeng ti agtrabaho,” improtestana. “Kadagitoy ngarud, umaykayo ket agpaagaskayo, ket saan nga iti aldaw a panaginana.” Ngarud bigbigbigen ti pangulo ti pannakabalin ni Jesus a makaagas ngem kinondenarna dagiti tattao iti iyaayda a panagpaagas iti aldaw a Panaginana!

“Managinsisingpet,” insungbat ni Jesus, “tunggal maysa kadakayo, dina aya bukraan iti aldaw a panaginana ti bakana wenno ti asnona iti kol-loong ket mapanna painumen? Ket daytoy babai nga anak ni Abraham, adtoy! a binalud ni Satanas iti bayat ti sangapulo ket walo a tawen, saan aya a maipaay a bukraan iti daytoy a pannakabalud iti aldaw a panaginana?”

Idi mangngegan daytoy, dagidiay bumusbusor ken Jesus nangrugida a mabainan. Dagiti tattao, nupay kasta, nagragsakda kadagiti amin a nadayag a bambanag a nakitada nga inaramid ni Jesus. Kas sungbat inulit ni Jesus dagiti dua a naimpadtuan a pangngarig maipapan iti Pagarian ti Dios, dagidiay imbaganan kadakuada manipud maysa a barangay idiay Baybay ti Galilea agarup maysa a tawen a nasapsapa. Lucas 13:1-21; Eclesiastes 9:11; Mateo 13:31-33.

▪ Ania dagiti didigra a nadakamat ditoy, ket ania a leksion ti inadaw ni Jesus kadakuada?

▪ Ania nga aplikasion ti maaramid maipapan iti di nabunga a puon ti higos, agraman ti panagregget a mangaramid iti dayta a nabunga?

▪ Kasanot’ panangbigbig ti pangulo ti abilidad ni Jesus a mangngagas, kaskasdi kasanot’ panangibutaktak ni Jesus ti kinamanaginsisingpet ti lalaki?