Kapitulo 82

Ni Jesus Agturong Manen Idiay Jerusalem

DI NAGBAYAG adda manen ni Jesus iti dalan, a mangisursuro kadagiti siudad ken purpurok. Kaawatan nga isut’ adda idiay distrito ti Perea, idiay ballasiw ti Karayan Jordan manipud Judea. Ngem ti destinasionna ket idiay Jerusalem.

Ti pilosopia dagiti Judio a bassit laeng ti maikari iti pannakaisalakan isut’ nalabit a nangtignay iti lalaki a nagsaludsod: “Apo, bassit aya dagiti maisalakan?” Babaen iti sungbatna, ni Jesus pinilitna dagiti tattao nga agpanunot no aniat’ kasapulan iti pannakaisalakan: “Agawaanyo [kayatna a sawen, pagreggetanyo, wenno pagpingetanyo] ti sumrek iti ruangan a nailet.”

Ti kasta a panagagawa ket naganat “ta adu,” intuloy ni Jesus, “dagiti agsapulto no kasano ti iseserrekda ket didanto mabalin.” Apay a didanto mabalin? Inlawlawagna nga ‘inton ti bumalay tumakder ket punitannan ti ruangan ket dagiti tattao nga adda iti ruar tumugtogda, a kunkunada, “Apo, ilukatannakami,” isu sumungbatto: “Saankayo nga am-ammo ken no taga anokayo. Umadayokayo kaniak, dakay amin a managaramid ti kinadakes!”’

Dagidiay a napunitan iti ruar kaawatan nga immayda iti oras a kumbiniente laeng kadakuada. Ngem iti daydin ti ruangan ti gundaway ket napunitan ken naserraanen. Tapno makastrek, immayda koma a nasapsapa, uray no mabalin nga inkumbiniente ti panangaramid iti dayta. Pudno unay, ti nakalkaldaang a resulta ti agur-uray kadagidiay mangitantantan ti panamagbalinda iti panagdayaw ken Jehova a kangrunaan a panggep iti biagda!

Dagiti Judio nga isut’ nakaibaonan ni Jesus a pagserbian, iti kadakkelan a pasetna, saanda nga innala ti nakaskasdaaw a gundawayda a mangakseptar ti sagana ti Dios maipaay iti pannakaisalakan. Gapuna kuna ni Jesus nga agsangitdanto ken agngaretngetto ti ngipenda inton maipalladawda iti ruar. Iti kasumbangirna, dagiti tattao manipud “daya ken laud, ken manipud amianan ken abagatan,” wen, manipud amin a nasnasion, “tumugawdanto idiay pagarian ti Dios.”

Intuloy ni Jesus: “Adda maudi [dagidiay mauy-uyaw a di Judio, agraman dagiti mailupit-lupit a Judio] nga umunadanto, ket adda umuna [dagiti namaterialan ken narelihiusuan ti pannakapaborda a Judio] a maudidanto.” Ti panagbalinda a maudi kaipapananna a dagiti kasta a nasadut, awan panagyamanda a tattao awandanto a pulos idiay Pagarian ti Dios.

Ita umay dagiti Fariseo ken Jesus ket kunada: “Rummuarka ket pumanawka ditoy, ta ni Herodes [Antipas] kayatnaka a papatayen.” Mabalin a ni Herodes mismo ti nangiyusuat iti daytoy a sayangguseng tapno pagtalawenna ni Jesus manipud iti teritoria. Ni Herodes mabalin a nagbuteng iti pannakairamanna iti ipapatay ti sabali manen a mammadto ti Dios kas iti panangpapatayna ken Juan a Mammautisar. Ngem kuna ni Jesus kadagiti Fariseo: “Inkayo ket kunaenyo iti daydiay nasikap, ‘Adtoy! Paruarek dagiti sairo ket mangagasak ita ken inton bigat, ket iti maikatlo nga aldaw agturposak.’”

Kalpasan ti panangturposna ti trabahona sadiay, intuloy ni Jesus ti panagdaliasatna nga agturong Jerusalem, agsipud ta, kas panangilawlawagna, “ta saan a mabalin a ti maysa a mammadto matay idiay ruar ti Jerusalem.” Apay a mainanama a ni Jesus mapapatayto idiay Jerusalem? Agsipud ta ti Jerusalem isut’ kabisera a siudad, a sadiay ti yan ti 71-miembro a nangato a korte ti Sanhedrin ken pakaidatdatonan dagiti datdaton nga animal. Gapuna, saanto a mapalubosan a “ti Kordero ti Dios” ket mapapatay iti sadinoman malaksid idiay Jerusalem.

“Jerusalem, Jerusalem, a papatayem dagiti mammadto ken uborem dagiti maibaon kenka,” insennaay ni Jesus, “namin-ano a kinayatko nga urnongen koma dagiti annakmo kas iti upa urnongenna dagiti piekna iti sirok dagiti payakna, ket dikayo kinayat! Adtoy! Ti balayyo mapanawan kadakayo.” Gaput’ panangilaksidda iti Anak ti Dios, ti nasion ket naikeddeng iti pannakadadael!

Bayat ti panagtuloy ni Jesus idiay Jerusalem, isut’ naawis a sumrek iti balay ti maysa a panguluen dagiti Fariseo. Daytat’ aldaw ti Panaginana, ket dagiti tattao ti mangsisiim kenkuana, gapu ta adda sadiay ti maysa a lalaki nga imbal, naurnong ti danum nalabit iti taktakiag ken saksakana. Kinasao ni Jesus dagiti Fariseo ken dagiti mamasirib iti Linteg nga adda sadiay, a sinaludsodanna ida: “Maipalubos kadi ti panangagas iti aldaw a panaginana wenno saan?”

Awan nagun-uni. Gapuna pinaimbag ni Jesus ti tao ken pinagawidna. Kalpasanna insaludsodna: “Asino kadakayo ti adda anakna wenno bakana a natnag iti bubon, a saanna dagus nga alawen iti aldaw ti panaginana?” Ket, dida manen nabalinan ti simmungbat. Lucas 13:22–​14:6; Juan 1:29.

▪ Aniat’ impakita ni Jesus a kasapulan iti pannakaisalakan, ken apay adu dagiti napunitan iti ruar?

▪ Asinoda dagiti “maudi” nga immun-una, ken dagiti “umuna” a nagbalin a naudi?

▪ Apay a mabalin a naikuna a ni Herodes kayatna a papatayen ni Jesus?

▪ Apay a saan a mapalubosan a ti maysa a mammadto ket mapapatay iti ruar ti Jerusalem?