Kapitulo 42

Ni Jesus Tinubngarna Dagiti Fariseo

NO ITI pannakabalin ni Satanas nga isut’ mangparparuar kadagiti demonio, insungbat ni Jesus, no kasta ni Satanas nabingaybingay met la iti bagina. “Uray aramidenyo ti kayo a nasayaat ket ti bungana nasayaat,” intuloyna, “wenno aramidenyo ti kayo a dakes ket ti bungana dakes; ta gapu iti bungana mailasin ti kayo.”

Minamaag ti panangipabasol a ti nasayaat a bunga a panangparuar kadagiti demonio ket resultat’ panagserserbi ni Jesus ken Satanas. No ti bunga ket nasayaat, saan a mabalin a ti kayo ket dakes. Iti kasumbangirna, ti dakes a bunga dagiti Fariseo iti nakakatkatawa a pammabasolda ken awan nakaibatbatayanna nga ibubusor ken Jesus ket pammaneknek nga isuda a mismo ket dakesda. “Dakayo kaputotan dagiti karasaen,” kinuna ni Jesus, “kasano ti pannakabalinyo nga agsao kadagiti banag a naimbag, idinto a dakeskayo? Ta ti naruay iti puso isu ti sawen ti ngiwat.”

Gapu ta dagiti sasaotayo isarmingda ti kasasaad ti puspusotayo, aniaman a sawentayo mangted pakaibatayan ti pannakaukom. “Ket kunak kadakayo,” kuna ni Jesus, “nga amin a sao nga awan kapapayanna a sawento dagiti tattao, sungbatandanto iti Aldaw ti Pannakaukom; ta gapu kadagiti saom maibilangkanto a nalinteg, ket gapu kadagiti saom maibilangkanto a dakes.”

Agpapan pay amin a mannakabalin nga ar-aramid ni Jesus, inkalikagum dagiti eskribas ken Fariseo: “Mannursuro, kayatmi a makita ti maysa a pagilasinan nga aggapu kenka.” Nupay dagitoy a tattao manipud Jerusalem mabalin a saanda a personal a nakita dagiti datdatlagna, adda dagiti di mapaulbodan a pammaneknek dagiti nakasaksin maipapan kadakuada. Gapuna kuna ni Jesus kadagiti papangulo a Judio: “Ti maysa a kaputotan a dakes ken mannakiabig dumawat ti maysa a pagilasinan, ngem awanto ti pagilasinan a maited kenkuana no di ti pagilasinan ni Jonas a mammadto.”

Iti panangilawlawagna ti kayatna a sawen, intuloy ni Jesus: “Ta no kasano ti panagyan ni Jonas iti tian ti dakkel nga ikan iti tallo nga aldaw ken iti tallo a rabii, kasta ti panagyanto ti Anak ti tao iti puso ti daga iti tallo nga aldaw ken tallo a rabii.” Kalpasan ti pannakaalun-onna iti ikan, rimmuar ni Jonas a kasla napagungar, gapuna ipadto ni Jesus nga isut’ matay ket iti maikatlo nga aldaw maibangonto a sibibiag. Kaskasdi, dagiti papangulo a Judio, uray pay idi iti kamaudianannan ket napagungar ni Jesus, inlaksidda “ti pagilasinan ni Jonas.”

Gapuna kinuna ni Jesus a dagiti tattao ti Nineve a nagbabawi iti panangaskasaba ni Jonas tumakderdanto iti panangukom tapno ilunodda wenno kondenarenda dagiti Judio a nangilaksid ken ni Jesus. Umas-asping iti dayta, inyaspingna ida iti reina ti Seba, a naggapu manipud kadagiti ungto ti daga tapno mangngegan ti kinasirib ni Salomon ket nagsiddaawanna ti nakita ken nangngeganna. “Ket, adda ditoy!” kinuna ni Jesus, “ti maysa a nangnangruna ngem ni Salomon.”

Kalpasanna inted ni Jesus ti ilustrasion ti maysa a tao a rimmuaran ti maysa a narugit nga espiritu. Ti lalaki, nupay kasta, ket saanna a pinunnuan daydiay ungaong a disso babaen kadagiti naimbag a bambanag, gapu itoy isut’ nagyanan manen ti pito nga ad-adda a dakes nga espiritu. “Kasta met ti maaramidto itoy dakes a kaputotan,” kuna ni Jesus. Ti nasion nga Israelita nadalusan ket naglak-amda ti pannakareporma​—kas ti temporario nga ipapanaw ti narugit nga espiritu. Ngem ti panangilaksid ti nasion kadagiti mammadto ti Dios, a nagtungpal iti ibubusorda ken ni Kristo a mismo, ti nangipanayag iti dakes a kasasaadda a dakdakes ngem iti daydiay pangrugianna.

Bayat nga agsasao ni Jesus, dimteng ni inana ken dagiti kakabsatna ket nagtakderda idiay ruar a kadua dagiti adu a tattao. Gapuna adda nagkuna: “Adtoy! Ni inam ken dagiti kakabsatmo addada idiay ruar, a tarigagayanda ti pannakisao kenka.”

“Asino ti inak ken siasinoda dagiti kakabsatko?” insaludsod ni Jesus. Ket intudona dagiti adalanna, a kunana: “Adtoy! Ni inak ken dagiti kakabsatko! Ta siasinoman a mangaramidto iti pagayatan ni Amak nga adda sadi langit, isu dayta ti kabsatko a lalaki ken babai, ken inak.” Iti daytoy a pamay-an impakita ni Jesus nga uray kasano ti kapateg ti singgalut a mamagsinggalut kenkuana kadagiti kakabagyanna, kaskasdi a napatpateg ti pannakirelasionna kadagiti adalanna. Mateo 12:33-50; Marcos 3:31-35; Lucas 8:19-21.

▪ Kasanot’ pannakapaay dagiti Fariseo a namagbalin a nasayaat agpadpada iti “kayo” ken ti “bungana”?

▪ Ania “ti pagilasinan ni Jonas,” ken kasano a nailaksid dayta kalpasanna?

▪ Kasano a ti nasion nga Israelita idi umuna a siglo ket kas iti daydiay lalaki a rimmuaran ti narugit nga espiritu?

▪ Kasano nga impaganetget ni Jesus ti nasinged a pannakirelasionna kadagiti adalanna?