Kapitulo 7

Ni Jesus ken dagiti Astrologo

SUMAGMAMANO a lallaki ti aggaput’ Daya. Astrologoda​—tattao nga agkunkuna a maibuksilandat’ posision dagiti bituen. Idi addada idiay pagtaenganda iti Daya, nakitadat’ maysa a baro a bituen, ket sinursurotda dayta iti ginasgasut a milia agturong idiay Jerusalem.

Idi dimteng dagiti astrologo idiay Jerusalem, insaludsodda: “Sadino ti yan ti naiyanak nga ari dagiti Judio? Ta nakitami ti bituenna idiay daya, ket immaykam nga agdayaw kenkuana.”

Idi mangngeg daytoy ni Ari Herodes, nariribukan unay. Gapuna inawaganna dagiti panguluen a papadi ket inimtuodna no sadinot’ pakayanakan ti Kristo. Imbasardat’ sungbatda iti Kasuratan, a kunada: “Sadi Betlehem.” Iti kasta, pinaayaban ni Herodes dagiti astrologo ket kunana kadakuada: “Inkayo ket damagenyo a naimbag ti maipapan iti ubing, ket no masapulanyo ipakaammoyonto kaniak, tapno mapanakto met agdaydayaw kenkuana.” Ngem, iti kinapudnona, ni Herodes kayatna a masarakan ti ubing tapno papatayenna!

Sakbay ti ipapanawda, adda nakaskasdaaw a napasamak. Ti bituen a nakitada idiay Daya agdaldaliasat iti sanguananda. Nalawag, daytoy ket saan a gagangay a bituen, no di ket nairanta a naipaay tapno mangiturong kadakuada. Intultuloy a sinurot daytoy dagiti astrologo agingga a nagsardeng a mismo iti ngatuen ti balay a pagnanaedan da Jose ken Maria.

Idi simrek dagiti astrologo iti balay, nasarakanda ni Maria a kaduana ti ubing, a ni Jesus. Iti dayta nagruknoyda amin kenkuana. Ket inruarda dagiti sagsagutda a balitok, insienso ken mirra. Kalpasanna, idi agawidda koman tapno ibaga ken Herodes ti yan ti ubing, pinakdaaran ida ti Dios iti maysa a tagtagainep a dida aramiden dayta. Gapuna nagawidda iti dagada babaen iti sabali a dalan.

Asinot’ pagarupenyo a nangipaay iti bituen nga agdaldaliasat iti tangatang tapno iturongna dagiti astrologo? Laglagipenyo, ti bituen saanna a direkta nga inturong ida ken Jesus sadi Betlehem. Imbes ketdi, naiturongda sadi Jerusalem a nakasarakanda ken Ari Herodes, a nanggandat a mangpapatay ken Jesus. Ket naaramidna koma dayta no di bimmallaet ti Dios ken namakdaar kadagiti astrologo a saanda nga ibagbaga ken Herodes no sadinot’ yan ni Jesus. Ti kabusor ti Dios, a ni Satanas a Diablo, ti nanggandat a mangpapatay ken Jesus, ket inusarna dayta a bituen tapno maibanagna ti panggepna. Mateo 2:1-12; Mikias 5:2.

▪ Aniat’ mangipakita a ti bituen a nakita dagiti astrologo ket saan a gagangay a bituen?

▪ Sadinot’ yan ni Jesus idi isut’ nasarakan dagiti astrologo?

▪ Apay nga ammotayo a ti bituen ket impaay ni Satanas a mangiturong kadagiti astrologo?