Kapitulo 18

Ni Juan Bumassit, Ni Jesus Dumakkel

KALPASAN ti Paskua idi primavera ti 30 K.P., ni Jesus ken dagiti adalanna pinanawandat’ Jerusalem. Nupay kasta, dida nagawid kadagiti balayda sadi Galilea no di ket napanda iti probinsia ti Judea, ket namautisarda sadiay. Makatawenen ni Juan a Mammautisar a kastat’ ar-aramidenna, ket kaskasdi nga adda dagiti adalan a makitimtimpuyog kenkuana.

Kinapudnona, saan nga aktual a nangbautisar ni Jesus, ngem namautisar dagiti adalanna iti sidong ti panangidirihirna. Ti pammautisarda umarngi met lat’ kaiyuloganna iti daydiay pammautisar ni Juan, a daytat’ mangisimbolo iti panagbabawi dagiti Judio kadagiti nakabasolanda iti Linteg ti tulag ti Dios. Nupay kasta, kalpasan ti panagungarna, imbilin ni Jesus kadagiti adalanna a mamautisarda ngem iti naigiddiat a kaiyulogan. Ti Nakristianuan a bautismo itatta isut’ simbolo ti dedikasion ti maysa nga agserbi ken Jehova a Dios.

Ngem iti daytoy rugrugi ti ministerio ni Jesus, isuda ken Juan, nupay dida nagkuykuyog, insuro ken binautisaranda dagidiay nagbabawi. Ngem dagiti adalan ni Juan nagimun ken nagreklamoda kenkuana maipapan ken Jesus: “Mannursuro, . . . adtoy, isu mamautisar ket isuda amin mapanda kenkuana.”

Imbes a nagimun, nagragsak ni Juan gaput’ panagballigi ni Jesus ket kayatna nga agragsak met dagiti adalanna. Impalagipna kadakuada: “Dakayo met laeng masaksiandak a kinunak, saan a siak ti Kristo, no di ket naibaonak iti kasanguananna.” Kalpasanna nagusar iti napintas nga ilustrasion: “Ti makin-asawa iti nobia isu ti nobio. Ngem, ti gayyem ti nobio, no agtakder ket mangngegna, agrag-o unay gapu iti timek ti nobio. Ngarud daytoy rag-ok nagdanonan.”

Ni Juan, kas gayyem ti nobio, nagrag-o agarup innem a bulan kasakbayan dayta idi inyam-ammona dagiti adalanna ken Jesus. Dadduma kadakuada ti nagngayangay kas kameng ti nailangitan a klase nobia ni Kristo a buklen dagiti Kristiano a napulotan iti espiritu. Kayat ni Juan a dagiti agdama nga adalanna surotenda ni Jesus, yantangay ti panggepna isut’ panangisagana iti dalan ti naballigi a ministerio ni Kristo. Kas inlawlawag ni Juan a Mammautisar: “Isu masapul a dumakkel, ngem siak masapul a bumassitak.”

Ni Juan a kabbaro nga adalan ni Jesus, a dati nga adalan ni Juan a Mammautisar, nagsurat maipapan iti punganay ni Jesus ken ti napateg nga akemna iti pannakaisalakan ti tao, a kunkunana: “Ti umay manipud langit nangatngato ngem dagiti isuamin. . . . Ti Ama ayatenna ti Anak ket amin dagiti banag impaimanan kenkuana. Ti mangalagad ti pammati iti Anak adda biagna nga agnanayon; ti sumukir iti Anak dinanto makita ti biag, ngem ti pungtot ti Dios agtaeng kenkuana.”

Di nagbayag kalpasan a nasalaysay ni Juan a Mammautisar ti panagbassit ti mismo nga aramidna, isut’ inarestar ni Ari Herodes. Inasawa ni Herodes ni Herodias, nga asawa ni Felipe a kabsatna, ket idi imbutaktak ni Juan a di maitutop ti inaramidna, isut’ impaibalud ni Herodes. Idi nadamag ni Jesus maipapan iti pannakaarestar ni Juan, pinanawanna ti Judea ket napan sadi Galilea a kaduana dagiti adalanna. Juan 3:22–​4:3; Aramid 19:4; Mateo 28:19; 2 Corinto 11:2; Marcos 1:14; 6:17-20.

▪ Aniat’ kaiyulogan dagiti pammautisar nga indirihir ni Jesus sakbay iti panagungarna? Ken kalpasan ti panagungarna?

▪ Kasano nga impakita ni Juan a di nainkalintegan ti reklamo dagiti adalanna?

▪ Apay a naibalud ni Juan?