Kapitulo 10

Panagbiahe Idiay Jerusalem

TIEMPON ti primavera. Ket panawenen a ti pamilia ni Jose, agraman gagayyem ken kakabagianna, agpa-Jerusalemda para iti tinawen a pannakarambak ti Paskua iti primavera. Ita ta agrubbuatdan iti dayta ag-100 kilometro a biahe, maay-ayatanda a kas gagangay. Dose añosnan ni Jesus, ket segseggaanna unay ti piesta.

Para ken Jesus ken iti pamiliana, ti Paskua saan a maysa nga aldaw la a pasken. Tabunuanda pay ti sumaruno a pito-aldaw a Piesta dagiti Di Nalebaduraan a Tinapay, nga ibilangda a paset ti ti rambak ti Paskua. Kas resultana, ti intero a biahe manipud balaydat’ Nasaret, agraman isasangbayda idiay Jerusalem, alaennat’ ag-dua a lawas. Ngem iti daytoy a tawen, gapu ta adda napasamak a nakainaigan ni Jesus, bimmayag ti biaheda.

Nagminar daytoy a problema idi agawiddan manipud Jerusalem. Impagarup da Jose ken Maria a kaduada ni Jesus agraman dagiti kakabagian ken gagayyemda. Ngem idi aginanada iti rabii saanda a makita, isu a binirbirukda kadagidiay biahero a kakaduada. Ngem talaga nga awan. Isu a da Jose ken Maria nagsublida manen idiay Jerusalem a nangbirbiruk kenkuana.

Nagmalmalemda a binirbiruk, ngem napaayda. Idi maikadua nga aldaw kaskasdi a dida nasarakan. Kamaudiananna, idi maikatlo nga aldaw, napanda idiay templo. Sadiay, iti maysa a pasilio, nakitada ni Jesus nga agtugtugaw iti tengnga dagiti Judio a mannursuro, nga umim-imdeng ken agsalsaludsod kadakuada.

“Anak, apay a kasta ti inaramidmo kadakami?” inyimtuod ni Maria. “Adtoy ni amam ken siak nagaburidokami a nangbirbiruk kenka.”

Naklaat ni Jesus ta dida ammot’ nangbirukan kenkuana. “Apay a sinapsapuldak?” kunana. “Dikay kadi ammo a masapul nga addaak iti balay ni Amak?”

Di matarusan ni Jesus no apay saan nga ammo dagiti dadakkelna daytoy. Gapuna, nagawiden ni Jesus a kimmuyog kadagiti dadakkelna ket intuloynat’ nagpasakup kadakuada. Rimmang-ay iti sirib ken iti pisikal ket inanamongan ti Dios ken dagiti tao. Wen, nanipud kinaubingna, nangisaad ni Jesus ti nasayaat nga ulidan saan laeng nga iti panangbiruk kadagiti naespirituan nga interes no di pay ket iti panagraem kadagiti nagannak kenkuana. Lucas 2:40-52; 22:7.

▪ Ania a panagbiahe iti primavera ti regular nga inaramid ni Jesus a kaduanat’ pamiliana, ket kasanot’ kabayagna dayta?

▪ Aniat’ napasamak iti daydi panagbiaheda idi 12-años ni Jesus?

▪ Ania nga ulidan ti inted ni Jesus para kadagiti agtutubo ita?