Kapitulo 50

Panagsagana a Sumango iti Pannakaidadanes

KALPASAN panangisurona kadagiti apostolna kadagiti metodo a panangaramid iti panangasaba, pinakdaaran ni Jesus ida maipapan kadagiti bumusbusor. Kunana: “Adtoy! Siak ibaonkayo a kasla karnero iti tengnga dagiti lobo . . . Agalluadkayo kadagiti tattao; ta iyawatdakayto kadagiti pangukoman, ken kadagiti sinagogada saplitendakayto. Ket maisaklangkayto pay kadagiti agturay ken ar-ari a maipuon kaniak.”

Agpapan pay iti nakaro a pannakaidadanes a maipasango kadagiti paspasurotna, ipasigurado dagiti karkari ni Jesus: “Ngem inton iyawatdakayo, dikay agdanag no kasano ti panagsaoyo wenno ania ti sawenyonto; ta iti dayta met laeng nga oras maitedto kadakayo no aniat’ sawenyonto; ta saan a dakayo ti agsao no di ket ti espiritu ni Amayo ti agsao a mangaramat kadakayo.”

“Ket,” intuloy ni Jesus, “ti kabsat a lalaki iyawatnanto ni kabsatna a lalaki ken patay, ket ti ama iti anakna, ket dagiti annak tumakderdanto a bumusor kadagiti dadakkelda ket papapataydanto ida.” Innayonna pay: “Ket kaguradakayto dagiti amin a tao gapu iti naganko; ngem ti makaitured agingga iti panungpalan isu ti maisalakanto.”

Ti panangasaba ket dakkel ti pategna. Gapu iti daytoy a rason impaganetget ni Jesus ti pannakasapul ti panagannad tapno agtalinaed a siwayawaya a mangaramid iti trabaho. “Ngem inton idadanesdakayo iti maysa a siudad, pumanawkayo a mapan iti sabali,” kunana, “ta pudno kunak kadakayo, Dikayto pay la napagna dagiti siudad ti Israel agingga a dumteng ti Anak ti tao.”

Pudno nga inted ni Jesus daytoy nga instruksion, pakdaar, ken pammaregta kadagiti 12 nga apostolna, ngem daytat’ nairanta met nga agpaay kadagidiay makiraman iti sangalubongan a panangaskasaba kalpasan iti ipapatay ken panagungarna. Daytoy ti naipakita iti panagkunana a dagiti ad-adalanna ket ‘guraento amin dagiti tattao,’ saan laeng a dagiti Israelitas a nakaibaonan dagiti apostol a pangasabaan. Mainayon pay, kaawatan a dagiti apostol saanda a naisango kadagiti gobernador ken ar-ari idi imbaon ida ni Jesus iti ababa laeng a panangaskasabada. Kasta met, dagiti manamati saanda a naiyawat ken patay babaen kadagiti miembro ti pamiliada.

Gapuna nga idi kunana a dagiti adalanna saandanto pay la a napagna dagiti pagnaenda a pangasabaan “agingga a dumteng ti Anak ti tao,” naimpadtuan nga ibagbaga ni Jesus kadatayo a dagiti adalanna didanto pay la a napagna a naan-anay ti sirkito ti intero a napagnaedan a daga iti panangaskasaba maipapan iti naipasdeken a Pagarian ti Dios sakbay a dumteng ti naipadayag nga Ari a Jesu-Kristo kas ti manangikisap ni Jehova inton Armagedon.

Iti panangitultuloyna iti instruksionna iti panangasaba, kuna ni Jesus: “Ti adalan saan a natantan-ok ngem iti mannursuro kenkuana, ken saan met a natantan-ok ti tagabo ngem ni apona.” Gapuna rebbeng a namnamaen dagiti pasurot ni Jesus ti umawat iti isu met laeng a dakes a pannakatrato kas kenkuana gapu iti panangikaskasaba ti Pagarian ti Dios. Kaskasdi isu ti namagbaga: “Ket saanyo a pagbutngan dagiti mamapatay iti bagi ngem ti kararua dida mabalin a papatayen; ngem pagbutnganyo ketdi daydiay makabalin a mangpukaw iti kararua ken iti bagi idiay Gehenna.”

Masapul a mangipakita ni Jesus iti ulidan iti daytoy a banag. Awanan buteng nga ibturanna ti ipapatay imbes nga ikompromisona ti kinasungdona iti Daydiay addaan iti isuamin a pannakabalin, ni Jehova a Dios. Wen, ni Jehova ti makapapatay ti “kararua” (kayatna a sawen iti daytoy a kanito isut’ masakbayan ti maysa kas sibibiag a kararua) ti maysa ket mapagungarna met ti maysa a tao tapno tagiragsakenna ti biag nga agnanayon. Anian a managayat, nadungngo a nailangitan nga Ama ni Jehova!

Sumaganad pinaregta ni Jesus dagiti adalanna iti maysa a pangngarig a nangitampok iti kinamanagayat ni Jehova kadakuada. “Saan aya a malako ti dua a billit tuleng iti maysa a sentabo?” insaludsodna. “Ket uray maysa kadakuada saan a matnag iti daga no saan nga ipalubos ni Amayo. Ket uray dagiti buokyo nabilangda amin. Gapuna dikay agbuteng: ta napatpategkayo ngem kadagiti adu a billit tuleng.”

Ti mensahe ti Pagarian nga imbilin ni Jesus nga iwaragawag dagiti adalanna ket isunto ti mamagbingaybingay kadagiti sangakabbalayan, ta dadduma a kamkameng ti pamilia awatenda dayta ket dadduma laksidenda. “Dikayo pagarupen nga immayak a mangiyeg ti talna iti rabaw ti daga,” inlawlawagna. “Immayak saan a mangted ti talna, no di ket ti kampilan.” Gapuna, iti kameng ti pamilia a mangabrasa iti kinapudno ti Biblia sapulenna ti kinamaingel. “Ti agayat ti ama wenno ina a nangnangruna ngem siak saan a maikari kaniak,” kuna ni Jesus, “ken ti agayat iti anak a lalaki wenno babai a nangnangruna ngem siak ket saan a maikari kaniak.”

Iti panamagpatinggana iti bilbilinna, inlawlawag ni Jesus a dagiti umawat kadagiti adalanna awatenda met isuna. “Ket uray siasino a mangpainumto iti maysa kadagiti babassit nga ub-ubbing iti sangabaso laeng a danum a nalamiis iti nagan ti maysa nga adalan, pudno kunak kadakayo, a dinanto mapukaw ti gunggonana.” Mateo 10:16-42.

▪ Ania dagiti pakdaar nga impaay ni Jesus kadagiti adalanna?

▪ Ania a pammaregta ken liwliwa ti intedna kadakuada?

▪ Apay a dagiti bilbilin ni Jesus agaplikar met kadagiti moderno-aldaw a Kristiano?

▪ Iti ania a pamay-an a ti adalan ni Jesus saan a natantan-ok ngem ti mannursurona?