Kapitulo 17

Panangisuro ken Nicodemo

BAYAT nga at-atenderannat’ Paskua idi 30 K.P. nangaramid ni Jesus kadagiti datdatlag a pagilasinan, wenno milagro. Kas banagna, adut’ namati kenkuana. Ni Nocodemo, a miembro ti Sanhedrin, ti nangato a korte dagiti Judio, naallukoy ket kayatnat’ makaadal iti ad-adu. Gapuna binisitana ni Jesus bayat ti rabii, a nalabit kabutengna a maperdit’ dayawna kadagiti dadduma a panguluen a Judio no isut’ makitada.

“Mannursuro,” kunana, “ammomi a maysaka a mannursuro a naggapu iti Dios; ta awan ti makabalin a mangaramid kadagitoy a pagilasinan no awan ti Dios kenkuana.” Kas sungbatna, imbagan Jesus ken Nicodemo a tapno makastrek iti Pagarian ti Dios, masapul a ti maysa ket “maiyanak a mabaliwan.”

Ngem, kasano a maiyanak a mabaliwan ti maysa a tao? “Mabalin kadi a sumrek manen iti aanakan ni inana ket maiyanak?” inyimtuod ni Nicodemo.

Saan, saan a daytat’ kaipapanan ti maiyanak a mabaliwan. “No ti maysa saan a maiyanak iti danum ken iti espiritu,” inlawlawag ni Jesus, “saanto makastrek iti pagarian ti Dios.” Idi nabautisaran ni Jesus ket bimmaba kenkuana ti nasantuan nga espiritu, isut’ naiyanak “iti danum ken iti espiritu.” Babaen iti naikuykuyog a waragawag manipud langit, ‘Daytoy ti Anakko nga inanamongak,’ imbunannag ti Dios nga isut’ nangpataud iti naespirituan nga anak nga addaan namnama a makastrek iti nailangitan a Pagarian. Kalpasanna, inton Pentecostes 33 K.P., dadduma a bautisado umawatdanto iti nasantuan nga espiritu ket iti kasta maiyanakdanto met kas naespirituan nga annak ti Dios.

Ngem nasken ti akem ti naisangsangayan a natauan nga Anak ti Dios. “No kasano ti panangibayog ni Moises iti uleg idiay let-ang,” kuna ni Jesus ken Nicodemo, “kasta met a ti Anak ti tao maibayog, tapno amin a mamati kenkuana maaddaan ti biag nga agnanayon.” Wen, no kasano a dagidi Israelita a nakagat iti nagita nga uleg rebbeng a kumitada iti uleg a suer tapno maisalakan, kasta met a kasapulan amin a tattao ti mangalagad iti pammati iti Anak ti Dios tapno maisalakanda manipud iti matmatay a kasasaadda.

Tapno ipaganetget ti naayat nga akem ni Jehova itoy, simmaganad a kinuna ni Jesus ken Nicodemo: “Ta kasta la unay ti panagayat ti Dios iti lubong nga intedna ti Anakna a bugbugtong, tapno amin a mangalagad ti pammati kenkuana saan a mapukaw no di ket adda biagna nga agnanayon.” Gapuna, ditoy Jerusalem innem la a bulan manipud panangiruginat’ ministeriona, imbataden ni Jesus nga isut’ usaren ni Jehova a Dios a mangisalakan iti sangatauan.

Inlawlawag pay ni Jesus ken Nicodemo: “Ta saan nga imbaon ti Dios ti Anakna iti lubong, a mangukom iti lubong,” kayatna a sawen, saanna nga ukomen a sikakas-ang, wenno kondenaren dayta, a sentensiaan ti sangatauan iti pannakadadael. Imbes ketdi, kas kuna ni Jesus, isut’ naibaon “tapno ti lubong maisalakan gapu kenkuana.”

Immay a sibubuteng ni Nicodemo ken ni Jesus nga isut’ naglemmeng iti kasipngetan. Gapuna nagsayaat ti panangipatingga ni Jesus iti pannakisaritana kenkuana babaen iti panagkunana: “Ket daytoy ti pakaukoman, ta ti silaw [nga imbagi ni Jesus iti kabibiagna ken kadagiti pannursurona] immay iti lubong ngem ti tattao inayatda ti sipnget a nangnangruna ngem ti lawag, ta dakes dagiti aramidda. Ta asinoman nga agaramid iti dakes guraenna ti lawag ket saan nga umay iti lawag, di la ket ta dagiti aramidna mababalaw. Ngem ti agaramid ti pudno umay iti lawag, tapno dagiti aramidna maiparangarang a naaramidda a maiyannurot iti Dios.” Juan 2:23–​3:21; Mateo 3:16, 17; Aramid 2:1-4; Numeros 21:9.

▪ Aniat’ nangtignay iti ibibisita ni Nicodemo, ket apay a rabii ti iyaayna?

▪ Aniat’ kaipapanan ti “maiyanak a mabaliwan”?

▪ Kasanot’ panangilawlawag ni Jesus iti akemna iti pannakaisalakantayo?

▪ Aniat’ kaipapananna a ni Jesus saan nga immay a mangukom iti lubong?