Kapitulo 57

Panangngaasi Kadagiti Marigrigat

KALPASAN ti panangbabalawna kadagiti Fariseo iti panangsurotda kadagiti tradisionda, pimmanaw ni Jesus a kadua dagiti adalanna. Di nabayag sakbayna, mabalin a malaglagipyo, a ti panangikagumaanna a pumanaw a kaduana ida tapno aginana ket nasinga idi nasarakan ida ti bunggoy. Itan, kaduana dagiti adalanna, pimmanaw a mapan kadagiti luglugar iti Tiro ken Sidon, adu a kilometros nga agpaamianan. Nalawag a daytoy isut’ kakaisuna a panagbiahe nga inaramid ni Jesus a kaduana dagiti adalanna iti labes dagiti beddeng ti Israel.

Kalpasan ti pannakasarakna iti maysa a balay a pagnaedanda, impakaammo ni Jesus a dina kayat a maammuan ti siasinoman ti ayanda. Kaskasdi, uray pay iti daytoy saan nga Israelita a teritoria, dina maliklikan ti pannakabigbigda kenkuana. Maysa a Griega, a naipasngay idiay Fenecia iti Siria, ti nakasarak kenkuana ket rinugianna ti nagdawat: “Apo, Anak ni David, kaasiannak. Ti anakko a babai maparigat la unay iti maysa a sairo.” Ni Jesus, nupay kasta, saan a simmungbat iti uray maysa a sao.

Kamaudiananna, imbaga dagiti adalanna ken Jesus: “Pagawidem; ta isu agik-ikkis iti likudantayo.” Iti panangilawlawagna iti dina panangikankano kenkuana, kuna ni Jesus: “Saanak a naibaon no di kadagiti karnero a napukaw iti balay ti Israel.”

Nupay kasta, di nagsardeng ti babai. Immadani ken Jesus ket nagruknoy iti sanguananna. Nagpakaasi, “Apo, badangannak!”

Anian ti pannakatignay ti puso ni Jesus iti napasnek a panagdawdawat ti babai! Kaskasdi, intudona a ti umuna a rebbengenna, isu ti panagserbina iti ili ti Dios nga Israel. Iti dayta met laeng a tiempo, a nalawag tapno suoten ti pammatina, impasimudaagna ti panangidumduma dagiti Judio kadagiti dadduma a nasion, a kunkunana: “Saan a maiparbeng nga alaen ti tinapay dagiti annak, ket ibakal kadagiti uken.”

Babaen iti naasi a tuno ti timek ken ti ebkas ti rupana, sigurado nga impalgak ni Jesus ti kinamanangngaasina kadagiti saan a Judio. Pinaluknengna pay ti pannakaipadis dagiti Gentil kadagiti aso babaen ti panangtukoyna kadakuada a kas “babassit nga aso,” wenno uken. Imbes a masaktan, naawatan ti babai ti panangtukoy ni Jesus iti panangidumduma dagiti Judio ket nangaramid iti napakumbaba a kapaliiwan: “Wen Apo; ngem dagiti uken manganda met kadagiti murkat a maregreg iti panganan dagiti appoda.”

“O babai, dakkel ti pammatim,” kinuna ni Jesus. “Maaramid koma kenka a kas tarigagayam.” Ket naaramid a kasta! Idi nakaawiden iti pagtaenganna, nasarakanna ti anakna iti kama, a naan-anay a naimbaganen.

Manipud iti luglugar iti igid ti baybay iti Sidon, ni Jesus ken dagiti ad-adalanna binallasiwda ti pagilian a nagturong iti pagayusan ti dandanum nga agturong iti Karayan Jordan. Nalawag a binallasiwda ti Jordan sadiay ngatuen iti Baybay iti Galilea ket simrekda iti lugar ti Decapolis iti daya ti baybay. Sadiay immulida iti bantay, ngem nasarakan ida ti bunggoy ket inyegda ken Jesus dagiti masaksakitda a pilay, baldado, bulsek, ken umel, ken adu a masaksakit ken dagiti singkol. Dagitoy inkabilda iti sakaanan ni Jesus, ket inagasanna ida. Nasdaaw dagiti tattao, bayat a makitada nga agsasao dagiti umel, magmagna dagiti pilay, ken makakita dagiti bulsek; ket isuda amin dinaydayawda ti Dios ti Israel.

Ni Jesus ipaayanna ti naisangsangayan nga atension ti maysa a lalaki nga agpadpada a tuleng ken ngangngani saan a makasao. Dagiti tuleng masansan a nalakada a mabainan, nangnangruna iti ummong ti bunggoy. Nadlaw ni Jesus daytoy naisangsangayan a panagnerbios ti lalaki. Gapuna siaasi nga inyadayo ni Jesus manipud iti bunggoy. Idi duduadan, impamatmat ni Jesus no ania ti aramidenna kenkuana. Inkabilna dagiti ramayna iti lapayag ti lalaki ket, kalpasan ti itutuprana, sinagidna ti dilana. Kalpasanna, idi timmangad iti langit, nagasug ni Jesus ket kinunana: “Malukatan.” Iti kasta, dagus a nalukatan dagiti pagdengngegna, ket nagsao iti nalawag.

Idi naaramiden ni Jesus dagitoy adu a panangagas, nangipakita ti bunggoy iti panangapresiar. Kunada: “Naimbag ti panangaramidna iti isuamin. Uray dagiti tuleng aramidenna a makangngegda ken dagiti umel agsaoda.” Mateo 15:21-31; Marcos 7:24-37.

▪ Apay a saan nga inagasan a dagus ni Jesus ti anak ti Griega?

▪ Kalpasanna, sadino ti nangiturongan ni Jesus kadagiti adalanna?

▪ Kasano a siaasi nga inagasan ni Jesus ti tuleng a lalaki a ngangngani saan a makasao?