Kapitulo 25

Panangngaasi iti Agkukutel

BAYAT a sarsarungkaran ni Jesus ken dagiti uppat nga adalanna dagiti siudad ti Galilea, ti damag maipapan kadagiti nakaskasdaaw a bambanag nga ar-aramidenna nagsaknap iti intero a distrito. Ti damag kadagiti ar-aramidna dimmanon iti maysa a siudad a sadiay adda maysa a lalaki nga agkukutel. Isut’ dineskribir ni mangngagas a Lucas kas “nalungpos iti kukutel.” Iti nakaro unayen a kasasaadna, daytoy nakaam-amak a sakit, agin-inut a dadaelenna ti langa dagiti nadumaduma a paspaset ti bagi. Gapuna daytoy nga agkukutel nakaayay-ay ti kasasaadna.

Idi nakagteng ni Jesus iti siudad, immasideg ti agkukutel kenkuana. Sigun iti Linteg ti Dios, ti maysa nga agkukutel umawag a kas pammakdaar, “Narugit, narugit!” tapno salakniban dagiti dadduma manipud iti iyaasidegda unay ket irisgo ti pannakaalisda. Ita nagruknoy ti agkukutel ket indawatna ken Jesus: “Apo, no kayatmo, mabalinnak a dalusan.”

Anian a pammati ti adda iti daytoy a lalaki ken Jesus! Kaskasdi, anian a nakaayay-ay ti namagbalinan daytoy a sakit kenkuana! Aniat’ aramiden ni Jesus? Ania komat’ aramidenyo? Natignay gaput’ asina, inyawat ni Jesus ti imana ket sinagidna ti lalaki, a kunkunana: “Kayatko. Madalusanka koma.” Ket naigiddato a ti kukutel pimmanaw kenkuana.

Kayatyo kadi ti maaddaan iti maysa a kastoy ti kinamanangngaasina nga agbalin nga ariyo? Ti panangtrato ni Jesus iti daytoy nga agkukutel ti mangted panagtalek a bayat iti panagturayna iti Pagarianna, ti padto ti Biblia matungpalto: “Mangngaasinto kadagiti napanglaw ken makasapul, ket ti kararua dagiti makasapul isalakannanto.” Wen, penkento ni Jesus ti tarigagay ti pusona a mangtulong kadagiti isuamin nga addaan an-anayen.

Uray pay sakbay ti pannakaagas ti agkukutel, ti ministerio ni Jesus patpataudennan ti dakkel a ragsak kadagiti tattao. Kas kaitungpalan iti padto ni Isaias, binilin ni Jesus ti naagasan a tao: “Kitaem ta dika ibaga iti uray siasino.” Kalpasanna binilinna: “Inka, agparangka iti saserdote ket idatonmo ti maipaay iti pannakagugormo kas imbilin ni Moises, tapno pakapaneknekanda.”

Ngem ti lalaki napalalo ti ragsakna ta dina mailimed ti milagro. Isut’ rimmuar ket rinugianna nga insaknap ti damag iti uray sadino, a nalawag a nangpataud iti kasta unay a panaginteres ken panagusiuso kadagiti tattao ta saanen a makapan a sipapanayag ni Jesus idiay siudad. Gapuna, nagtaeng ni Jesus kadagiti napakni a luglugar a sadiay awan dagiti aggigian, ket dagiti tattao a naggapu iti isuamin a disso immayda a dimngeg kenkuana ken paagasan dagiti saksakitda. Lucas 5:12-16; Marcos 1:40-45; Mateo 8:2-4; Levitico 13:45; 14:10-13; Salmo 72:13; Isaias 42:1, 2.

▪ Aniat’ mabalin nga epekto ti kukutel, ket ania a pammakdaar ti masapul nga ited ti agkukutel?

▪ Kasano a nagdawat ti maysa nga agkukutel ken Jesus, ket aniat’ maadaltayo manipud sungbat ni Jesus?

▪ Kasano a di nagtulnog daydiay lalaki a naagasan ni Jesus, ket ania dagiti imbungana?