Kapitulo 44

Panangpaulimek ti Nakabutbuteng a Bagio

TI ALDAW ni Jesus napunno iti trabaho, agraman panangisuro kadagiti umariwekwek iti igid ti baybay ken kalpasanna ti panangilawlawag a pribado kadagiti pangngarig kadagiti ad-adalanna. Idi rumabiin, kunana: “Intayo idiay sabali a bangir.”

Idiay makindaya nga igid ti Baybay ti Galilea isu ti disso a maaw-awagan ti Decapolis, manipud Griego a deʹka, a kaipapananna “sangapulo,” ken poʹlis, kayatna a sawen “siudad.” Dagiti siudad idiay Decapolis isudat’ sentro ti kultura a Griego, nupay awan duadua, isuda met ti pagtaengan dagiti adu a Judio. Ti trabaho ni Jesus iti dayta a paset, nupay kasta, ket limitado unay. Uray pay iti daytoy a panagsarungkar, kas iti intayto makita iti kamaudiananna, isut’ malapdan iti panagtalinaedna a mabayag sadiay.

Idi indawat ni Jesus a mapandan idiay sabali a bangir, dagiti ad-adalan ti nangipan kenkuana iti barangay. Ti ipapanawda, nupay kasta, saan a di nadnadlaw. Di nagbayag dagiti dadduma nagluganda met iti barangay a kumuyog kadakuada. Saan unay nga adayo ti ibaballasiw. Kinapudnona, ti Baybay ti Galilea ket maysa laeng a dakkel a danaw nga agarup 21 kilometros ti kaatiddogna ket 12 kilometros ti kaakabaan a pasetna.

Kaawatan a nabannogen ni Jesus. Gapuna, di nagbayag kalpasan ti panaglayagda, isut’ nagidda idiay likudan ti barangay, nga inkabilna ti ulona iti maysa a pungan, ket nakaturogen. Sumagmamano kadagiti apostol ti addaanen kapadasan a marinero, ta iti kaaduan a paset iti Baybay ti Galilea ti nagdakdaklisandan. Gapuna inaywananda ti panaglayag ti barangay.

Ngem saan nga agbalin daytoy a nalaka a panagdaliasat. Gapu iti nabarbara a temperatura iti rabaw ti danaw, nga agarup 210 metros iti baba ti patas ti baybay, ken ti nalamlamiis nga angin dagiti asideg a kabambantayan, dagiti napigsa nga angin no maminsan ti agpababa ket mamataudda iti bigla a narungsot a panagbagiona idiay danaw. Isu daytoy itan ti mapasamak. Di nagbayag dagiti allon umablatdan iti sikigan ti barangay ket dinaripespesda dayta, gapuna daytat’ ngangnganin malapunos. Kaskasdi, intultuloy ni Jesus ti naturog!

Dagiti adut’ kapadasannan a marinero nagtignayda a sidadanag a mangiturong iti barangay. Awan duadua a nakapagmaniobrada idin a limmasat kadagiti bagio. Ngem ita addadan iti pagpatinggaan dagiti pigsa ken pannakaammoda. Gaput’ panangidanagda kadagiti biagda, riniingda ni Jesus. ‘Mannursuro, saanka aya a madanagan? Lumlumnedtayon!’ indir-ida. ‘Isalakannakami, malmalmestayon!’

Ket idi a makariing, tinubngar ni Jesus ti angin ken ti baybay: “Agulimekka! Agtalnaka!” Ket ti nakapigpigsa nga angin nagsardeng ket ti baybay timmalna. Ket idi sinangona dagiti adalanna, insaludsodna: ‘Apay-apay a sibubutengkayo? Awan pay aya ti pammatiyo?’

Iti dayta, dimteng ti dakkel a panagbuteng kadagiti adalan. ‘Asino aya daytoy a tao?’ insaludsodda iti maysa ken maysa, ‘ta bilinenna uray ti angin ken ti danum, ket agtulnogda kenkuana.’

Anian a pannakabalin ti impakita ni Jesus! Anian a makapatibker ti pannakaammo a ti Aritayo addaan ti pannakabalin uray kadagiti natural nga elemento ket no ti naan-anay nga atensionna maiturong iti dagatayo bayat ti panagturayna iti Pagarian, amin a tattao agtalinaedto a sitatalged manipud kadagiti nakabutbuteng a natural a kalamidad!

Di nagbayag kalpasan ti panagtalna ti bagio, ni Jesus ken dagiti adalanna nakagtengda a sitatalged idiay makindaya nga igidna. Nalabit dagiti dadduma a barangay naispalda met iti kinapigsa ti bagio ket sitatalged a nakapagawidda. Marcos 4:35–​5:1; Mateo 8:18, 23-27; Lucas 8:22-26.

▪ Ania ti Decapolis, ket sadinot’ pakasarakan iti dayta?

▪ Ania dagiti pisikal a ramramit a makimbiang kadagiti napipigsa a bagio idiay Baybay ti Galilea?

▪ Idi dagiti kinasigoda iti panaglayag ket saanen a makaisalakan kadakuada, aniat’ aramiden dagiti adalan?