Kapitulo 34

Panangpili Kadagiti Apostolna

AGARUP maysa ket kagudua a tawenen nanipud inyam-ammo ni Juan a Mammautisar ni Jesus kas Kordero ti Dios ket rinugian ni Jesus ti ministeriona iti publiko. Iti dayta a tiempo ni Andres, Simon Pedro, Juan, ken nalabit ni Santiago (kabsat ni Juan), agraman ni Felipe ken Nathanael (a managan met Bartolome), nagbalinda nga immuna nga ad-adalanna. Idi agangay, adu pay dagiti dadduma a timmipon kadakuada a simmurot ken Kristo.

Itan ni Jesus sisasaganan a mangpili kadagiti apostolna. Dagitoyto dagiti nasinged a kakaduana a maikkan iti naisangsangayan a panagsanay. Ngem sakbay ti panangpilina kadakuada napan ni Jesus iti maysa a bantay ket binusbosna ti agpatpatnag iti panagkararag, awan duadua indawatna a maaddaan ti kinasirib ken ti pammendision ti Dios. Idi bumigaten, inawaganna dagiti adalanna ket manipud kadakuada pimmili ti 12. Nupay kasta, yantangay nagtultuloy a sursuruan ida ni Jesus kaskasdi maawaganda pay met nga adalanna.

Innem kadagiti pinili ni Jesus a nainaganan iti ngato, isuda dagiti immuna nga adalanna. Ni Mateo, nga inawis ni Jesus manipud iti opisinana iti buis, napili met. Dagiti lima pay a napili, isu da Judas (a napanaganan met Tadeo), ni Judas Iscariote, ni Simon a Cananeo, ni Tomas ken ni Santiago nga anak ni Alfeo. Daytoy a Santiago naawagan met Santiago a Basbassit, nalabit gapu ta basbassit ti pammagina wenno ub-ubing ngem iti sabali nga apostol Santiago.

Ita dagitoy a 12 nakikuykuyogdan ken Jesus iti nawadwad metten a tiempo, ket pagaammona unay idan. Kinapudnona, sumagmamano kadakuada dagiti mismo a kabagianna. Ni Santiago ken ni Juan a kabsatna kaawatan a kasinsin ni Jesus. Ken mabalin a mapaneknekan a ni Alfeo ket kabsat ni Jose, ti nagsioman ken Jesus. Gapuna ti anak ni Alfeo, ni apostol Santiago, ket kasinsin met ni Jesus.

Ni Jesus, siempre, awan parikutna a manglaglagip iti nagan dagiti apostolna. Ngem malagipyo aya ida? Bueno, laglagipenyo laeng a dua ti agnagan Simon, dua ti agnagan Santiago, ken dua ti agnagan Judas, ket ni Simon adda kabsatna a ni Andres, ket ni Santiago adda kabsatna a ni Juan. Dayta ti tulbek ti pananglaglagip iti walo nga apostol. Dagiti uppat pay iramanna ti agsingsingir ti buis (ni Mateo), maysa ti nagduadua iti kamaudiananna (ni Tomas), maysa ti naawagan manipud sirok ti maysa a kayo (ni Nathanael), ken ni gayyemna a Felipe.

Sangapulo ket maysa kadagiti apostol ti taga Galilea, ti teritoria a pagtaengan ni Jesus. Ni Nathanael ket taga Cana. Ni Felipe, Pedro ken ni Andres datida a taga Betsaida, ni Pedro ken ni Andres immakarda iti kamaudiananna idiay Capernaum, a mabalin a nagtaengan met ni Mateo. Ni Santiago ken ni Juan addada iti trabaho a panagdaklis ket nalabit nagtaengda met idiay wenno iti arubayan ti Capernaum. Agparang a ni Judas Iscariote, a nangliput ken ni Jesus iti kamaudiananna, ti kakaisuna nga apostol a taga Judea. Marcos 3:13-19; Lucas 6:12-16.

▪ Asino dagiti apostol a mabalin a kabagian ni Jesus?

▪ Asino dagiti apostol ni Jesus, ket kasanoyo a laglagipen ti nagnaganda?

▪ Sadino a teritoria ti naggapuan dagiti apostol?