Kapitulo 105

Panangrugi ti Nagpateg nga Aldaw

IDI pimmanaw ni Jesus idiay Jerusalem iti rabii ti Lunes, nagsubli idiay Betania idiay akindaya nga arisadsad ti Bantay dagiti Olivo. Ti dua nga aldaw ti maudi a ministeriona idiay Jerusalem nairingpasen. Awan duadua a binusbos manen ni Jesus ti rabii a kadua ni Lazaro a gayyemna. Nanipud idadatengna manipud Jerico iti Biernes, daytoy ti maikapat a rabii a binusbosna idiay Betania.

Itatta, iti agsapa ti Martes, Nisan 11, isu ken dagiti adalanna addada manen iti dalan. Daytoy ti nagpateg nga aldaw iti ministerio ni Jesus, ti kaokupaduan pay laeng. Isut’ maudi nga aldaw a panagparangna idiay templo. Ken isut’ maudi nga aldaw ti ministeriona iti publiko sakbay ti pannakaukom ken pannakapapatayna.

Ni Jesus ken dagiti adalanna sinurotda ti isu met laeng a ruta idiay Bantay dagiti Olivo nga agturong Jerusalem. Idiay dalan manipud Betania, nadlaw ni Pedro ti kayo nga inlunod ni Jesus iti napalabas nga agsapa. “Kitaem, mannursuro!” indir-ina, “daydi kayo ti igos nga inlunodmo nagango.”

Ngem apay a pinapatay ni Jesus ti kayo? Impamatmatna no apay idi intuloyna a kinuna: “Pudno kunak kadakayo, a no addanto pammatiyo ket dikayto agduadua, saan la nga aramidenyonto ti kastoy iti kayo ti igos, no di uray pay itoy bantay [ti Bantay dagiti Olivo a pagtaktakderanda] no kunaenyonto, ‘Pumanawka ket agtappuakka iti taaw,’ maaramidto. Ket amin a dawatenyonto iti panagkararag, no sipapatikayo, awatenyonto.”

Gapuna babaen ti panangpagangona ti kayo, mangmangted ni Jesus kadagiti adalanna ti leksion maipapan iti pannakasapul ti panamatida iti Dios. Kas kinunana: “Amin a dawatenyonto iti panagkararag, no sipapatikayo, awatenyonto.” Anian a nagpateg a leksion a maadalda, nangnangruna gapu kadagiti nakaam-amak a suot a dandanin dumteng kadakuada! Kaskasdi, adda pay sabali a koneksion ti pannakagango ti kayo nga igos ken ti kualidad ti pammati.

Ti nasion ti Israel, kas itoy kayo nga igos, addaan makaallilaw a langa. Nupay ti nasion adda iti naitulag a relasion iti Dios ket iti pammarang mabalin salsalimetmetanna dagiti pagalagadanna, napaneknekan dayta nga awanan pammati, lupes iti naimbag a bungbunga. Gaput’ kinakurang ti pammati, madama pay idin a laklaksidenda ti mismo nga Anak ti Dios! Gapuna babaen iti panangpagangona ti kayo ti igos nga awan bungana, silalawag nga indemostra ni Jesus no aniat’ panungpalanto daytoy awan bungana, awan pammatina a nasion.

Di nagbayag, simrek ni Jesus ken dagiti adalanna idiay Jerusalem, ket kas ti kustombreda, mapanda idiay templo, a sadiay rinugian ni Jesus ti nangisuro. Dagiti pangulo a papadi ken panglakayen ti ili, nga awan duadua silalagipda pay iti inaramid ni Jesus iti napalabas nga aldaw kontra kadagiti managsukat ti kuarta, ti nangkarit kenkuana: “Ania a pannakabalin ti panangaramidmo kadagitoy? Ket siasino ti nangted kenka itoy a pannakabalin?”

Kas sungbat kinuna ni Jesus: “Siak, imtuodek met kadakayo ti maysa a banag. Isu a no masungbatanyo kaniak, ibagakto met kadakayo no ania a pannakabalin ti panangaramidko kadagitoy a banag: Ti pammautisar ni Juan, adino ti naggapuanna? Iti langit wenno kadagiti tao?”

Dagiti papadi ken panglakayen nagiinnumanda nga is-isuda no kasanot’ isusungbatda. “No kunaenminto, ‘Iti langit,’ kunaennanto kadakami, ‘Apay-apay ngarud a dikay pinati?’ Ngem no kunaenminto, ‘Kadagiti tao,’ kabutengmi dagiti umili, ta isuda amin imbilangda a ni Juan mammadto.”

Saan nga ammo dagiti papangulo ti isungbatda. Gapuna simmungbatda ken Jesus: “Dikam ammo.”

Ket ni Jesus, kinunana met: “Uray siak diak met ibaga kadakayo no ania a pannakabalin ti pangaramidko kadagitoy a banag.” Mateo 21:19-27; Marcos 11:19-33; Lucas 20:1-8.

▪ Aniat’ pateg ti Martes, Nisan 11?

▪ Ania dagiti leksion nga impaay ni Jesus idi a pinagangona ti kayo nga igos?

▪ Kasanot’ panangsungbat ni Jesus kadagidiay nagimtuod no aniat’ pannakabalinna nga agaramid kadagiti bambanag?