Kapitulo 85

Panangsapul iti Napukaw

MAGAGARAN ni Jesus a mangbiruk ken mangsapul kadagidiay agserbi iti Dios a sipapakumbaba. Gapuna agsapsapul ken makisasao iti tunggal maysa maipapan ti Pagarian, agraman kadagiti nakaro a managbasol. Itatta dagita a tattao umadanida a dumngeg kenkuana.

Idi mapaliiwda daytoy, ni Jesus ti binabalaw dagiti Fariseo ken eskribas gaput’ pannakikuykuyogna kadagiti tattao a pagarupda a di maikari. Intantanabutobda: “Daytoy awatenna dagiti managbasol ket makipangan kadakuada.” Anian a panangipababa unay dayta iti dayawda! Ikukuenta dagiti Fariseo ken eskribas dagiti ordinario a tattao kas rugit iti baba ti saksakada. Kinapudnona, usarenda ti sao a Hebreo nga ‘am ha·’aʹrets, “tattao iti daga,” tapno ipakita ti panangtagibassitda iti kakasta.

Iti kasumbangirna, trinato ni Jesus ti tunggal maysa a sidadayaw, siaasi, ken sidudungngo. Kas resultana, adu kadagidiay napanglaw, agraman tattao a nalalatak iti panagar-aramid ti dakes, ti magagaran a dumngeg kenkuana. Ngem kasanon daydiay pammabalaw dagiti Fariseo ken Jesus gaput’ panagbambannogna a maipaay kadagidiay ikukuentada a di maikari?

Sinungbatan ni Jesus ti isusuppiatda babaen iti panangusarna ti pangngarig. Nagsao manipud mismo a panangmatmat dagiti Fariseo, a kasla isudat’ nalinteg ken natalged iti pagtaraknan ti Dios, bayat a dagiti awan kaes-eskanna nga ‘am ha·’aʹrets naiyaw-awanda ket addada iti napukaw a kasasaad. Umimdengkayo bayat a saludsodenna:

“Asino kadakayo ti adda sangagasut a karnerona, no mapukawna ti maysa kadakuada, dina panawan iti away dagiti siamapulo ket siam ket mapanna sapulen ti napukaw agingga ti masarakanna? Ket inton masarakannan ikabilna a siraragsak kadagiti abagana. Ket inton agsubli iti balay urnongenna dagiti gagayyemna ken kakaarrubana, a kunkunana kadakuada, ‘Makipagrag-okay kaniak, ta nasarakak ti karnerok a napukaw.’”

Kalpasanna ni Jesus ket nangaramid aplikasion iti estoria, nga inlawlawagna: “Kasta met nga ad-addanto ti ragsak sadi langit gapu iti maysa a managbasol nga agbabawi, ngem kadagiti siamapulo ket siam a nasingpet a dida masapul ti panagbabawi.”

Ibilbilang dagiti Fariseo ti bagbagida a nalinteg ket ngarud saanda a kasapulan ti panagbabawi. Idi dadduma kadakuada ti nangbabalaw ken Jesus dua a tawen sakbayna gaput’ pannakipangpanganna kadagiti agsingsingir ti buis ken managbasol, imbagana kadakuada: “Ta saanak nga immay nga agayab kadagiti nalinteg, no di ket kadagiti managbasol.” Dagiti aginlilinteg a Fariseo, a dida nakita ti pannakasapul ti panagbabawi, dida mangyeg rag-o idiay langit. Ngem dagiti managbasol a pudpudno a nagbabawi mangteddat’ rag-o.

Tapno madoblenat’ kapigsa ti punto a ti pannakaisubli dagiti napukaw a managbasol ket pagtaudan ti dakkel a ragsak, nangisalaysay manen ni Jesus ti sabali pay a pangngarig. Kunana: “Asino ti babai nga adda sangapulo a drakmana, a no mapukawna ti maysa a drakma, di manggangat ti pagsilawan ket sagadanna ti balay ket sapulenna a sireregta agingga a masarakanna? Ket inton mabirukanna, urnongenna dagiti babbai a gagayyemna ken kakaarrubana, a kunkuna, ‘Makipagragsakkay kaniak, ta nasarakak ti drakma a napukawko.’”

Kalpasanna nangaramid ni Jesus ti umas-asping nga aplikasion. Intuloyna a kinuna: “Kasta met, kunak kadakayo, nga addanto ragsak iti sanguanan dagiti anghel ti Dios gapu iti maysa a managbasol nga agbabawi.”

Anian a nakaskasdaaw daytoy naayat a pannakaseknan dagiti anghel ti Dios maipaay ti pannakaisubli dagiti napukaw a managbasol! Nangnangruna a kasta daytoy yantangay dagitoy naminsan napanglaw, malalais nga ‘am ha·’aʹrets iti agangay mailineadanto a makipagkameng iti nailangitan a Pagarian ti Dios. Kas resultana, maragpatdanto ti saad idiay langit a nangatngato ngem kadagiti anghel mismo! Ngem imbes nga agimunda wenno mariknada a matagtagibassitda, sipapakumbaba nga inapresiar dagiti anghel a dagitoy managbasol a tattao ti simmango ken nangparmek kadagiti kasasaad ti biag a nangisagana kadakuada nga agserbi kas mannakaawat ken manangaasi a nailangitan nga ar-ari ken papadi. Lucas 15:1-10; Mateo 9:13; 1 Corinto 6:2, 3; Apocalipsis 20:6.

▪ Apay a nakitimpuyog ni Jesus kadagiti pagaammo a managbasol, ket ania a pammabalaw ti pinataudna manipud kadagiti Fariseo?

▪ Kasanot’ panangmatmat dagiti Fariseo kadagiti gagangay a tattao?

▪ Ania dagiti ilustrasion wenno pangngarig nga inusar ni Jesus, ket aniat’ maadaltayo kadagita?

▪ Apay a ti panagragrag-o dagiti anghel ket nakaskasdaaw?