Kapitulo 103

Panangsarungkar Manen iti Templo

KALKALPAS ti maikatlo a rabii ni Jesus ken dagiti adalanna idiay Betania nanipud idadatengda manipud Jerico. Ita nga apagsingising ti lawag iti agsapa ti Lunes, Nisan 10, addadan iti dalan nga agturong Jerusalem. Ni Jesus ket mabisin. Gapuna idi makitana ti kayo nga igos a nakabulbulong, isut’ immasideg iti dayta tapno kitaen no daytat’ addaan bunga.

Dagiti bulong ti kayo ket nakasapsapa unay, gapu ta ti panawen para iti igos ket mangrugi iti Hunio, ket ita agarinunos laeng ti Marso. Nupay kasta, patien ni Jesus a yantangay nakasapsapa dagiti bulong, mabalin a nasapa met dagiti bungana. Ngem isut’ napaay. Dagiti bulong ti nangted iti kayo ti makaallilaw a langa. Gapuna inlunod ni Jesus ti kayo, a kunkunana: “Uray kaano man saankanto koma nga agbungan.” Ti nagbanagan ti panangilunod ni Jesus iti kayo nga igos ken ti kaipapananna ket maammuanda iti sumuno a bigat.

Nagtultuloy, di nagbayag nakagtengen ni Jesus ken dagiti adalanna idiay Jerusalem. Napan idiay templo, a sinukimatna iti napalabas a malem. Itatta, nupay kasta, isut’ nagtignay, kas inaramidna tallo a tawen a nasapsapa idi immay iti Paskua idi 30 K.P. Pinaruar ni Jesus dagidiay aglaklako ken gumatgatang idiay templo ket impattogna ti lamlamisaan dagiti agsuksukat ti kuarta ken dagiti tugaw dagidiay aglaklako ti kalapati. Saanna pay nga impalubos ti asinoman nga agawit ti alikamen a lumasat iti templo.

Idi kondenarenna dagidiay agsuksukat ti kuarta ken aglaklako ti an-animal idiay templo, kunana: “Saan aya a naisurat, ‘Ti balayko managananto ti balay ti kararag a maipaay kadagiti amin a nasion’? Ngem dakayo inaramidyo a rukib dagiti mannanakaw.” Mannanakawda agsipud ta agdawatda ti nagngangato a presio kadagidiay awan sabali a maaramidandan no di gumatang kadakuada ti an-animal a kasapulan iti panagdatonda. Gapuna minatmatan ni Jesus dagitoy a panagnegosio kas maysa a langa ti panangkikil wenno panagtakaw.

Ket idi mangngeg dagiti turayen dagiti papadi, eskriba, ken dagiti kangrunaan kadagiti tattao ti inaramid ni Jesus, simmapulda manen ti wagas tapno isut’ mapapatayda. Ngarud pinaneknekanda nga awan panagbalbaliwdan. Kaskasdi, saanda nga ammo no kasanot’ panangpukawda ken Jesus, agsipud ta amin a tattao sumursurotda kenkuana tapno dumngegda kenkuana.

Malaksid kadagiti natural a Judio, dagiti Gentil immayda met iti Paskua. Dagitoy ket proselitada, kayatna a sawen a nakumberteda iti relihion dagiti Judio. Dadduma kadagiti Griego, a kaawatan a proselita, immasidegda ken Felipe ket kayatda a makita ni Jesus. Napan ni Felipe ken ni Andres, nalabit tapno maammuan no maiyanatup dayta a miting. Ni Jesus ket kaawatan nga adda pay laeng idiay templo, a sadiay ti pakakitaan kenkuana dagiti Griego.

Ammo ni Jesus a sumagmamano la nga aldawen ti nabati kenkuana, gapuna nakapimpintas ti panangiyilustrarnat’ kasasaadna: “Dumtengen ti oras a ti Anak ti tao maitan-ok. Pudno, pudno, kunak kadakayo, No ti bukel ti trigo saan nga agtinnag iti daga ken matay, isu agtaeng a maymaysa; ngem no matay, adu a bunga ti itedna.”

Ti maysa a bukel ti trigo ket bassit ti pategna. Ngem, ania no daytat’ maikabil iti daga ken “matay,” a mamagpatingga iti biagna kas bin-i? Daytat’ rumusing ket iti agangay dumakkel a maysa a puon a mangpataud ti ad-adu pay a bukbukel ti trigo. Umas-asping, ni Jesus ket maymaysa laeng a perpekto a tao. Ngem no isut’ matay a matalek iti Dios, isut’ agbalin a pakaipaayan ti biag nga agnanayon kadagiti matalek nga addaan ti isu met laeng nga espiritu ti panagsakripisio kas kenkuana. Gapuna, kuna ni Jesus: “Ti mangipangpangruna iti biagna isu mapukawna, ket ti gumura iti biagna ditoy lubong isu idulinnanto a maipaay iti biag nga agnanayon.”

Kaawatan saan a pampanunoten laeng ni Jesus ti bagina, ta sumaganad nga ilawlawagna: “No adda agserbi kaniak, surotennak koma, ket no adino ti yanko, aggianto met idiay ti adipenko. No adda agserbi kaniak, isu itan-okto ni Amak.” Anian a nakaskasdaaw a gunggona iti panangsurot ken Jesus ken panagserbi kenkuana! Daytat’ gunggona iti pannakaidayawda babaen iti Ama tapno makikaduada ken Kristo idiay Pagarian.

Iti panangpampanunotna ti dakkel a panagsagaba ken naut-ot nga ipapatay nga agur-uray kenkuana, intuloy a kunaen ni Jesus: “Ita adda a nariribuk ti kararuak, ket ania ti sawekto? Ama, isalakannak itoy nga oras.” No la koma ti agur-uray kenkuana ket maliklikan! Ngem, saan, ta kinunana: “Ngem maipanggep itoy immayak iti daytoy nga oras.” Ni Jesus siaanamong iti intero nga urnos ti Dios, agraman ti mismo nga ipapatayna kas daton. Mateo 21:12, 13, 18, 19; Marcos 11:12-18; Lucas 19:45-48; Juan 12:20-27.

▪ Apay a manginanama ni Jesus a makakita kadagiti bunga ti igos uray no saan pay a panawen para kadakuada?

▪ Apay nga inawagan ni Jesus dagidiay aglaklako idiay templo kas “mannanakaw”?

▪ Iti ania a pamay-an a naiyarig ni Jesus kas bukel ti trigo a matay?

▪ Kasanot’ panagrikna ni Jesus maipapan iti panagsagaba ken ipapatay nga agur-uray kenkuana?