Kapitulo 30

Panangsungbat kadagiti Manangakusarna

IDI dagiti relihiuso a papangulo a Judio inakusardan Jesus a mangsalsalungasing iti Aldaw ti Panaginana, insungbatna: “Ni amak agingga ita agar-aramid, ket agar-aramidak met.”

Agpapanpay iti kinuna dagiti Fariseo, ti aramid ni Jesus ket saan a daydiay klase nga iparparit ti linteg iti Aldaw ti Panaginana. Ti trabahona a panangaskasaba ken panangpaimbag ket maysa a trabaho a naggapu iti Dios, ket kas panangtulad iti ulidan ti Dios, itultuloyna nga aramiden dayta iti inaldaw. Nupay kasta, ti sungbatna ad-adda a namagpungtot kadagiti Judio ngem idi sakbayna, ket sinapsapulda ti panangpapatayda kenkuana. Apay?

Agsipud ta saanda laeng a patien itan a ni Jesus salsalungasingenna ti Aldaw ti Panaginana no di ket imbilangda kas maysa a panagtabbaaw ti panagkunana nga isut’ personal nga anak ti Dios. Nupay kasta, di agbuteng ni Jesus ket sinungbatanna ida nga ad-adda maipapan iti naparaburan a pannakirelasionna iti Dios. “Ti Ama ayatenna ti Anak,” kunana, “ket ipakitana kenkuana dagiti amin nga aramidenna.”

“Kas ti ama pagungarenna dagiti natay,” intuloy ni Jesus, “kasta met ti Anak ikkanna ti biag dagiti kayatna.” Pudno unay, ti Anak mangpagpagungaren kadagiti natay iti naespirituan a pamay-an! “Ti dumngeg iti saok ket patienna ti nangibaon kaniak,” kuna ni Jesus, “nanipud ken patay immalis iti biag.” Wen, intuloyna: “Umay ti oras, ket adda itan, a dagiti natay mangngegdanto ti timek ti Anak ti Dios ket dagiti agdengngeg agbiagdanto.”

Nupay awan pay laeng ti rekord a literal a nangpagungar ni Jesus iti asinoman manipud ken patay, imbagana kadagiti manangakusarna a ti kasta a literal a panagungar dagiti natay mapasamakto. “Dikay pagsiddaawan daytoy,” kunana, “ta umay ti oras a dagiti amin nga adda iti tanem a pakalaglagipan mangngegdanto ti timekna ket rummuardanto.”

Agingga itoy a tiempo, kaawatan a di pay pulos inlawlawag ni Jesus iti publiko ti nasken nga akemna iti panggep ti Dios iti kasta a nakalawlawag ken piho a pamay-an. Ngem dagiti manangakusar ni Jesus addaanda iti ad-adu pay ngem ti bukodna a pammaneknek maipapan kadagitoy a bambanag. “Nangibaonkayo ken ni Juan,” impalagip ni Jesus kadakuada, “ket pinaneknekanna ti kinapudno.”

Dua a tawen laeng sakbayna, imbaga ni Juan a Mammautisar kadagitoy a narelihiusuan a papangulo dagiti Judio maipapan iti Daydiay sumaruno kenkuana. Babaen ti panangipalagipna kadakuada iti daydiay panagraemda unay idi ken ni naibaluden a Juan, kuna ni Jesus: “Ket kinayatyo ti nagrag-o iti apagbiit iti lawagna.” Impalagip ni Jesus daytoy iti pampanunotda iti pananginanama a makatulong, wen, tapno ispalenna ida. Kaskasdi isut’ di nagpannuray iti pammaneknek ni Juan.

“Dagita met laeng nga aramid nga aramidek [agraman ti milagro a kaar-aramidna] paneknekanda ti maipapan kaniak a ti Ama imbaonnak.” Ngem malaksid iti dayta, intuloy ni Jesus: “Ni Ama a nangibaon kaniak paneknekanna ti maipapan kaniak.” Ti Dios pinaneknekanna ti maipapan ken ni Jesus, kas pangarigan, iti daydi pannakabautisarna, a kunkunana: “Daytoy ti anakko a dungdunguek.”

Pudno unay, dagiti manangakusar ni Jesus awan pambarda a pangilaksidan kenkuana. Dagiti mismo a Kasuratan a kunada a suksukimatenda paneknekandat’ maipapan kenkuana! “Ta no pinatiyo ni Moises pinatidak koma,” impatingga a kinuna ni Jesus, “ta isu nagsurat maipapan kaniak. Ngem no dikay patien dagiti sursuratna, kasanonto ti pammatiyo kadagiti saok?” Juan 5:17-47; 1:19-27; Mateo 3:17.

▪ Apay a ti aramid ni Jesus saan a panangsalungasing iti Aldaw ti Panaginana?

▪ Kasanot’ panangiladawan ni Jesus iti nasken a pasetna iti panggep ti Dios?

▪ Tapno paneknekan nga isut’ Anak ti Dios, makin-pammaneknek ti intudo ni Jesus?