Kapitulo 33

Panangtungpal ti Padto ni Isaias

KALPASAN a naammuan ni Jesus nga isiksikat dagiti Fariseo ken paspasurot ti partido ni Herodes ti panangpatay kenkuana, isu ken dagiti adalanna nagpaknida idiay Baybay ti Galilea. Ditoy ti dakkel a bunggoy manipud intero a Palestina, ken uray pay iti ruar dagiti pagbeddenganna, ti immarak kenkuana. Adut’ inagasanna, a gapu itoy amin dagidiay addaan ti nakaro a saksakit naggarasugasda a mangsagid kenkuana.

Gapu ta nagadu ti umariwekwek, kinuna ni Jesus kadagiti adalanna a maaddaan koma ti maysa a barangay a mausarna. Babaen ti iyaadayona manipud iti igid ti baybay, mabalinna a malappedan ti umariwekwek a gumarasugas kenkuana. Masursuruanna ida manipud iti barangay wenno agdaliasat iti sabali a lugar iti igid ti baybay tapno matulonganna ti tattao sadiay.

Kuna ni adalan a Mateo a ti ar-aramid ni Jesus ket kaitungpalan “ti nasao babaen ken mammadto nga Isaias.” Kalpasanna inadaw ni Mateo ti padto a tinungpal ni Jesus:

“Adtoy! Ti adipenko a pinilik, ti dungdunguek, a pakaay-ayuan unay toy kararuak! Ikabilkonto kenkuana ti espirituk, ket kadagiti nasnasion ipakaammonanto ti kinahustisia. Saanto a makisusik, ken dinto met agikkis, ket awanto met ti makangngeg ti timekna kadagiti plasa. Ti runo a naparpar dinanto tukkolen ket ti mitsa nga umas-asuk dinanto iddepen, aginggat’ mapagballigina ti kinalinteg. Ket iti naganna panginanamaanto dagiti nasnasion.”

Ni Jesus, siempre, ti dungdunguen nga adipen ti Dios nga inanamonganna. Ket pinagbalin a nalawag ni Jesus no ania ti pudno a kinahustisia, nga isut’ pinalibeg dagiti ulbod a narelihiusuan a tradision. Gaput’ di nainkalintegan a panangiyaplikarda iti linteg ti Dios, dagiti Fariseo didanto pay umay a mangbadang ti tao a masakit iti Aldaw ti Panaginana! Iti panangilawlawagna ti kinahustisia ti Dios, pinalag-anan ni Jesus dagiti tattao iti panangpadagsen dagiti di nainkalintegan a tradision, ket maigapu itoy a padpadasen dagiti papangulo ti relihion ti mangpapatay kenkuana.

Ania ti kaipapanan ti ‘saanto a makisusik, ket dinto met agikkis tapno awanto ti makangngeg ti timekna kadagiti plasa’? No ag-agasanna dagiti tattao, ni Jesus ti ‘siinget a nangbilin kadakuada a dida koma iparparangarang ti kaaddana.’ Dina kayat a maaddaan ti nakaar-ariwawa a panangipablaak iti bagina kadagiti lansangan wenno maaddaan kadagiti natiritir a damag a sigagagar a maiyallatiw babaen iti ngiwat.

Kasta met, impan ni Jesus ti makaliwliwa a mensahe kadagiti tattao a nailadawan kas naparpar a runo, natukkol ken naipayatpayat. Naiyarigda kas mitsa nga umas-asuk, a ti maudi a rissik ti biag ngangngani maiddepen. Saan nga ibaddek ni Jesus ti natukkolen a runo wenno iddepen ti agkurkuridemdem, umas-asuken a mitsa. Ngem babaen iti kinadungngo ken ayat, silalaingto a mangitandudo iti naemma. Pudno unay, ni Jesus ti maysa a panginanamaan dagiti nasnasion! Mateo 12:15-21; Marcos 3:7-12; Isaias 42:1-4.

▪ Kasanot’ panamagbalin ni Jesus a nalawag ti kinahustisia, a saan a nakisusik wenno nangipangato ti timekna kadagiti plasa?

▪ Asino ti naiyarig kas natukkol a runo ken umas-asuk a mitsa, ket kasanot’ panangtrato ni Jesus kadakuada?