Kapitulo 107

Pangngarig ti Paboda

BABAEN kadagiti dua a pangngarig, imbutaktak ni Jesus dagiti eskriba ken dagiti nangato a papadi, ket isut’ kayatda a papatayen. Ngem ni Jesus saan pay a nalpas kadakuada. Intuloyna ti nangisalaysay kadakuada ti sabali pay a pangngarig, a kunkunana:

“Ti pagarian ti langit maipadis iti maysa nga ari, a rinambakanna ti boda ti anakna. Ket imbaonna dagiti adipenna tapno ayabanda dagiti naawis iti boda, ngem dida kinayat ti immay.”

Ni Jehova a Dios isu ti Ari a nangisagana ti boda para ti Anakna, a ni Jesu-Kristo. Iti agangay, ti nobia a buklen ti 144,000 a napulotan a paspasurotna maitipondanto ken Jesus idiay langit. Dagiti iturayan ti Ari isuda ti ili ti Israel, nga, idi naiyegda iti sidong ti Linteg ti tulag idi 1513 K.K.P., inawatda ti gundaway nga agbalin a “maysa a pagarian dagiti papadi.” Gapuna, iti dayta nga okasion, isuda ti immuna a naawis iti paboda.

Nupay kasta, ti umuna nga ayab kadagidiay naimbitaran sa la rimmuar idi otoño ti 29 K.P., idi a ni Jesus ken dagiti adalanna (dagiti adipen ti ari) rinugianda ti trabahoda a panangikaskasaba ti Pagarian. Ngem dagiti Israelita iti lasag nga immawat itoy nga ayab babaen kadagiti adipen manipud 29 K.P. ingganat’ 33 K.P. dida kinayat ti immay. Gapuna ti Dios nangted iti nasion dagiti naawis ti sabali pay a gundaway, kas isalaysay ni Jesus:

“Nangibaon manen kadagiti sabsabali nga adipen, a kunkunana, ‘Ibagayo kadagiti naawis: “Adtoy! insaganak ti dayák, dagiti bakbaka ken dagiti animalko a pinalukmeg napartidan, ket naisaganada aminen. Umaykayo iti pagbodaan.”’” Daytoy maikadua ken maudi nga ayab kadagidiay naimbitaran nangrugi idi Pentecostes 33 K.P., idi a naiparukpok ti nasantuan nga espiritu kadagiti paspasurot ni Jesus. Daytoy nga ayab nagtultuloy ingganat’ 36 K.P.

Kaaduan kadagiti Israelita, nupay kasta, inwaksida met daytoy nga ayab. “Ngem saanda nga inkankano ket napanda,” kuna ni Jesus, “ti maysa idiay pagtalonanna, ket ti sabali kadagiti pagsapulanna; ket dagiti dadduma, tiniliwda dagiti adipenna, ket nagsasawanda ket pinapatayda ida.” “Iti kasta,” intuloy ni Jesus, “daydi ari nakaunget, ket imbaonna dagiti buyotna ket pinukawna dagiti nangpapatay ket pinuoranda ti siudadda.” Napasamak daytoy idi 70 K.P., idi a ti Jerusalem napuoran babaen kadagiti taga Roma, ket dagidiay mammapatay napapatayda.

Kalpasanna inlawlawag ni Jesus no ania ti napasamak kabayatanna: “Idin [ti ari] kunana kadagiti adipenna, ‘Ti boda naisagana, ngem dagiti naawis ket saanda a maikari. Inkay ngarud kadagiti pagsisinaan dagiti daldalan nga agturong iti siudad, ket kadagiti isuamin a masarakanyonto awisenyo ida iti pagbodaan.’” Inaramid dagiti adipen daytoy, ket “ti pagbodaan napno kadagiti sangaili.”

Daytoy trabaho a panangurnong kadagiti sangaili manipud kadagiti daldalan iti ruar ti siudad dagidiay naawis nangrugi idi 36 K.P. Ti Romano a panguluen ti buyot nga isu ni Cornelio ken ti pamiliana isudat’ immuna kadagiti di nakugit a di Judio a naurnong. Ti panangurnong kadagitoy di Judio, nga aminda ti kasukat dagidiay immuna a nagkitakit nga umawat ti awis, nagtultuloy agingga iti maika-20 a siglo.

Kabayatan ti maika-20 a siglo a ti siled a maipaay iti seremonia ti boda ket napunnon. Insalaysay ngarud ni Jesus no aniat’ mapasamaken, a kunkunana: “Ngem idi simrek ti ari tapno kitaenna dagiti sangaili nabigbigna idiay ti maysa a tao a di nagpagan-anay ti kawes a makiboda. Gapuna kinunana kenkuana, ‘Gayyem, kasano a nakastrekka ditoy nga awan pagan-anaymo a maipaay iti boda?’ Ket isu saan a nakauni. Idin ti ari kinunana kadagiti babaonenna, ‘Isu punguenyo dagiti saksaka ken dagiti im-imana ket iduronyo iti sipnget iti ruar. Idiay addanto panagsangit ken panagngaretnget dagiti ngipen.’”

Ti tao nga awanan kawes ti makiboda iladladawanna dagiti imitasion a Kristiano ti Kakristianuan. Ti Dios dina pulos binigbig dagitoy nga addaan umiso a pakailasinan kas naespirituan nga Israelita. Di pulos pinulotan ti Dios ida iti nasantuan nga espiritu kas makipagtawid iti Pagarian. Gapuna isudat’ maipalladaw iti ruar iti kasipngetan a sadiay ti pakadadaelanda.

Sinerraan ni Jesus ti pangngarigna babaen ti panagkunana: “Ta adu dagiti maayaban, ngem bassit dagiti mapili.” Wen, adu dagiti naawis manipud iti nasion ti Israel nga agbalin a miembro ti nobia ni Kristo, ngem sumagmamano laeng nga Israelita iti lasag ti napili. Kaaduan kadagiti 144,000 a sangaili nga immawat ti nailangitan a gunggona isuda dagiti di Israelita. Mateo 22:1-14; Exodo 19:1-6; Apocalipsis 14:1-3.

▪ Asinoda dagidiay immuna a naawis iti boda, ket kaano a naited kadakuada ti awis?

▪ Kaano ti umuna nga iruruar ti ayab kadagidiay naimbitaran, ket asino dagiti ad-adipen a nausar a mangipaay iti dayta?

▪ Kaano ti maikadua a pannakaited ti ayab, ken asino kalpasanna dagiti naawis?

▪ Asinodat’ iladladawan ti tao nga awanan pagan-anay a kawes ti makiboda?

▪ Asinoda dagiti adu a naawis, ken ti sumagmamano a napili?