Kapitulo 13

Pannakaadal Manipud Pannakasulisog ni Jesus

DAGDAGUS kalpasan ti pannakabautisarna, ni Jesus ket inturong ti espiritu ti Dios idiay let-ang ti Judea. Adut’ mabalin a panunotenna, ta idi nabautisaran “ti langit naglukat,” tapno makitana dagiti nailangitan a bambanag. Wen, adut’ mabalinna a mennamennaen!

Binusbos ni Jesus ti 40 nga aldaw ken 40 a rabii iti let-ang ket di nangnangan bayat daytoy a tiempo. Kalpasanna, idi mabisin unayen ni Jesus, immay ti Diablo tapno sulisogenna, a kunkunana: “No sika ti anak ti Dios, ibilinmo a dagitoy a bato agbalinda a tinapay.” Ngem ammo ni Jesus a di umiso ti mangusar iti karkarna a bilegna a mangpennek iti bukodna a tarigagay. Isut’ gapuna a nagkitakit a masulisog.

Ngem di namingga ti Diablo. Pinadasnat’ sabali a pamay-an. Kinaritnan Jesus a tumappuak iti bakud ti templo tapno dagiti anghel ti Dios ti mangispalto kenkuana. Ngem di nasulisog ni Jesus tapno aramiden ti kasta a nakaskasdaaw a pammabuya. Nagadaw manipud iti Kasuratan, impakita ni Jesus a di umiso ti panangsuot iti Dios iti kastoy a wagas.

Iti maikatlo a pannakasulisog, impakita ti Diablo ti amin a pagpagarian ti lubong iti karkarna a pamay-an ket kunana: “Amin dagitoy itdekto kenka no agrukbabka nga agdayaw kaniak.” Ngem nagkitakit manen ni Jesus a masulisog nga agaramid iti di umiso, a pinilinat’ agtalinaed a nasungdo iti Dios.

Makaadaltayo manipud kadagitoy a pannakasulisog ni Jesus. Ipakitada, kas pangarigan, a ti Diablo ket saan laeng a basta kalidad ti kinadakes, kas kunaen ti dadduma, no di ket isut’ agpaypayso, di makita a persona. Ipakita met ti pannakasulisog ni Jesus nga amin a gobierno ket kukua ti Diablo. Ta kasano koma a pudpudno a pannulisog ti panangiyopreser ti Diablo kadakuada ken Jesus no talaga a saanna met a kukua?

Ken panunotenyo daytoy: Kuna ti Diablo nga isut’ situtulok a manggunggona ken Jesus maipaay iti maysa a panagrukbab, nga uray pay itedna amin a pagpagarian ti lubong. Mabalin a padpadasennatay met ti Diablo a sulisogen iti umasping a wagas, a nalabit ikabilna iti sanguanantayo dagiti makagargari a gundaway a makagun-od ti nailubongan a kinabaknang, pannakabalin, wenno saad. Ngem anian a nainsiriban ti panangsurottay iti ehemplo ni Jesus babaen iti panagtalinaed a nasungdo iti Dios aniaman ti umay a pakasulisogan!

Mateo 3:16; 4:1-11; Marcos 1:12, 13; Lucas 4:1-13.

▪ Ania dagiti bambanag a masinunuo a mennamennaen ni Jesus bayat ti 40 nga aldawna idiay let-ang?

▪ Kasanot’ panangsulisog ti Diablo ken Jesus?

▪ Aniat’ maadaltayo manipud iti pannakasulisog ni Jesus?