Kapitulo 101

Sadi Betania, iti Balay ni Simon

IDI pumanaw ni Jesus idiay Jerico, isut’ agturong idiay Betania. Ti panagdaliasat alaennat’ agmalem, ta daytat’ panagsang-at iti ngangngani 19 a kilometro iti nakarigrigat a dalan. Ti Jerico agarup 250 metros iti baba ti patas ti baybay, ket ti Betania agarup 760 metros iti ngato ti patas ti baybay. Ti Betania, no malagipyo pay, isut’ pagnaedan ni Lazaro ken ti kakabsatna a babbai. Ti bassit a purok ket agarup 3 a kilometro manipud Jerusalem, a masarakan iti akindaya nga arisadsad ti Bantay dagiti Olivo.

Adut’ nakasangpeten idiay Jerusalem para iti Paskua. Nasapada nga immay tapno madalusandat’ bagbagida babaen iti seremonia. Nalabit nakasagiddat’ bangkay wenno nakaaramiddat’ banag a namagbalin kadakuada a narugit. Gapuna sursurotendat’ pamay-an a mangdalus ti bagbagida tapno marambakanda ti Paskua iti makaay-ayo a pamay-an. Bayat nga agtataripnong dagitoy nasapa a simmangpet idiay templo, adut’ mangpugpugto no umay ni Jesus iti Paskua.

Ti Jerusalem isut’ sentro ti panagsusuppiat maipapan ken Jesus. Pagaammo unayen a kayat dagiti narelihiusuan a papangulo a tiliwen ni Jesus tapno papatayenda. Kinapudnona, nangteddat’ bilin nga asinoman a makaammot’ yanna, masapul nga ipakaammona kadakuada. Tallo a daras kadagiti nabiit pay a bulbulan​—idiay Piesta ti Abong-abong, idiay Piesta ti Dedikasion, ken kalpasan panangpagungarna ken Lazaro​—pinadpadas dagitoy a papangulo nga isut’ papatayenda. Gapuna, pampanunoten dagiti tattao, isarang ngata pay maminsan ni Jesus ti bagina iti publiko? “Aniat’ maikunayo?” agsisinnaludsoddat’ maysa ken maysa.

Kabayatanna, dimteng ni Jesus idiay Betania innem nga aldaw sakbay ti Paskua, a nagtinnag iti Nisan 14 sigun iti kalendario a Judio. Nakagteng ni Jesus idiay Betania agarup rabii ti Biernes, a daytat’ panangrugi ti Nisan 8. Di mabalin nga inaramidna ti panagdaliasatna nga agturong Betania iti Sabado agsipud ta ti panagdaliasat iti Sabbath​—manipud ilelennek ti init ti Biernes ingganat’ ilelennek ti init ti Sabado​—ket maiparit sigun iti linteg dagiti Judio. Nalabit napan ni Jesus idiay pagtaengan da Lazaro, kas inaramidna idin, ket pinalabasnat’ rabii ti Biernes sadiay.

Nupay kasta, ti sabali pay nga umili ti Betania ti nangawis ken Jesus ken ti kakaduana iti pannangan iti rabiit’ Sabado. Ti lalaki isu ni Simon, a dati nga agkukutel, a sakbay daytoy isut’ nalabit a pinaimbag ni Jesus. Kas panangsalimetmet iti nagaget a kababalinna, ni Marta agserserbi kadagiti sangaili. Ngem, kas gagangay, ni Maria maayatan nga agdengdengngeg ken Jesus, nga ita namataud ti suppiat.

Nanglukat ni Maria ti kahon ti alabastro, wenno bassit a praskita, nga aglaon ti agarup kagudua kilo a bangbanglo, a “pulos a nardo.” Daytoy ket nakangingngina. Pudno unay, ti pategna ket katupag ti makatawen a sueldo! Idi insapsapo ni Maria ti lana iti ulo ni Jesus ken iti sakana ket sana pinunasan ti sakana iti buokna, ti banglona pinunnona ti intero a balay.

Makarurod unay dagiti adalan ket kinunada: “Apay daytoy a panangdadael?” Kalpasanna kinuna ni Judas Iscariote: “Apay-apay a saan a nalako daytoy a bangbanglo iti tallo gasut a denario ket naited koma kadagiti napanglaw?” Ngem saan a pudno a maseknan ni Judas kadagiti napanglaw, ta isut’ agtaktakaw manipud ti kahon ti kuarta nga iduldulin dagiti adalan.

Ni Jesus ti nangidepensa ken Maria. “Bay-anyo,” imbilinna. “Apay-apay alimutengenyo? Naimbag nga aramid ti inaramidna kaniak. Ta agnanayon nga adda kadakayo dagiti napanglaw ket inton kayatyo mabalinyo ti agaramid kadakuada ti naimbag, ngem siak saan nga agnanayon nga addaak kadakayo. Inaramidna ti nabalinanna; inyunana a sinapsapuan ti bagik a maisagana iti tanem. Pudno kunak kadakayo, Uray sadino a pakaikaskasabaanto ti naimbag a damag iti isuamin a lubong, idiay masaritanto met ti inaramid daytoy a babai tapno pakalaglagipan kenkuana.”

Adda ni Jesus idiay Betania iti nasuroken a 24 oras, ket ti damag iti kaaddana nagsaknapen. Gapuna, adut’ immay iti balay ni Simon tapno makitada ni Jesus, ngem immayda met tapno makita ni Lazaro, nga adda met sadiay. Gapuna dagiti panguluen dagiti papadi nagnunummuanda ti panangpapatay saan laeng a ken Jesus no di kasta met ken Lazaro. Ngamin ta adu kadagiti tattao ti namati ken Jesus gaput’ pannakakitada a sibibiag daydiay pinagungarna manipud ken patay! Pudno unay, anian ti kinadakes dagitoy a panguluen ti relihion! Juan 11:55–12:11; Mateo 26:6-13; Marcos 14:3-9; Aramid 1:12.

▪ Ania a panagsasarita ti maar-aramid idiay templo ti Jerusalem, ken apay?

▪ Apay a masapul a nakasangpet ni Jesus idiay Betania iti Biernes imbes a Sabado?

▪ Idi sumangpet ni Jesus idiay Betania sadinot’ mabalin a nangpalabasanna ti Sabbath?

▪ Ania nga aramid ni Maria ti nakapataud ti suppiat, ket kasanot’ panangidepensa ni Jesus kenkuana?

▪ Aniat’ mangiyilustrar ti dakkel a kinadakes dagiti panguluen a papadi?