Kapitulo 6

Ti Anak ti Kari

IMBES nga agsublida idiay Nasaret, nagtalinaed da Jose ken Maria idiay Betlehem. Ket idi walo nga aldawen ni Jesus, isut’ pinakugitda, kas ibilin ti Linteg ti Dios ken Moises. Kaawatan nga ugali met ti panangnagan iti ubing a lalaki iti maikawalo nga aldaw. Iti kasta pinanagananda ti anakda ti Jesus, kas nasaksakbay nga imbaga ni anghel Gabriel.

Nasurok a makabulanen ti napalabas, ket ni Jesus 40 nga aldawnan. Sadino ti pangipanan dagiti dadakkelna kenkuana? Idiay templo ti Jerusalem, a sumagmamano laeng a milia manipud iti pagnanaedanda. Sigun iti Linteg ti Dios ken Moises, 40 nga aldaw kalpasan ti panagpasngay iti maysa nga anak a lalaki, ti maysa nga ina masapul nga agdaton idiay templo maipaay iti pannakadalus.

Daytat’ aramiden ni Maria. Kas datonna, nangiyeg ti dua a babassit a tumatayab. Daytoy ti mangipamatmat iti kasasaad ti ekonomia da Jose ken Maria. Ti Linteg ni Moises ipamatmatna a maysa nga urbon a kordero, a napatpateg nga amang ngem dagiti tumatayab, ti rebbeng a maidaton. Ngem no ti ina saanna a kabaelan daytoy, umdasen ti dua a pagaw wenno kalapati.

Idiay templo maysa a lakay ti nangubba ken Jesus. Ti naganna ket Simeon. Impalgak ti Dios kenkuana a saanto a matay agingga a makitana ti naikari a Kristo ni Jehova, wenno Mesias. Idi simrek ni Simeon iti templo iti daytoy nga aldaw, isut’ inturong ti nasantuan nga espiritu iti ubing nga inawit da Jose ken Maria.

Bayat ti panangubba ni Simeon ken Jesus isut’ nagyaman iti Dios, a kunkunana: “Ita, Soberano nga Apo, palubosam a matay a sitatalna toy adipenmo kas iti saom; ta dagitoy matak nakitadan ti pakaisalakanan nga insaganam iti sanguanan dagiti amin a tattao, maysa a silaw a manglawag kadagiti nasion ken dayaw ti ilim nga Israel.”

Nasdaaw da Jose ken Maria idi mangngegda daytoy. Kalpasanna binendisionan ni Simeon ida ket kinunana ken Maria a ti anakna “maikabil tapno pakapasagan ken pakaitan-okan dagiti adu iti Israel” ket ti ladingit, kas maysa a natadem nga igam, ti mangsalputto iti kararua ni Maria.

Adda met iti daytoy nga okasion ti 84-añosna a mammadto a managan Ana. Kinapudnona, kanayon nga adda idiay templo. Iti dayta met laeng nga oras isut’ immasideg ket rinugianna ti nagyaman iti Dios ken nagsao maipapan ken Jesus kadagidiay amin nga umimdeng.

Anian a kinaragsak da Jose ken Maria gapu kadagitoy a paspasamak idiay templo! Wen, amin daytoy paneknekanna kadakuada a ti ubing isu Daydiay Inkari ti Dios. Lucas 2:21-38; Levitico 12:1-8.

▪ Kaano a kaawatan nga ugali ti panangnagan iti ubing a lalaki nga Israelita?

▪ Aniat’ kasapulan ti maysa nga Israelita nga ina no ti anakna a lalaki ket 40 nga aldawnan, ket kasano a ti panangtungpal iti daytoy a rebbengen ipalgakna ti kasasaad ni Maria iti ekonomia?

▪ Siasinot’ nakailasin iti katatao ni Jesus iti daytoy nga okasion, ken kasanot’ panangipakitada iti daytoy?