Kapitulo 61

Ti Baro a Nagunggan-Demonio Naagasan

BAYAT nga awan da Jesus, Pedro, Santiago, ken ni Juan, mabalin nga iti maysa a turod iti Bantay Hermon, naipasango ti dadduma kadagiti adalan iti maysa a parikut. Iti panagsublina, insigida a nakita ni Jesus nga adda banag a di umiso. Adda naguummong iti aglawlaw dagiti adalanna, ket dagiti eskriba ti makisussusik kadakuada. Apaman a makitada ni Jesus, nagsiddaaw unay dagiti tattao ket timmarayda a nangkablaaw kenkuana. “Ania ti pakisusikanyo kadakuada?” insaludsodna.

Ket manipud iti bunggoy dagiti tattao, maysa a lalaki ti nagparintumeng iti sanguanan ni Jesus ket inlawlawagna: “Mannursuro, inyegko kenka ti anakko nga adda espirituna nga umel; isu nga uray sadino a pangalaanna kenkuana itublakna, ket aglabutab ti ngiwatna ket agngaretnget dagiti ngipenna ket maganggango. Ket kinasaok dagiti adalan tapno isu paruarenda koma, ket dida nabalinan.”

Nalabit dagiti eskriba gunggundawayanda ti saan a pannakapaimbag dagiti adalan iti baro, a nalabit lalaisenda pay ida. Ket iti daytoy a kanito, dimteng ni Jesus. “O kaputotan a di mammati,” kunana, “agingga iti kaano a makipagianak kadakayo? Agingga iti kaano nga iturturedkayto?”

Kasla iturturong ni Jesus dagiti sasaona iti tunggal maysa a siimatang, ngem awan duadua ad-adda a naiturongda kadagiti eskribas, a mangrirriribuk kadagiti adalanna. Sumaruno, kinuna ni Jesus maipapan iti daydiay baro: “Iyegyo kaniak.” Ngem bayat a mapmapan ti baro ken ni Jesus, ti demonio a nakalugan kenkuana ti nangitublak kenkuana ket nagkuykuyegyeg a napasag iti daga. Ti baro aggulgulagol a mangiruar ti labutab iti ngiwatna.

“Kasano ti kabayagen nga adda daytoy a maar-aramid kenkuana?” insaludsod ni Jesus.

“Nanipud idi kinaubingna,” insungbat ti ama. “Ket namin-adu a [ti demonio] iduronna iti apuy ken kadagiti danum tapno pukawenna.” Kalpasanna impakpakaasi ti ama: “Ngem no adda bassit pannakabalinmo, kaasiannakami ket tulongannakami.”

Nalabit iti adu a tawtawen, ti ama agsapsapulen ti tulong. Ket ita, iti di pannakabalin dagiti adalan ni Jesus, dakdakkel manen ti ladingitna. Gapu iti kasla awan panginanamaannan a panagpakpakaasi ti lalaki, buyogen ti pammaregta kinuna ni Jesus: “Dayta a sao, ‘No adda bassit pannakabalinmo’! Amin a banag mabalin kadagiti mammati.”

“Mamatiak!” dagus nga inyikkis ti ama, ngem kinunana a sisasangit: “Tulongam ti kinakurang ti pammatik!”

Idi ngarud makita ni Jesus nga adu a tao ti agdadarison, tinubngar ni Jesus daydi demonio: “Sika espiritu nga umel ken tuleng ibilinko kenka a rummuarka ket dika sumublin kenkuana.” Ket idi pimmanaw ti demonio pinagikkisna manen ti baro ket agkuykuyegyeg iti napalalo. Kalpasanna ti baro ket di makagaraw a napasag iti daga, a gapu itoy kaaduan kadagiti tattao kinunada: “Natayen!” Ngem ni Jesus iniggamanna ti imana, ket binangonna.

Kasakbayanna, idi naibaon dagiti adalan a mangaskasaba, nangparuarda kadagiti demonio. Gapuna ita, idi simrekda iti maysa a balay, insaludsodda a pribada ken ni Jesus: “Apay-apay isu dikam nabalinan a pinaruar?”

Idi impamatmatna a daytat’ gapu ti kinakurang ti pammatida, simmungbat ni Jesus: “Daytoy a kita saan a rummuar no di gapu iti panagkararag.” Kaawatan a kasapulan ti panagsagana a maipaay iti panangparuar iti nangnangruna a napigsa a demonio a nairaman iti daytoy a kaso. Ti napigsa a pammati agraman ti panagkararag a mangidawdawat ti makapabileg a tulong ti Dios ket kasapulan.

Ket kalpasanna innayon ni Jesus: “Pudno kunak kadakayo, No adda koma pammatiyo a kas iti bukel ti mustasa, kunaenyonto itoy bantay, ‘Umaliska manipud ditoy agingga idiay a disso,’ ket umalisto, ket awanto ti di mabalin kadakayo.” Anian a nakapigpigsa ti pagbalinan ti pammati!

Dagiti lapped ken pakarigatan a mangtuben iti irarang-ay ti serbisio ni Jehova ket mabalin a kasla di maliklikan ken di maikkat a kas iti dakkel a literal a bantay. Kaskasdi, ipakpakita ni Jesus a no sukayentay ti pammati iti puspusotayo, a sibugan dayta ken paregtaen dayta a dumakkel, daytanto ti agbalin a nataengan ket mabalinantayonto nga ikkaten dagiti kakasla bantay a lapped ken pakarigatan. Marcos 9:14-29; Mateo 17:19, 20; Lucas 9:37-43.

▪ Ania a kasasaad ti naipasango ken Jesus idi isut’ agsubli manipud Bantay Hermon?

▪ Ania a pammaregta ti itden ni Jesus iti ama ti nagunggan-demonio a baro?

▪ Apay a dagiti adalan dida nabalinan a pinaruar ti demonio?

▪ Kasano kapigsa ti panangipakita ni Jesus iti pagbalinan ti pammati?