Kapitulo 12

Ti Bautismo ni Jesus

AGARUP innem a bulan kalpasan ti panangrugi ni Juan a mangasaba, ni Jesus, a 30 añosnan, immay kenkuana sadi Jordan. Iti ania a rason? Tapno bumisita? Interesado kadi laeng ni Jesus no kasanot’ panagrang-ay ti trabaho ni Juan? Saan, kiniddaw ni Jesus ken Juan nga isut’ bautisaranna.

Nagkitakit nga insigida ni Juan: “Siak ti masapul nga agpabautisar kenka, ket sika umayka kaniak?” Ammo ni Juan a ti kasinsinna a ni Jesus ket naisangsangayan nga Anak ti Dios. Ay ket, limmagto ni Juan gaput’ ragsakna idiay aanakan ni inana idi a ni Maria, a masikog ken Jesus, bimmisita kadakuada! Ti ina ni Juan a ni Elisabet, awan duadua a sinaritana daytoy kenkuana kalpasanna. Ket nalabit nga imbagana met kenkuana maipapan ti panangipakaammo ti anghel iti pannakaiyanak ni Jesus ken iti panagparang dagiti anghel idi rabii a pannakaiyanak ni Jesus.

Gapuna am-ammo ni Juan ni Jesus. Ket ammo ni Juan a ti pammautisarna ket saan a para ken Jesus. Agpaay dayta kadagiti agbabawi iti basolda, ngem ni Jesus awan basolna. Kaskasdi, agpapan pay ti panagkitakit ni Juan, impilit ni Jesus: “Anamongam ita, ta kasta ti maipaay kadatayo a panangtungpal iti amin a kinalinteg.”

Apay nga umiso a mabautisaran ni Jesus? Gapu ta ti bautismo ni Jesus ket maysa a simbolo, saan a panagbabawi iti basbasol, no di ket ti panangipresentarna iti bagina tapno aramiden ti pagayatan ni Amana. Ni Jesus maysa idi a karpintero, ngem ita dimtengen ti panawen tapno rugianna ti ministeriona a nangibaonan kenkuana ni Jehova a Dios nga aramiden ditoy daga. Pagarupenyo kadi nga adda namnamaen ni Juan a karkarna a mapasamak bayat ti panangbautisarna ken Jesus?

Ni Juan ireportna kalpasanna: “Daydiay nangibaon kaniak a mamautisar iti danum kinunana kaniak, ‘Ti makitamto a babaan ti espiritu ket agtaeng kenkuana, daytoy met laeng ti mamautisar iti nasantuan nga espiritu.’” Gapuna namnamaen ni Juan ti espiritu ti Dios a dumteng iti daydiay bautisaranna. Nalabit, ngarud, saan unay a nakellaat idi, bayat a rimkuas ni Jesus manipud iti danum, nakita ni Juan ti “kasla kalapati nga espiritu ti Dios a bumabbaba kenkuana.”

Ngem ad-adu pay ngem dayta ti napasamak bayat a nabautisaran ni Jesus. ‘Ti langit naglukat’ kenkuana. Aniat’ kaipapanan daytoy? Nalawag a kaipapananna a bayat a nabautisaran, ti laglagip iti biagna idiay langit sakbay a timmao nagsubli kenkuana. Ngarud, naan-anay a malagip ni Jesus ti kabibiagna a kas naespirituan nga anak ni Jehova a Dios, agraman ti amin a bambanag a sinao ti Dios kenkuana bayat ti kaaddana idiay langit sakbay ti kaaddana kas maysa a tao.

Sa, idi nagbautisar, inwaragawag ti maysa a timek manipud langit: “Daytoy ti Anakko a dungdunguek, Isu nga inanamongak.” Makin-timek dayta? Timek a mismo ni Jesus? Siempre saan! Daytat’ timek ti Dios. Nalawag, ni Jesus ket Anak ti Dios, saan a Dios mismo, kas kunaen ti dadduma.

Nupay kasta, ni Jesus ket natauan nga anak ti Dios, a kas met ti immuna a tao, a ni Adan. Ni adalan a Lucas, insuratna kalpasan ti panangdeskribirna ti bautismo ni Jesus: “Ket ni Jesus met laeng, idi nangrugi iti trabahona, agtawen ti kas tallopulo, ket kas impagarupda idi nga anak ni Jose, anak ni Eli, . . . nga anak ni David, . . . nga anak ni Abraham, . . . nga anak ni Noe, . . . nga anak ni Adan, nga anak ti Dios.”

No kasano a ni Adan ket natauan nga “anak ti Dios,” kasta met ni Jesus. Ni Jesus isut’ katan-okan a tao a nagbiag pay laeng, a daytat’ nakalawlawag no amirisentay ti kabibiag ni Jesus. Nupay kasta, iti pannakabautisarna, simrek ni Jesus iti baro a pannakirelasion iti Dios, a nagbalin met a naespirituan nga Anak ti Dios. Isut’ inawagan manen ti Dios sadi langit, iti kaiyariganna, babaen iti panangirugina kenkuana iti maysa a panagbiag a mangiturong iti panangidatonna nga agnanayon ti biagna iti pagimbagan ti nakondenar a sangatauan. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreo 10:5-9.

▪ Apay nga am-ammo ni Juan ni Jesus?

▪ Idinto nga awan ti nagbasolanna, apay a nabautisaran ni Jesus?

▪ Sigun iti ammo ni Juan maipapan ken Jesus, apay a mabalin nga isut’ saan a nakellaat idi bimmaba ken Jesus ti espiritu ti Dios?