Kapitulo 86

Ti Estoria ti Naiyaw-awan nga Anak

KAKKALPASNA laeng a sinalaysay dagiti pangngarig kadagiti Fariseo maipapan iti pannakaipasubli ti napukaw a karnero ken ti napukaw a drakma, nagtultuloy itan ni Jesus babaen iti sabali a pangngarig. Daytoy ket maipapan iti naayat nga ama ken ti panangtratona kadagiti dua nga annakna a lallaki, a tunggal maysa addaan kadagiti nainget a biddut.

Umuna, adda daydiay anak a buridek, ti kangrunaan a karakter iti pangngarig. Innalanan ti tawidna, nga awan panagkedked nga inted kenkuana ni amana. Kalpasanna isut’ pimmanawen iti pagtaenganda ket naigamer iti narugit unay a wagas ti panagbiag. Ngem denggenyo bayat a salaysayen ni Jesus ti estoria, ket kitaenyo no madeterminaryo no asinot’ nairanta nga irepresentar dagiti karakter.

“Maysa a tao,” inrugi ni Jesus, “addaan ti dua nga anakna a lalaki. Ket ti inaudi kinunana ken amana, ‘Ama, itedmo kaniak ti paset dagiti kukuam a panakabagik.’ Ket [ti ama] biningayna kadakuada ti kukuana.” Aniat’ aramiden ita daytoy inaudi iti inawatna?

“Ket,” inlawlawag ni Jesus, “idi napalabas ti sumagmamano nga aldaw, ti inaudi nga anak inurnongna amin ket napan iti maysa a daga nga adayo, ket idiay dinadaelna ti kukuana a nagbiag a nagdakdakes.” Kinapudnona, binusbosna ti kuartana a nakipagtataeng kadagiti balangkantis. Kalpasanna dimteng ti panawen ti kinarigat, kas ituloy a salaysayen ni Jesus:

“Ket idi nagastona aminen, napasamak idiay a daga ti dakkel a bisin ket isu nangrugi a nagsagaba ti kirang. Ket napan ket immasideg iti maysa kadagiti umili ti daydi a daga, ket isu imbaon daydi kadagiti taltalonna tapno agtaraken kadagiti baboy. Ket isu tarigagayanna ti agbussog kadagiti algarrobas a kanen dagiti baboy, ket awan ti nangted kenkuana.”

Anian a nakababain ti pannakapilit nga agtaraken ti baboy, ta dagitoy nga an-animal ket narugitda sigun iti Linteg! Ngem ti nasakit unay iti anak isut’ nakaro a panagbisin a tinarigagayanna pay ti taraon a maipakpakan kadagiti baboy. Gapu itoy nakakaskas-ang a didigrana, kuna ni Jesus, “ngem idi nagpanunot.”

Iti panangituloyna ti estoriana, inlawlawag ni Jesus: “Kinunana [iti bagina], ‘Nagadu dagiti mangmangged idiay balay ni amak nga agsobsobraanda iti taraon, ket siak addaak ditoy a matmatay iti bisin! Tumakderakto ket innakto ken ama ket kunaekto kenkuana: “Ama, nakabasolak iti maikaniwas iti langit ken iti sanguanam. Diak maikarin a managan ti anakmo. Ikabilnak a kas maysa kadagiti mangmangged kenka.”’ Ket timmakder ket napan ken amana.”

Adtoy ti banag nga usigen: No simmango ni amana kenkuana ket sipupungtot a nangbugkaw kenkuana idi pimmanaw, saan koma a masinunuo ti anak no aniat’ rebbeng nga aramidenna. Naikeddengna koma ti agsubli ket sana padpadasen ti agsapul ti panggedan iti sabali a lugar idiay ilida tapno saannan a makitkita ni amana. Nupay kasta, awan kasta a napanunotna. Idiay pagtaenganda ti kayatna a papanan!

Nalawag, ti ama iti pangngarig ni Jesus irepresentarna ti naayat, naasi a nailangitan nga Amatayo, a ni Jehova a Dios. Ken nalabit nabigbigyo met a ti napukaw, wenno naiyaw-awan, nga anak irepresentarna dagiti pagaammo a managbasol. Dagiti Fariseo, a pakisarsaritaan ni Jesus, ti nangbabalaw ken Jesus iti napalabas gaput’ pannakipangpanganna a kadua dagitoy. Ngem asinot’ irepresentar ti inauna nga anak a lalaki?

Idi ti Naiyaw-awan nga Anak ket Nasarakan

Idi ti naiyaw-awan, wenno bayanggudaw, nga anak iti pangngarig ni Jesus nagsublin idiay balay ni amana, ania a klase a pannakaabrasa ti inawatna? Denggenyo bayat nga iladawan ni Jesus dayta:

“Ngem idi adayo pay laeng, nakita ni amana ket simnek ti kaasina, ket timmaray ket inappungolanna ti tengngedna ket inag-agkanna.” Anian a manangngaasi, managayat nga ama, a mangirepresentar la unay iti nailangitan nga Amatayo, a ni Jehova!

Mabalin a nangnangngegan ti ama ti nalulok a panagbibiag ti anakna. Kaskasdi isut’ inawatna iti pagtaenganda a din nagur-uray ti detaliado a panangilawlawag. Ni Jesus ti addaan met iti kasta a manangabrasa nga espiritu, nga isut’ nangiyusuat ti iyaadani kadagiti managbasol ken agsingsingir ti buis, nga isudat’ nairepresentar iti pangngarig maipapan ti anak a naiyaw-awan.

Pudno, ti mannakaawat nga ama iti pangngarig ni Jesus awan duadua addaan bassit nga ideya maipapan iti panagbabawi ti anakna babaen ti panangpaliiwna iti naladingit, nakaayay-ay a rupana idi nga isut’ agsubsubli. Ngem ti naayat nga iyaasideg ti ama ti nangpalaka para iti anak nga ipudno dagiti basbasolna, kas insalaysay ni Jesus: “Ket di anak kinunana kenkuana, ‘Ama, nakabasolak iti maikaniwas iti langit ken iti sanguanam. Diak maikarin a managan ti anakmo. Aramidennakon kas maysa kadagiti tattao a tangtangdanam.’”

Kaskasdi, ngangngani di pay rimmuar dagiti sasao kadagiti bibig ti anak idi a nagtignay nga insigida ti ama, a minandaranna dagiti adipenna: “Darasenyo! alaenyo ti kapatgan a pagan-anay, ket kawesanyo, ket ikabilyo ti maysa a singsing iti imana ken sapatos kadagiti sakana. Ket iyegyo ti baka a napalukmeg ket partienyo ket mangantayo ket agraragsaktayo, ta daytoy anakko natay ket nagungar; napukaw ket nasarakan.” Ket nangrugida a “nagrarambak.”

Kabayatanna, “di anakna nga inauna [ti ama] adda idi iti talon.” Kitaenyo no mailasinyo no asinot’ ireprepresentarna babaen iti panagimdeng ti kanayonan ti estoria. Kuna ni Jesus maipapan iti anak nga inauna: “Ket isu idi sumangpet ken immasideg iti balay nangngegna ti nasam-it a toktokar ken dagiti salsala. Ket idi nga inayabanna ti maysa kadagiti ubbingda inintuodna kenkuana no ania daydi. Ket isu kinunana kenkuana, ‘Ni kabsatmo dimteng, ket ni amam pinartina ti napalukmeg a baka agsipud ta inawatna a nakaradkad.’ Ngem isu nakaluksaw ket dina kinayat ti simrek. Ket rimmuar ni amana ket inay-ayona. Ngem isu simmungbat ket kinunana ken amana, ‘Adtoy, iti adun a tawen a panagserserbik kenka uray kaano diak kinaniwas ti bilinmo, ket uray kaano dinak inikkan ti bassit a kalding tapno makipagragsakak kadagiti gagayyemko. Ngem apaman a simmangpet daytoy anakmo nga inibusna ti kukuam kadagiti balangkantis, impartiam ti baka a napalukmeg.’”

Asino, kas ti anak nga inauna, ti manangbabalaw iti asi ken atension a maipapaay kadagiti managbasol? Saan kadi a dagiti eskribas ken dagiti Fariseo? Yantangay ti panangbabalawda ken Jesus gaput’ panangawatna kadagiti managbasol ti nangtignay iti daytoy a pangngarig, nalawag nga isudat’ ireprepresentar ti anak nga inauna.

Pinagpatingga ni Jesus ti estoriana babaen ti panagapelar ti ama iti anakna nga inauna: “Anak, sika addaka nga agnanayon kaniak, ket amin dagiti gamengko kukuam ida; ngem masapul ti panagrambak ken panagay-ayat, ta daytoy kabsatmo natay ket nagungar, ken napukaw ket nasarakan.”

Iti kasta pimmanaw ni Jesus a di naresolbar no aniat’ inaramid ti anak nga inauna iti agangay. Iti kinapudnona, iti kamaudianan, kalpasan ti ipapatay ken panagungar ni Jesus, “adu unay dagiti papadi a simmurot iti pammati,” a nalabit agraman sumagmamano kadagitoy klase “anak nga inauna” a pakisarsaritaan ditoy ni Jesus.

Ngem asino iti moderno a tiempo ti ireprepresentar dagiti dua nga annak? Rebbeng a dagidiay addaan umdasen a pannakaammo kadagiti pangpanggep ni Jehova tapno addan pakaibatayan ti iseserrekda iti pannakirelasion kenkuana. Ti anak nga inauna irepresentarna ti dadduma a miembro ti “bassit nga ipastoran,” wenno ti “kongregasion dagiti inauna nga annak a nailanad ti naganda idiay langit.” Dagitoy ti nangtulad ti kababalin nga umar-arngi iti inauna nga anak. Awan tarigagayda a mangawat iti naindagaan a klase, ti “sabsabali a karnero,” a ti panangipatoda isudat’ mangag-agaw iti kangrunaan a puesto.

Ti anak a naiyaw-awan, iti kasumbangirna, irepresentarna dagidiay adda iti ili ti Dios a pumanaw tapno nanamenda dagiti ragragsak nga ipapaay ti lubong. Iti agangay, nupay kasta, dagitoy ti sibababawi nga agsubli ken agbalinda manen nga aktibo nga ad-adipen ti Dios. Pudno unay, anian ti kinamanagayat ken kinamanangaasi ti Ama kadagidiay makabigbig ti pannakasapulda ti pammakawan ket agsublida kenkuana! Lucas 15:11-32; Levitico 11:7, 8; Aramid 6:7; Lucas 12:32; Hebreo 12:23; Juan 10:16.

▪ Siasinot’ pangibagbagaan ni Jesus iti daytoy a pangngarig, wenno estoria, ken apay?

▪ Asino ti kangrunaan a karakter iti estoria, ken aniat’ napasamak kenkuana?

▪ Siasino idi panawen ni Jesus ti irepresentar ti ama ken ti inaudi nga anak a lalaki?

▪ Kasanot’ panangtulad ni Jesus ti ulidan ti nadungngo nga ama iti pangngarigna?

▪ Aniat’ panangmatmat ti inauna nga anak iti pannakaawat ti kabsatna, ket kasano a nagtignay dagiti Fariseo kas iti anak nga inauna?

▪ Aniat’ aplikasion ti pangngarig ni Jesus iti kaaldawantayo?