Kapitulo 75

Ti Gubuayan ti Kinaragsak

KABAYATAN ti ministeriona idiay Galilea, nagar-aramid ni Jesus kadagiti datdatlag, ket ita ulitenna dagitoy idiay Judea. Kas pangarigan, isut’ namagtalaw manipud maysa a lalaki iti sairo a manglaplapped panagsaona. Nagsiddaaw dagiti tattao, ngem dagiti manangbabalaw namataudda ti isusuppiat kas pinataudda met idiay Galilea. “Iti pannakabalin ni Beelzebub a turayen dagiti sairo ti pamagtalawna kadagiti sairo,” kunada. Dadduma kayatda ti dakdakkel a pammaneknek manipud ken Jesus maipapan ti kinasiasinona, ket isut’ pinadpadasda a suoten babaen ti panagdawat kenkuana ti maysa a pagilasinan manipud langit.

Agsipud ta pagaammona ti pampanunotenda, impaay ni Jesus ti isu met laeng a sungbat kadagiti manangbabalawna idiay Judea kas intedna kadagidiay taga Galilea. Kunana a tunggal pagarian a mabingaybingay a maibusor met la kenkuana marba. “Ket,” insaludsodna, “no ni Satanas mabingaybingay a maibusor met la kenkuana, kasanonto ti panagtakder ti pagarianna?” Impakitana ti napeggad a takder dagiti manangbabalawna babaen ti panagkunana: “Ngem no gapu iti ramay ti Dios paruarek dagiti sairo, kinapudnona a ti pagarian ti Dios dimteng kadakayo.”

Dagidiay agpalpaliiw kadagiti datdatlag ni Jesus rebbeng nga agtignayda kadakuada iti isu met laeng a panagrikna kas kadagidiay nagtignay adu a siglon sakbayna a nakakita ti panagaramid ni Moises ti datdatlag. Impukkawda: “Ramay ti Dios daytoy!” “Ramay ti Dios” met ti nangikitikit ti Sangapulo a Bilbilin kadagiti taptapi ti bato. Ket ti “ramay ti Dios”​—ti nasantuan nga espirituna, wenno aktibo a puersana​—ti namagbael ken Jesus a namagtalaw kadagiti sairo ken nangpaimbag kadagiti masakit. Gapuna pudno a ti Pagarian ti Dios ti nangkellat kadagitoy a manangbabalaw, ta ni Jesus, ti natudingan nga Ari ti Pagarian, ti adda a mismon iti tengngada.

Ngarud inyilustrar ni Jesus a ti abilidadna a mangparuar kadagiti sairo ket pammaneknek iti pannakabalinna a mangringbaw ken Satanas, kas met no umay ti maysa a napigpigsa a lalaki ket parmekenna ti armado unay a lalaki a mangguguardia iti palasio. Inulitna met ti ilustrasion nga insalaysayna idiay Galilea maipapan iti narugit nga espiritu. Ti espiritu pumanaw iti maysa a lalaki, ngem idi ti lalaki saanna a pinunnuan kadagiti naimbag a bambanag ti nagbalin nga ongaong, ti espiritu nagsubli a kaduana dagiti pito a sabsabali pay, ket ti kasasaad ti lalaki nagbalin a dakdakes ngem iti immun-una.

Bayat nga agim-imdeng kadagitoy a sursuro, maysa a babai iti gimong ti natignay a nagpukkaw a kunkunana: “Naragsak ti tian a nagawit kenka ken dagiti suso a sinusoam!” Yantangay ti tarigagay ti tunggal babai a Judio ket isut’ agbalin nga ina ti maysa a mammadto ken nangnangruna ti Mesias, maawatantayo no apay a kinuna ti babai daytoy. Kaawatan impatona a ni Maria ti nangnangruna a naragsak gapu ta isut’ ina ni Jesus.

Nupay kasta, daras a kinorehir ni Jesus ti babai maipapan ti pudpudno a gubuayan ti kinaragsak: “Saan,” insungbatna, “imbes ketdi, Ad-adda a naragragsak pay dagiti agdengngeg iti sao ti Dios ken tungpalenda ida!” Saan pulos insingasing ni Jesus a ti inana, ni Maria, ket maikkan ti naisangsangayan a pammadayaw. Imbes ketdi, impakitana a ti pudno a kinaragsak masarakan iti panagbalin a matalek nga adipen ti Dios, saan nga iti aniaman a pisikal a singgalut wenno dagiti gapuanan.

Kas ti inaramidna idiay Galilea, tinubngar met ni Jesus dagiti tattao idiay Judea gaput’ panagdawatda ti pagilasinan manipud langit. Imbagana kadakuada nga awan pagilasinan a maited kadakuada malaksid ti pagilasinan ni Jonas. Ni Jonas ti nagbalin a pagilasinan agpadpada babaen iti tallo aldaw a panaggianna iti tian ti ikan ken iti natured a panangaskasabana, a nagresulta ti pannakatignay dagiti taga Nineve a nagbabawi. “Ngem, adtoy!” kuna ni Jesus, “adda ditoy ti dakdakkel ngem ni Jonas.” Kasta met, ti reina ti Seba nagsiddaawanna ti kinasirib ni Salomon. “Ngem, adtoy!” kuna ni Jesus manen, “adda ditoy ti dakdakkel ngem ni Salomon.”

Inlawlawag ni Jesus a no manggangat ti maysa a tao ti silaw, saanna nga ikabil dayta iti nalemmeng wenno iti sirok ti salop no di ket iti pagsilawan tapno dagiti tattao makitada ti lawag. Nalabit isingsingasingna a ti panangisuro ken panagaramid kadagiti datdatlag iti imatang dagitoy natangken-lengngesda a tattao nga agdengdengngeg kenkuana kaiyariganna ti panangilemlemmeng ti lawag ti maysa a silaw. Dagiti mata dagita nga agbuybuya saanda a simple, wenno naipamaysa, gapuna ti nairanta a panggep dagiti milagrona saan a naitungpal.

Kalkalpas pay laeng ni Jesus a nangparuar ti maysa a sairo ken pinagsaona ti maysa a lalaki nga umel. Daytoy koma ti nangtignay kadagiti tattao nga addaan ti simple, wenno naipamaysa, a matmata a mangidayaw iti daytoy nadayag nga aramid ken iwaragawag ti naimbag a damag! Kaskasdi, kadagitoy a manangbabalaw, saan a napasamak daytoy. Gapuna nagpatingga a kinuna ni Jesus: “Kitaem ngarud. Ta ti silaw nga adda kenka saan koma a sipnget. No ngarud ti amin a bagim nalawag ket awan ti pasetna a nasipnget, isuamin nalawagto a kas iti silaw no silnagannaka iti lawagna.” Lucas 11:14-36; Exodo 8:18, 19; 31:18; Mateo 12:22, 28.

▪ Aniat’ tignay dagiti tattao iti panangagas ni Jesus iti lalaki?

▪ Ania ti “ramay ti Dios,” ken kasano a ti Pagarian ti Dios kinellaatna dagiti agdengdengngeg ken Jesus?

▪ Aniat’ gubuayan ti pudpudno a kinaragsak?

▪ Kasano a maaddaan ti maysa a tao ti naipamaysa a mata?