Kapitulo 90

Ti Namnama a Panagungar

KAMAUDIANANNA simmangpeten ni Jesus iti pagbeddengan ti Betania, maysa a bario nga agarup tallo a kilometros manipud Jerusalem. Dayta ket sumagmamano laeng nga aldaw nanipud iti ipapatay ken pannakaitanem ni Lazaro. Agladladingit pay laeng dagiti kakabsatna a babbai a da Maria ken ni Marta, ket adu ti immay iti balayda tapno liwliwaenda ida.

Bayat ti panagladingitda, adda nangipakaammo ken Marta a ni Jesus adda iti dalanna. Gapuna pimmanaw ni Marta ket nagdardaras a nangsabet ken ni Jesus, a nalawag a saanna nga imbagbaga iti kabsatna. Idi nakagtengen ken ni Jesus, inulit ni Marta ti mabalin a naibagadan a dua ken ni kabsatna iti namin-anon a daras bayat ti napalabas nga uppat nga aldaw: “No addaka koma ditoy idi ni kabsatko saan koma a natay.”

Ni Marta, nupay kasta, inyebkasna ti namnama, nga imparangarangna a mabalin nga adda pay maaramid ni Jesus a maipaay iti kabsatna. “Ammok a ti aniaman a dawatem iti Dios, ti Dios itednanto kenka,” kunana.

“Agungarto ni kabsatmo,” inkari ni Jesus.

Maawatan ni Marta a sarsaritaen ni Jesus ti masanguanan a naindagaan a panagungar, isu nga in-inanamaen met ni Abraham ken dagiti dadduma nga adipen ti Dios. Gapuna simmungbat: “Ammok nga agungarto inton panagungar iti kamaudianan nga aldaw.”

Nupay kasta, nangipaay ni Jesus ti namnama a dagdagus a pakabang-aran, a kunkunana: “Siak ti panagungar ken ti biag.” Pinalagipanna ni Marta nga inted ti Dios kenkuana ti pannakabalin ken patay, a kunkunana: “Ti mamati kaniak, uray no matay, agbiagto pay; ket siasinoman nga agbiag ken mamati kaniak saanto a matay a pulos.”

Saan nga isingsingasing ni Jesus ken ni Marta a dagiti matalek a sibibiag idi saandanton a pulos a matay. Saan, no di ket ti punto nga ibagbagana ket ti panamati kenkuana mabalin a mangiturong iti biag nga agnanayon. Ti kasta a biag ket tagiragsakento ti kaaduan a tattao kas resulta ti panagungarda iti kamaudianan nga aldaw. Ngem dagiti dadduma a matalek makalasatdanto iti panungpalan daytoy a sistema dagiti bambanag ditoy daga, ket gapu kadagitoy dagiti sasao ni Jesus ket pumudnodanto iti literal a kaipapanan. Saandanton a matay a pulos! Kalpasan daytoy a nakaskasdaaw a sasao, nagimtuod ni Jesus ken ni Marta, “Patiem kadi daytoy?”

“Wen, Apo,” kinunana. “Siak pinatik a sika ti Kristo ti Anak ti Dios, Daydiay umay ditoy lubong.”

Idin nagdardaras ni Marta a nangayab ken kabsatna, a kunkunana iti nalimed: “Ti Mannursuro adda ditoy ket ayabannaka.” Dagus a pimmanaw ni Maria iti balay. Idi nakitada a pimmanaw, sinurotda, nga ipapanda a mapan iti tanem a pakalaglagipan.

Idi dimteng iti yan ni Jesus, nagruknoy kadagiti saksakana ket nagsangit. “Apo, no addaka koma ditoy idi, saan koma a natay ni kabsatko,” kinunana. Natignay ni Jesus iti kasta unay idi nakitana nga agsangsangit ni Maria ken dagiti bunggoy dagiti tattao a sumursurot kenkuana. “Sadino ti nangikabilanyo kenkuana?” inimtuodna.

“Apo, umayka ket kitaem,” simmungbatda.

Nagsangit met ni Jesus, isu a nagkunaan dagiti Judio: “Kitaenyo no kasano ti panangdungngona kenkuana!”

Dadduma ti nakalagip, nga iti panawen ti Piesta dagiti Tabernakulo sumagmamano a bulan sakbayna, inagasan ni Jesus ti maysa nga agtutubo a lalaki a bulsek, ket inimtuodda: “Saan aya a mabalinan daytoy a tao a nanglukat kadagiti mata ti bulsek nga aramiden met a daytoy a tao saan koma a matay?” Juan 5:21; 6:40; 9:1-7; 11:17-37.

▪ Kaano a nakagteng kamaudiananna ni Jesus iti asideg ti Betania, ket ania ti kasasaad sadiay?

▪ Ania ti pangibatayan ni Marta iti panamatina iti panagungar?

▪ Kasano a naapektaran ni Jesus iti ipapatay ni Lazaro?